شاليه الراجل

ماليش نفس اكتب مقدمة النهاردة...هادخل في الموضوع على طول 
لقيت انى بقيت اقدر افرًق بين بيت الراجل وبيت الست...بمعنى...لما بنروح مصايف او رحلات خارج القاهرة ونستاجر شقة او شاليه يملكه شخص مش شركة ...بيبان جدااا الشخص ده راجل ولا ست.

لو المالك رجل ...مهما كانت القرية شيك وجميلة...هاتلاحظ الاتي:

ادوات النضافة هي مقشة ومساحة..فقط!! مستحيل تلاقي جاروف...هوا فكرته عن النضافة مقشة فقط لا غير! انتى بقى اكنسي ولمي التراب ولا بواقي الاكل بايدك او بورقة او ضهر نتيجة...انتى وخيالك...الشاطرة تغزل برجل اسمه ايه ده....(المثل ده كريه جدا!). ولو حصلت المعجزة ولقيتي جاروف فمش ممكن ابدا يكون بايد.لازم جاروف يدوي ابو من غير ايد توطي ويجي لك "اتب" تلمي بيه.

باسكيت الزبالة بيكون باسكيت صغير اوي...باسكيت مكتب...هوا حطه علشان كل فكرته عن الزبالة هي ورق البسكوت وعلب العصير والحاجة الساقعة. معندوش اي فكرة عن البلاوي اللى بتترمي كل يوم (ازايز مياة...ازايز حاجة ساقعة...علب البيتزا والفطير...عضم الفراخ وبواقي السمك...بامبرز لو معاك اطفال...ورق بسكوت وشيكولاته وحلويات...واكياس كتير جدااااااااااااااااااااااا) كل ده هايستوعبه باسكيت صغير؟؟؟؟ حاجة تنقط!

التلاجة...بتكون اصغر حجم ممكن واضعف امكانيات ممكن تلاقيها....لو يطول يحط ميني بار هايحطه. 

ادوات المطبخ قمة الخزى والعار...كنكة كبيرة (مش مشكلته ان مزاجك تشرب قهوة! هات الكنكة معاك!) حلة راس العجل (ده مسمى امى عن الحلل الكبيرة اوي الغير عملية) وحلة اصغر شوية (كبيرة جدا برضه)...لو نفسك تعملي كوباية زر ابقى اعمليها في الكنكة الكبيرة (انظر المثل السابق بتاع الشاطرة اللى بتغزل دي) مفيش مجات..هما ست كوبايات من غير ايد لكل حاجة...للشاي والقهوة والمياة والعصير...ومعرفش ايه الفكرة ان الملاعق الصغيرة بتكون اتنين او تلاته بس! افرض يا اخي عايزين ناكل ايس كريم كلنا في نفس الوقت! 

غير طبعا السكاكين التلمة بتاعة طقم الضيوف (اللى لا تقطع بصل ولا طماطم ولا لحوم...اخرك تفردي بيها جبنة).
مش محتاجة اقول ان مفيش طاسة للبيض - مش لازم تقلي بيض...ابقى اسلقه في الكنكة الكبيرة! ومفيش برضه مصفاة كبيرة (مش لازم تعملي مكرونة يا ستي..كفاية رز). وصعب تلاقي صينية تقديم (ما انتوا في مصيف سوا يعنى عيلة...يبقى مفيش تكليف. هاتقدموا في صينية ليه؟!)

السراير عبارة عن تابوت...هم اربع جوانب خشب لا ضهر ولا غيره...والمرتبة حزينة خمسة  سنتى اسفنج وتحسي "بالملل" (بضم الميم) في ضهرك وضلوعك. ومخدة كبيرة بس على كل سرير مفيش مخدات صغيرة.

مفيش سجاد! او ان وجد سجاد فهو يا كبير اوي...او مشايات حمام وحطها في الانتريه. 
الدولاب من غير شماعات...ومفيش "فوَاطة" في الحمام (اللى بيتعلق عليها فوطة) ولا اللى بيتعلق عليها بكر التواليت.

