موسم المكتبات! موسم الاكتئاب....بمعنى اخر: موسم دخول المدارس!
بيوت بتقبض جمعيات ... بيستلفوا فلوس من اقاربهم...في بيع دهب على بسيط كده.
دخول المدارس اكبر كابوس سنوي...اكبر من كابوس مصاريف دخلة رمضان ولبس العيد والمصيف. المدارس دلوقتي بقت بتستعبط...مستغلين ازمة التعليم ولجوء الاهالي للتعليم الخاص والمدارس ام الاف الجنيهات. زمان كان التعليم سهل وبسيط ومفيهوش اي مشكلة...تشوف مدرسة في دائرتك وتقدم وتجيب دولاب او ديسك او شجرتين تبرع للمدرسة والعيل يقبل على طول ويدخل وخلص الحوار كله. واول يوم العيال يعرفوا يجيبوا كام كشكول ويتجلد بلون ايه وبس كده. ولبس المدرسة بيكون دريل (مريلة يعنى للبنات) او بنطلون للاولاد وقميص...وفي الشتا يتلبس فوقيهم جاكيت. قمة البساطة.
دلوقتي بقى!! الاول ندفع فلوس الapplication وانترفيو مع الطفل ومع امه وابوه ولو حد منهم هما التلاته (بما فيهم الطفل اللى لسه مدخلش مدرسة) مايعرفوش انجليزي الطفل يترفض!! ولو عدى وربنا كرم وتعطفوا علينا وقبلوا الطفل...فندخل في مرحلة السحل الغير ادمى. نبدا من مصاريف المدرسة والباص...احقر مدرسة خاصة بتاخد 9 الاف جنيه في السنة غير مصاريف الباص اللى بتكون حوالي 3 الاف جنيه. مش هانجيب سيرة المدارس ال international اللى ب 30 الى 40 الف في السنة...ربنا معاهم!
المهم...نرجع للغلابة بتوع المدارس الخاصة الnational. بعد ما ندفع ال10 الاف ندخل على لبس المدرسة اللى بيكون من محل معين المدرسة متفقة معاه (الله يرحم ايام فرج بتاع لبس المدرسة) واليونيفورم يتكون من الاتي: لبس صيفي ولبس شتوي وجاكيت ولبس الرياضة صيفي وشتوي. يعنى اجمالا اربع اطقم علشان يرجع يقولك انا اتعلمت النهاردة"باء...بهيم!"...وطبعا مش هاتجيبي تيشيرت واحدة في الموسم...لا...هاتجيبي مثلا تلاته تيشيرت صيفي واتنين شورت صيفي مع تلاته سويت شيرت شتوي واتنين بنطلون شتوي وطقم رياضة صيفي وغيره شتوي...والسويتر او الجاكيت اللى كل العيال بتضيعه ده!وطبعا بتجيبي في كل مرحلة لبس جديد تماما علشان تغيير اللون...وفي مرحلة الابتدائي كل سنة بتجيبي علشان الطفل بيكبر بسرعة في الفترة دي. كده هدوم بحوالي الف ونص او الفين جنيه. ونيجي للشنطة...شنطة العيال الموضة حاليا الترولي...شنطة تقيلة وزي الداهية بس الاطفال عايزينها ويكون عليها الشخصية المفضلة لهم. في اناس كتير مش عاجبهم الموضوع ده وبيقولوا تقليعة وبتاع...اه هيا تقليعة ولكن في رأيي الشخصي المتواضع هي حاجة كويسة...الطفل عارف هوا بيحب ايه...وبيختار حاجة بتعكس شخصيته او تعكس اهتماماته...ايه المشكلة لما يلبس حاجة بتدل على ميوله واعجابه بشخصيات معينة؟ مفيش مشكلة. وغير شنطة الاكل .. او اللى بيطلق عليها lunch bag وهي شنطة صغيرة للاكل بيتحط جواها ال lunch box والمياة...اصل العيال ناصحة اوي وواعية لدرجة انهم هايخدوا بالهم من الشنطة الاصلية والجاكيت عدو الاطفال لما كمان نلخمهم بشنطة زيادة! في امهات كتير حاليا بيخلوا الشنطة الصغيرة دي للرحلات...ودي فكرة ظريفة. نشوف متوسط سعر الشنطة الاصلي والشنطة الصغيردي هايكون حوالي من 300 الى 350 جنيه (الاتنين مع بعض).
