احنا معشر الستات عندنا كلمة شهيرة جدا في حالة مرض اي راجل..."ياختاااااااااااااي" بس كده!
ايوة بجد...في حالة المرض..قطة الرجالة جمل بعياله..مش جمل واحد بس...تهويل على مبالغة على over كده في كل حاجة!!
لو الراجل حس ان ضغطه عالي شوية...طول النهار دراعه مربوط بجهاز الضغط وشغال بقى قياسات...ومعظمهم (وده بجد مش بهزر) بيعمل جدول لنفسه مراقبه للضغط...ده في حاله انه عالي "شوية" مش عالي اوي...لو عالي اوي..استخبي!
لو عنده برد او دور جيوب انفية...الحياة بتقف! بجد والله...الكون بيتوقف حتى الشفاء! ولو جاله اسهال...محدش يدخل الحمام اصلا...كل حاجة تقف كده على وضع الاستعداد يمكن يحب يدخل! ولو سمع باب الحمام قفل بيجي له حالة من التوتر الشديد (panic)
بالمناسبة دي حالة عامة عند كل الرجالة بجد...لو ضرسه وجعه...لو ودنه صفرت شوية...لو زوره فيه الم ولو بسيط...اول حاجة بيعملها هي المشروبات الطبيعية....كوبايات رايحة وكوبايات جاية...سخن وساقع...كركادية - تيليو - يانسون - ليمون سخن - شاي بالليمون....مبهر!
وبعد ما كل اكواب البيت تخلص...ياخد دوا!
طيب ما كان من الاول يابن الحلال!! لازم يجرب وصفات الطب البديل الاول...وبعد ما يطلع روح كل اللى في البيت...يتنازل وياخد دوا!
مشكلة عويصة بجد لو حرارته عليت! خلاص مفيش حاجة في الكوكب هاتنزلها!! هوا عاش موود "الحمى".
الازمة مش هنا على فكرة...انا مقدرة جدا ان الانسان يكون تعبان ومش قادر يقوم من مكانه...مشكلتي ان ده لما بيحصل مع الست بتكون بتستهبل!!!
لو الست جالها برد..."في ايه؟ شوية برد يعملوا فيكي كده؟"
برضه المشكلة مش في البرد صدقوني...المشكلة في الحمل والولاده!!
في كلام سخيف اوي اوي بيتقال من الرجالة!! اولا دي حاجة عمرك ما هاتفهم مؤلمة ازاي...ولا متعبة ازاي...ولا هاتستوعب توابع ان يكون عندك مسخوط على اسمك! ولما الست بتشتكى هو بيتضايق اوي...وكتير من الرجالة بيحسوا ان الست بتستهبل...لان ربنا خلق الانثى للهدف ده! اننا نحمل ونخلف ونتكاثر في صمت! بلا شكوى...بلا تقصير...بلا زهق!
في الحمل لو الست قرفت من اكل معين...بيتضايق منها ومش بعيد يتريق عليها...لما تتوحم يقولها ان دي خرافة ومفيش حاجة اسمها وحم...لما يجي لها حموضة..."اشربي مياة ساقعة!"..هوا مش عايز ملل...مش عايز شكوى..احملى في صمت!! خليكي ظريفة بقى!!
وبعد الولادة...متهيالي اللى بيجيب اكتئاب ما بعد الولادة للستات هم الرجالة! كم البؤس اللى بنكون فيه لايليق بفرفشة الراجل التلقائية! هو طبعا مش بيشيل عيال! وكلهم يعملوا حركة قشعريرة كده ال يعنى مش قادر يستحمل (لا كيوت يا حبيبي!!) وانه مش قادر يستحمل بقى..."اخاف اكسر رقبته"...ثواني بس معلش..ايه اللى هايجيبك عند رقبته؟؟!