صعب اوي تلاقي جردل وشرشوبة...ازاي متخيل انك هاتقعدي في مكان اسبوع من غير ما تمسحي؟خصوصا لو مفيش سجاد! ده سر من اسرار الكون.
الحمام!!! استغفر الله العظيم على الحمام (اطلقوا لخيالكم العنان)
والمنشر!!! حسبنا الله ونعم الوكيل في شكل المنشر (ان وجد)...يا اطار خشب وبينهم حبال (وهوا سطرين بس اللى موجودين والباقي مقطوع)...او معدن ومصدى! وطبعا مفيش مشابك!
ومفتاح الوحدة مشبوك في حلقة فاضية (مش ماديلية).
الكلام ده كله زمان في التسعينيات...ايام مراقية واسكندرية...لما بدا الساحل يشتغل والقرى الجديدة والتنافس بينهم وخلافه...قلنا فرجت...بينا على الساحل (بس بلاش مراقية)...الحقيقة مكنش في فرق اوي...بس الحمامات كانت ادمية الى حد بعيد بصراحة بس برضه ظل خيال الرجل في فرش الوحدات يضايق! 
السنة قبل اللى فاتت رحنا مكان...هوا جديد ومعروف ان بيكون ليهم معايير معينة للوحدة التى يتم استأجارها...فعلا كانت جميلة اوي وكانت ملك لست...غلاية...كوبايات مياة وعصير ومجات...اطباق كل الاحجام...طقم كامل معالق وشوك...كنكة قهوة...سيرفيسات وصواني تقديم...كان في مخدات صغيرة (سبحان الله) وبرضه اشتراك في الخدمة الفندقية للمكان (بيجوا ينضفوا كل يوم ويغيروا الملايات والفوط والبشاكير)...غير المنشر النضيف والمشابك...وتلاجة كويسة...وتليفزيون كبير...وكانت رحلة مريحة وخيالية...السنة اللى بعدها قلنا نروح تانى بقى بما اننا جربنا الخدمة المميزة....كان صاحب الوحدة راجل (!!) كان نكد!! تلات كوبايات مياة...مج واحد فقط...سكينة كبيرة ممكن ندبح بيها ثور...حوالي تلات معالق كبيرة...وطبق واحد بس!!!! نزلنا اشترينا اطباق وملاعق وشوك ومجات علشان نعرف نعيش!! وطبعا الباسكيت الصغيرة المستفز والدولاب ابو من غير شماعات. والراجل العسل مكنش مشترك في الخدمة الفندقية ولا في اي خدمة تانية اصلا. 
اهم الاتنين وحدات في نفس المكان....ولكن اختلاف المالك كان عامل في نكد الاسرة او في انشكاحها...ارجوكم لو في راجل يملك وحدة للايجار...خلي مراتك تروح تحط التاتش بتاعها...بيفرق معانا احنا...شبعنا نكد وعندنا كمية اطباق غريبة اشتريناها من المصايف!!!

ريم اسامة

الخرس الزوجي

مش هاقول ظاهرة جديدة..ولا ظاهرة اصلا. هو واقع قديم جدا...متهيالى الفراعنه عملوا المعابد علشان مش عايزين يتكلموا مع زوجاتهم!!

تلاقي اي اتنين مخطوبين بيرغوا رغي فظيع في التليفونات...بتاع سبع مكالمات في اليوم...شغل "طمنيني لما تروحي"..."طمنى لما توصل شغلك" وياه بقى لو حد فيهم نسي او اتاخر...الطرف الاخر يمثل الخضة وانه كان لسه هايلبس علشان ينزل يدور عليها! محدش يستغرب كلكم مريتوا بالمرحلة الملزقة دي.

ويتجوزوا...الصمت!!

هوا الصمت بيجي كده...لوحده...ومش بيكون استعداد على فكرة خالص كمان...بس هوا الصمت والجواز بييجوا ايدهم في ايد بعض. انا مش هاتكلم عن الاسباب ولا الحلول ولا اي حاجة...انا فقط هارصد الظاهرة التاريخية دي :)

كنت مع صديقتي (مامة بيبو) وبنتكلم في الموضوع ده وسردنا تاريخ الصمت وقلت انقل لكم الكلام 