ندخل بقى على النصباية الكبيرة وهي الادوات المكتبية. كل مدرسة تسلم الام ورقة ملياااااانة طلبات للمدرسة علشان الافندي اللى هاياخد الدكتواره في KG. المدرسة بتطلب عدد من الاقلام الرصاص...عدد من الاساتيك والبرايات...كذا علبة الوان خشب (اه والله كذا علبة)...كذا ملف بلاستيك بكبسونة (file)...جليتر (هايعلموهم تغليف الهدايا الظاهر)...افرخ ورق كانسون الوان!!!...سكيتش او اكتر للرسم...صلصال (طبي)...لزق (ابني طلبوا منه خمسة صمغ اكبر حجم!! نفسي اعرف هايلزقوا ايه! ده لو اشتغل عامل لزق طوابع مش هايستعمل الكمية دي!)...مناديل ورق...بكر تواليت...مناديل مبللة...ديتول...وورق ابيض!...طيب سؤال غير برئ..انا بدفع مصاريف المدرسة ليه وانا هاجيب كل حاجة حتى مناديل الحمام؟...طيب وجايين على نفسهم كده ليه...محدش يعنى طلب طشط نحاس ولا طقم بهارات ولا حتى كيس مسحوق غسيل!...ناس طيبة اوي!!
نحسب الموضوع ده كله يطلع له حوالي 400 جنيه...اي حد يحسب المصاريف الزيادة عن العشرة الاف بتوع المدرسة وفلوس الباص يلاقي مبلغ محترم...ليه بقى؟؟ علشان احنا اخترنا نودي اولادنا مدارس خاصة!!
شفت من يومين ورق الطلبات لمدرسة international وجالي كهرباء زيادة في المخ...لو مكنتش قريت الورقة بنفسي مكنتش هاصدق ابدا...المدرسة طالبة سبع علب اقلام رصاص...سبع علب!!!! وطالبين 3 علب اساتيك...وعلبتين الوان خشب عدد 24 لون! وطالبين اعلى ماركة في المكتبات...وفرش الوان كذا حجم...الوان مياة...نوع معين من الصلصال...وحاجات مستفززززة جدا. انا بعترف ان التعليم الانترناشيونال مختلف واعلى واحسن وعلى عيني وراسي والله...لكم جزيل الاحترام...بس هاتعملوا ايه بسبع علب اقلام رصاص من كل طفل؟؟ لو حد عنده اجابة يا ريت يقولي علشان خيالي مش مستوعب!
طيب احنا غلط اننا اخترنا نعلمهم كويس؟ غلط اننا عارفين مبدئيا شكل الجامعة اللى هايدخلها بعد ما يخرج من المدرسة الخاصة؟ هانعيش حياتنا كلها نعلم فيهم علشان في الاخر يقعدوا جنبنا يلفوا ورق عنب؟ او اعلى حاجة نقدر نقدمها نفتح لهم مشروع...ماهو مش ممكن كل الاف دول هايلاقوا شغل محترم بعد التعليم وكع الفلوس دي كلها...دي حاجة مش سهلة خالص. ويا ترى لو جالهم فرصة للسفر بره يشتغلوا حاجة كويسة هايسافروا ولا يفضلوا معانا بعد شقاء العمر ده كله؟ انا عارفة ان ممكن ناس كتير تضحك على كلامي ده...ولكن انا مثلا عندي طفلين...ومش هافرق بينهم في التعليم...ولو اقدر ادخلهم اعلى من المدارس دي مش هاتردد...تعليم طفلين في الظروف الحالية لجيلنا حاجة مؤلمة...صعبة...وفي المقابل تضحيات كتير للوصول للهدف ده..ان الاولاد يتعلموا كويس ونكون راضيين عن نفسنا قدام ربنا. بس بعد ما يخلصوا تعليم اساسي وجامعي هايكون عندنا فلوس نجيب لهم عربية صغيرة او شقة او حتى نجهزهم للجواز؟؟ ناس كتير بتقول اننا بنعلم الاولاد كويس دلوقتي وبنصرف عليهم كتير علشان هما يلاقوا دخل عالي لما يكبروا ويجوزوا نفسهم بنفسهم بقى. انا شايفة ان الموضوع ده كله مهزلة! انا مش هاعيش عمري كله علشان اولادي يتعلموا فقط! تعليم اساسي!!! امال هاعيش امتى حياة فيها رفاهية واسافر اشوف الدنيا؟ ايوة من حقنا نسافر نشوف بلاد الله...طول ما لقمة العيش والتعليم والعلاج - ودي ابسط حقوق اي انسان متوسط - ازمة حياتنا...هانعيش ونموت واحنا في الساقية!!
وكل ده علشان في الاخر ابنك يقولك "انا مش بحب المدرسة"...اللى ابنها يقول الكلمة دي تتوكل على الله وتديله بالشبشب على طول...ده احنا كنا بنروح الجهادية مش بنروح المدرسة!! مدرسة ايه ام مراجيح ونطاطة دي!!
الله يرحم ايام زمان...ايام الحوش الرمل!
صبرنا يا رب - ده الواحد ناقص يبيع هدومه!
ريم اسامة