وكلهم بقى مش بيعرفوا يحضروا ببرونة...ولا حتى يستخدموها..مفيش راجل بيعرف يغير بامبرز (رغم انه مجربش حتى)...بس هوا في حاجات كده مالوش دعوة بيها...وهو والرجالة زمايله مصنفينها "ِشغل ستات"...هوا راجل...اسمه يتحط ورا اسم الطفل اللى مراته جابته وبس! راجل!!
يا ريتنا رجالة!! نكبر دماغنا ونريح نافوخنا زيكم كده!! ولما نمرض نقلب الكون كله...ولما نعمل عملية خطيرة زي الولادة نلم امة لا اله الا الله حوالينا لحد ما نقوم بالسلامة والغرز تلم!
ده احنا بنقوم والسلك لسه في الجرح ونطبخ!!
مقارنة مرض الراجل بمرض الست...نقدر نقول ان الستات دول جبابرة والله...ربنا ما يمرضنا ابدا...ولا يمرضكم علشان بتفرسوا!
ريم اسامة
لينك المدونة على الفيسبوك
https://www.facebook.com/groups/329904227056535/
الازمة مش هنا على فكرة...انا مقدرة جدا ان الانسان يكون تعبان ومش قادر يقوم من مكانه...مشكلتي ان ده لما بيحصل مع الست بتكون بتستهبل!!!
لو الست جالها برد..."في ايه؟ شوية برد يعملوا فيكي كده؟"
برضه المشكلة مش في البرد صدقوني...المشكلة في الحمل والولاده!!
في كلام سخيف اوي اوي بيتقال من الرجالة!! اولا دي حاجة عمرك ما هاتفهم مؤلمة ازاي...ولا متعبة ازاي...ولا هاتستوعب توابع ان يكون عندك مسخوط على اسمك! ولما الست بتشتكى هو بيتضايق اوي...وكتير من الرجالة بيحسوا ان الست بتستهبل...لان ربنا خلق الانثى للهدف ده! اننا نحمل ونخلف ونتكاثر في صمت! بلا شكوى...بلا تقصير...بلا زهق!
في الحمل لو الست قرفت من اكل معين...بيتضايق منها ومش بعيد يتريق عليها...لما تتوحم يقولها ان دي خرافة ومفيش حاجة اسمها وحم...لما يجي لها حموضة..."اشربي مياة ساقعة!"..هوا مش عايز ملل...مش عايز شكوى..احملى في صمت!! خليكي ظريفة بقى!!
وبعد الولادة...متهيالي اللى بيجيب اكتئاب ما بعد الولادة للستات هم الرجالة! كم البؤس اللى بنكون فيه لايليق بفرفشة الراجل التلقائية! هو طبعا مش بيشيل عيال! وكلهم يعملوا حركة قشعريرة كده ال يعنى مش قادر يستحمل (لا كيوت يا حبيبي!!) وانه مش قادر يستحمل بقى..."اخاف اكسر رقبته"...ثواني بس معلش..ايه اللى هايجيبك عند رقبته؟؟!
وكلهم بقى مش بيعرفوا يحضروا ببرونة...ولا حتى يستخدموها..مفيش راجل بيعرف يغير بامبرز (رغم انه مجربش حتى)...بس هوا في حاجات كده مالوش دعوة بيها...وهو والرجالة زمايله مصنفينها "ِشغل ستات"...هوا راجل...اسمه يتحط ورا اسم الطفل اللى مراته جابته وبس! راجل!!
يا ريتنا رجالة!! نكبر دماغنا ونريح نافوخنا زيكم كده!! ولما نمرض نقلب الكون كله...ولما نعمل عملية خطيرة زي الولادة نلم امة لا اله الا الله حوالينا لحد ما نقوم بالسلامة والغرز تلم!
ده احنا بنقوم والسلك لسه في الجرح ونطبخ!!
مقارنة مرض الراجل بمرض الست...نقدر نقول ان الستات دول جبابرة والله...ربنا ما يمرضنا ابدا...ولا يمرضكم علشان بتفرسوا!
ريم اسامة
لينك المدونة على الفيسبوك
https://www.facebook.com/groups/329904227056535/
No comments:
Post a Comment