كنا بنقول امال قبل الموبايل كان الراجل بيتنح في ايه؟؟

زمان قبل عهد الموبايل والتليفزيون...كان الجرنال ...وكان الجرنال له عظيم الاحترام وقتها. الراجل واخده تحت باطه في كل حتة وفي كل الاوقات...ومحدش ياخده من جنبه...اول ما يصحى يدور عليه...بعد الغدا يبص فيه...وقبل ما ينام "يفرَه" من اوله لاخره يمكن فاته حاجة او يقرا مقال دسم كان سايبه يحلي بيه قبل النوم. الست كانت بتشتغل كروشيه وكانافا وبتخيط وبتنضف وبتغسل وبتزعق للعيال الخ الخ الخ (زي ما احنا متغيرناش)
والتطور الطبيعي ان بقى فيه راديو...الراجل ماسك الجرنال وجنب الراديو والست جنبه بتشتغل تريكو وكروشيه...ويسهروا في صمت جنب الراديو على صوت حفل ام كلثوم او مسرحية اذاعية.
وظهر التليفزيون...او خرَاب البيوت زي ما كانوا بيقولوا عليه....الراجل مربع في مكانه المقدس على الكنبة (المكان المقدس ده بيكون في سنتر التليفزيون بالظبط اكنه في سينما) وجنبه الريموت ومحدش يلمسه...وباقي العيلة في صمت متابعة اي حاجة قرر الاب انه يتفرج عليها ...كورة بقى ولا اخبار ولا مسلسل ولا اي حاجة...هو مش عايز وش حواليه واللى عايز يرغي او يعمل دوشة يدخل جوا. وهو تلفزيون واحد له كثير من التقدير وغلاوته من غلاوة العيال بالظبط. وقبل النوم الجرنال برضه. والست ياعيني لسه بتشتغل بلوفرات محدش بيلبسها وطواقي بتترمي في درج الشرابات! 
واخيرا بعد فترة كبيرة ظهر الاتاري...كان الراجل الشحط الطويل العريض ابو شنب يمسك الjoystick ..او الدراع ابو سلك ده ويلعب طول النهار...متنح وخناق شغال في الخلفية علشان الست عايزة المسلسل بتاعة الساعة سبعة وهو عايز يكسب الجيم ده.
الكمبيوتر...بقى الكمبيوتر سبب خراب البيوت..مع ان مكنش في انترنت...برضه لعب...وكان بيتنافس مع اصحابه مين كمل levels اكتر واعلى. 

وظهر الدش...مأساااااه في كل بيت...الصمت بقى الطبيعى...هايتكلموا ليه؟ ماهو كل حاجة قدامهم ومبهرة و24 ساعة (مش زي المرحلة السابقة التلفزيون يقفل منتصف الليل)...واغانى ومسلسلات وافلام ورا بعض ورا بعض...مفيش وقت للكلام حضرتك!! هما بقوا يتكلموا في الفاصل الاعلانى..ده لو بيتخانقوا بيسكتوا فقرة العرض ويكملوا في الفاصل الاعلانى!! ورجالة هبلة كتير بقت تذل ستاتها انهم مش زي البنات اللى بتغني او بيطلعوا في الدش! الجرايد بقى طلعت بمقالات عن الخطر الموجه لكل افراد الاسرة...التليفزيون يهدم الترابط...القنوات الفضائية تخرب البيوت وتزيد نسبة الطلاق...الخ من العناوين التافهة. بس ماهو الصمت اصلا موجود تفرق ايه صمت للجرنال او للتليفزيون؟ اهو كله صمت!!

وظهر النت!!! هنا كل البيوت اعتبرت باقي اعضاءها شهداء. وحقيقي فعلا في بيوت خربت بسببه...الكلام بقى في الصوابع على الكيبورد..ربنا خلق لنا "بؤ" علشان نشرب وناكل فقط! ياما خروجات اتلغت علشان القعدة على النت دي...وناس خسروا بعض بسبب المقالب على النت خصوصا مع ظهور مواقع التشات (الدردشة). ورجالة كتير جدا جدا جداااااااا لجأوا لها بسبب كرههم للعيشة مع زوجاتهم او هروب من روتين الحياة ومللها...بس كتير منهم خربوا الدنيا خالص بغباء.
وظهر الموبايل...الناس كلها كانت مبهورة بالحديدة دي وامكانياتها المحدودة للغاية (مقارنة باللى بعد كده) وبقت حياتنا كلها عبارة عن رنات من اصحابنا واحنا نرن لهم...ونزعل اوي اننا "اديت نهى ميسد ومردتش عليا! بخيلة!! هيا بفلوس يعنى؟" ورسائل ام جنيه ونص بحالهم ونرغي بالرسائل دي!! كانتت  فلوسنا كلها طايرة على الموبايل وكل ده واحنا ساكتين بنكتب رسائل ونستقبل رسائل في صمت. وبعد ظهور ال smart phones اصبح هو الادمان الجديد والكلام بقى يضايقنا علشان هايشتت تركيزنا بعيد عن الحديدة.
الصمت مالوش سبب...ولا مثلا اختفاء الموبايلات هايخلي الرجالة تتكلم تانى...الصمت بيكون من الطرفين بس هو شديد اوي من طرف الراجل..الراجل بيكره يتكلم مع اهل بيته لاسباب ربنا وحده يعلمها..لو اتبحبح شوية مع مراته بكلمتين بيجي له كرشة نفسه يحس ان هايحصل مشاكل بعدها او انها هاتمسك التليفون تتصل بامها واختها وبنت خالتها هناء تحكي لهم جوزها قالها ايه.
 كل راجل متاُثر جدا بسلوك والدته زمان....ايام التليفون ابو قرص وسلك...لما كان بعد الضهر هو فقرة التليفونات...حتى لو مفيش اي حاجة جديدة تتقال...برضه مكالمات بعد الضهر شغالة يسمعوا الكلام مكرر لتالت مرة عادي.
حاليا بقت المكالمات قليلة...بقت الزيارات نادرة...التجمعات بقت على جروب على الواتساب...الضحك بقى حروف مكتوبة...المعايدات بقت صور بتتبعت لبعض.
الصمت زمان كان في البيوت فقط ولكن حاليا الحياة كلها بقت صامتة...حتى لو خرجنا مع اصحابنا ...برضه ساكتين علشان بنبص في الحديدة اللى في ايدنا.
الصمت الزوجي مقبول الى حد ما (ماهو هانقول ايه صحيح برضه كل يوم كل يوم...مفيش تقريبا)....بس بلاش الصمت يمتد لكل اوقاتنا مع كل الناس في الفرح والحزن والزهق.
الصمت بيولد الجمود.

ريم اسامة 


جروب المدونة على الفيسبوك: https://www.facebook.com/groups/329904227056535/

شخصيات الفيسبوك

الفيسبوك من اهم مواقع التواصل الاجتماعي - وهو حجر الاساس في رايي المتواضع.

طبعا على الفيسبوك كل معارفنا ومعارف معارفنا. وممكن نقسم الناس شوية مجموعات كده من خلال شخصيتهم اللى على النت - او ممكن نقول ال online شخصية :)

مثلا:

الناس بتوع "يا ناس يا شر كفاية قر"...كل ما العربية تتخبط او عيل يرجع او ضفرها يتكسر...تصور الحادث الاليم مع جملة شهيرة من بتوع " يا ريت الناس تبطل تركز معانا كده" ..."الكحكة في ايد اليتيم عجبه"... "يا رب مش طالبة حاجة غير انك تعمي عني عيون الناس"...ولازم تصدر اكتر زاوية مؤلمة للحادث المروع علشان تخرم بيه عيون الناس. مع ان المشكلة في سواقتها المقرفة...اكلها بشع وطبيعي العيال ترجع منه....عادي ان ابنها يتكعبل ويتعور! وكل ما ناموسة تدخل بيتهم يبقى هيا محسودة والحشرات بتتلم عندها بسبب العين!! 

في النوع بتاع "صباح الخير"..."مساء الخير"..."تصبحوا على خير"...."جمعة مباركة"..."صباحكم نادى"...في اكثر الاحيان بيكون ده شخص طيب وبيحب الناس بس مفيش حاجة يقولها...وغالبا الناس بترد عليه بlike او بصور ورد وعصافير او بنت واقفة جنب ستارة على البحر!! ناس طيبة والله بتصعب عليا

وفي اللى كل ما تدخل المطبخ تعمل ساندوتش جبنة شيدر سايحة تصوره وتحطه...وتكتب حاجات زي تسلم ايديا...صنع ايديا وحياة عنيا...اتفضلوا معايا فطار...انا جبت الاكل مين هايجيب الشاي....الخ. بصوا دي فاضية...فهاتوا شاي وروحوا عندها صدقوني هاتفرح والله...طيبة واجتماعية ومش عارفة تفعًل ده في حياتها الحقيقية!

وجزء كده عندنا كلنا...قسم التشاؤم واللون الغامق! بتوع الصور الحزينة والدموع وواحدة قاعدة في ركن وايدها على عينها (كل يوم بنت مختلفة في نفس الركن) وكلام زي "القلوب الطيبة الاكثر معاناة"...."يا رب"...."كم هي مؤلمة الايام". كل يوم!! مفيش خبر حلو ولا نكتة ولا فيديو مقالب...لا لا...هيا قاعدة مستنية الفرج في الركن!

عندنا بقى ابراج المراقبة! هم غالبا كادر من العائلة...مهمته تفسير وتحليل كل بوست حضرتك تتكرمى وتحطيه...نزلتي بصورة وردة "اةةة يا متهنية يا متدلعة يا هناء"....نزلتي اكله "اه طبعا مظبطة جوزها اكلات جديدة وحركات"...لو حطيتي دعاء "انا كنت سمعت كده ان امها وجوزها على خلاف...شكل البيت قايد نااااااااااااار"....وكل كومنت تكتبيه بيتم مراجعته وفصفصته ومقارنته باحوالك على ارض الواقع ونطلع بالنتيجة اللى بتتنشر زي ريحة الشراب المعفن في لحظة بالتليفون لبيوت العائلة الكريمة كلها !! اهو نلحق البنت قبل ما تضيع! نصيحة: اعملي اكونت تانى حطي عليه كل ابراج المراقبة وكل كام يوم ادخلي حطي اي بوست وهمي للخداع بس مش اكتر واعملي بلوك من على الاكونت الرئيسي....عقلك في راسك اعرفي خلاصك! 

وطبعا مش هاننسى "يكونش امين شرطة اسم الله ولا دبلوماسي"...ده اللى مستحيل مستحيل يعمل كومنت او لايك او يعبر اي شخص مهما كان عنده وعايز كل الناس تهتم جدا بكلامه وبصوره وببوستاته...هوا حكيم وعارف كل حاجة...واكبر من التفاهات بتاعتكم...وينزل بصورة يلم كومنتات كتييييير عليها ومايردش كمان على حد فيهم!!!! غموض بقى ومش فاضي وكده...انتوا تافهين وهوا راكز وواعي لنفسه ولمجتمعه...مش فاضي للمجاملات التافهة...ولا بصور عيالكم السخيفة...ولا بكومنتاتكم السطحية....وده غالبا في حياته بيكون اناني اوي...نرجسي ال حد كبير....فرحان بنفسه شويتين! ده علاجه التجاهل...والتجاهل كتير عليه كمان!!! شيله من عندك وريح دماغك! 

عندك كمان بتوع مسابقة "انا اكتر منك"...يعنى انتى عيانة...لا هيا وابنها وبنت خالة جوزها عيانين فهيا تكسب! انتى تعبانة...لا ازااااااي؟ هيا تعبانة ومكسحة وطلع لها دمل في خرم ودنها وعامل لها صداع ورغم الالم لسه بتغسل المواعين وبتقور محشي ومضحية بصحتها علشان المجتمع يعيش....لو انتى مفلسة .... هيا مديونة وطلبت من البواب يجيب لها بخمسة جنيه عيش على حسابه وهربانة من سبعة ديًانة بيجروا وراها بموتسيكلات في الشوارع.....ولو جوزك جاب لك شنطة...جوزها جاب لها خمسة!! هيا كده...لأزم تكسب....امال يعنى يقولوا عليها هفأ ومش عارفة تفوز؟! (اديني واحد مصمصة شفايف درامية هنا من فضلك)

وفي كمان الناس الراشقة...اللى تطلع لك في كل بوست زي العفريت...ولازم يؤيدوا بشدة جدا كلامك..ولازم يطلعوا انهم عانوا كتير في عيشتهم السودا ورغم المعاناه دي لسه بيضحكوا وضاربين الدنيا صرمة...والشخصية الراشقة دي هاتلاقيه بيدخل كل فترة عند كل اصحابه ويشوف الاصدقاء المشتركين...بيحبوا الدنيا حواليهم تكون دوائر متشابكة في بعض...لمزيد من المعرفة والنميمة والرشق وخلافه. ربنا يهدي!

وفي جزء بتاع لم الحسنات...هما داخلين الفيسبوك علشان يهدوا الناس وعلشان يلموا حسنات منهم فقط لا غير...كويس جدا....ربنا يغفر لنا جميعا. بس كل البوستات عبارة عن "لعلها المنجية"..."ممشطة ابنه فرعون"...."مليار حسنة هل من مستجيب"...."الايام البيض"...وفي رمضان الاكونت بينشط جدااااااااااااا جدا. انا على فكرة مش بتريق عليهم....مجرد حصر للنماذج اللى عندنا 

والنموذج الاكثر استفزازا (ليا انا شخصيا يعنى) وهو النموذج العميق!!!! يا سيدي على العمق والتحذلق بالمصطلحات والالفاظ والاستشهاد بمقاطع من....الروايات!!! هيا الروايات بقت عمق يا جماعة؟ محدش قالي يعنى...اخص عليكوا مش تقولوا!! الثقافة بقت الروايات؟ ولازم بقى يقولوا في كل مناسبة هما بيحبوا جو ايه يقروا فيه! وضروري طبعا القهوة...ماهو العمق مش بييجي من غير قهوة...لو انت بتقرا وبتمضع لبان....لا....مش عميق...اداءك fake وفيه اصطناع...لازم القهوة وتكون مرًة...عارف لو القهوة فيها سكر؟ تبقى مدعي عمق سيادتك!! اه ولازم الشيكولاته تكون Dark...لو شيكولاته ببندق او زبيب او كده...لااا....انت جديد في العمق ولا ايه؟! متجيش هنا تاني!!! وطبعا عندنا مسابقة انا قريت الكتاب (كلمة رواية سطحية وساذجة شوية فلازم يقولوا كتاب علشان يضخم الحدث) في كام ساعة! طيب يعنى هايحصل ايه لو قريتها في اسبوع؟ لاااا...انت كده مش مدمن قراءة! الانسان العميق مدمن القراءة اللى بيحب رائحة الورق والقهوة اللى بتجيب قرحة في المعدة والشيكولاته اللى بتجيب غثيان واللى بيخلصوا "الكتاب" في نفس اليوم ولازم تكون ساعات الليل مش النهار ويخلص الكتاب وهو بيترنح من التعب ويحط صورة الكتاب على الفيسبوك قبل ما يغم عليه ويكتب خلصها في كام ساعة من كتر جمالها!! امال لو حضرتك اللى كتبتها كنت عملت ايه؟ علقت لنا المشانق؟!!! 

والنموذج التانى اللى بيستفزني برضه...بتوع الغموض...يكتبوا "حسبي الله ونعم الوكيل" ويختفوا من على وجه الارض...وتلاقي طابور ناس بتسئل في ايه؟ خير؟ طمنيني!...وهيا ولا بترد ولا بتعبر حد...هيا عبرت عن حسرتها وخلاص! اولعوا بقى انتوا!! وزي جملة "منكم لله"....او "ان لله وان اليه لراجعون" ويكون اللى اتوفى ممثل مغمور! الناس دي حلها التجاهل برضه (انظر نوع امين الشرطة اسم الله) هما قرايب!

ومش ممكن نهمل حبايبنا بتوع "الهلع"....صور مخطوفين...صور برتقاله فيها  بقعة حمرا ومحقونة ايدز (!!) وصور ناس في مواصلات عامة او في الشارع متاخدة من كاميرات المراقبة وبيقولوا ان دول بيخطفوا....ارقام عربيات بتخطف الناس لغرض تجارة الاعضاء....شلة بنات ماشية في وسط البلد شموا ريحة غريبة وطلعت فورمالين (ده فيلم كارتون بقى)...وبتوع الحوادث والازمات الصحية ولما يجيلك ازمة قلبية تعمل ايه ولو حد من عيالك جاله حمى شوكية تتصرفي ازاي...الامراض المختلفة واعراضها (اللى لو ركزت هاتلاقي نفسك مريض بيهم كلهم)....وايه اللى بيعمل اختناق للاطفال...وافكار النصب والاحتيال والخطف...الخ. 

وعندنا حبايبنا الحلوين بتوع "بالحب"...بتوع الطاقة....ان الطاقة الايجابية في البيت هي الاساس...وان الطاقة السلبية هي سبب الامراض كلها...والورد المجفف بيجيب طاقة سلبية....البخور بتاع الايجابية ده....الياسمين والفل...واليوجا (لو عرفت)...الالوان الفاتحة احلى...المرايات بتعكس السلبية في البيت مفيش داعي منها....الكراكيب سلبيه....الطبيخ بالسمن على الصبح بيجيب سلبية طبعا (كبروا دماغكم منهم)....فانتى لازم من جواكي تحبي نفسك حتى لو المراية بتتف عليكي كل يوم الصبح..اتاكدي ان المراية مش بتحبك واكسريها علشان بتشع سلبية!!...بصوا انا الضغط بيعلى عليا مش قادرة اكمل الفقرة دي...كملوها انتوا!

واخيرا...الناس اللى ضاربين الدنيا طبنجة...اللى تيجي معاهم زي ما تيجي هما متقبلين كل حاجة...تلاقي صفحتهم كلهم مرح وهلس وضحك ومقاطع مضحكة وهزار مع اصحابهم ومعارفهم....ملهمش في النكد والغم...رغم ان ممكن تكون حياتهم فيها مشاكل بس مش هاتبقى العيشة والافتراضي كمان نكد! انا بحب دول اوي...واحب اخرج معاهم كمان لان غالبا ده بيكون اسلوب حياة.

وجعت دماغكم :)

ريم اسامة

جروب المدونة على الفيسبوك: https://www.facebook.com/groups/329904227056535/

هاريح نص

جملة الرجال الشهيرة: "هاريح نص"

جملة كريهة جدا...اصل نص ساعة ايه دي اللى الواحد هايرتاحها؟؟ انا باخد نص ساعة علشان ادخل في النوم اصلا (ده لو انا تعبانة) ده على ما اعدل المخدة..واشوف انهي جنب هارتاح فيه اكتر...وعلى ما اعمل مسح سريع في مخي ان كنت صليت اخر صلاة ولا لا (على اساس ان ده نوم الضهر يعنى مش اخر اليوم) وعلى مفاتيح الغاز واكباس الكهربا وفيشة المكنسة شيلتها من الكوبس ولا لأ والغسالة قربت تخلص ولا لسه...وان كان في مياة في متناول العيال ولا شيلتها...والبلكونة مقفولة كويس وباب الشقة مقفول بالمفتاح ومفتاح جرس الباب مقفول (العيال فضولية اوي اصلها لو رن الجرس هاتجري على الباب ويبدأوا مهرجان "ميييين؟") واتعدل تانى اشرب مياة واحط كريم (اهه محاولات فاشلة بعد ماتش المواعين)....يادووووب نص ساعة علشان اطمئن انى اغمض عيني. فالراجل هايدخل ويعمل كل المسح الذهني (على افتراض انهم بيعملوه اصلا) وينام ويصحى ويرتاح في نص ساعة؟!!

السر بقى انها خدعة! اه فعلا خدعة صدقوني..هوا قال نص...بس مقالش نص ايه! للمعرفة بس هما يقصدوا نص يوم!!! بذمتك عمره دخل يريح النص دي وطلع قبل ساعتين تلاته؟؟ ويصحى عينه مقفلة ومنفخة وشعره منكوش وصوته محشرج ولازم يقول "مصحتنيش ليه؟"...نصحى جثة؟؟؟ ده الجيران قربوا يطلبوا البوليس من الدوشة وهوا لسه نايم! ولما يصحى ويلاقي دوشة يشتكى انه مانمش كويس! مع ان عينه "مبقللة" من كتر النوم...ويقعد كمان نص كده يفوًق من الترييح.

الحوار ده كل يوم!! وفي الويك اند مرتين في اليوم (ماهو مبرمج مخه انه مش بيرتاح كفاية طول الاسبوع) نص واحدة في اليوم لا تكفي!

بسبب الجملة دي في خروجات اتلغت..زيارات اتأجلت...مشاوير رحتيها لوحدك...عيال اتربت وكبرت ودخلت ثانوي...عمر بيجري والنص لسه مخلصتش!! (لا تخرج قبل ان تقول سبحان الله)

تعالي انتى بقى هنا...وريني النص بتاعتك فين؟ ده احنا لما بندخل الحمام ونطول شوية بنحس بالذنب اننا سايبين دورنا في نباطجية البيت! ده لو جالك تليفون بتروحي تتكلمي في اوضة ضلمة علشان محدش من العيال ييجي وراكي (وبييجوا برضه بس بعد 4 دقائق مثلا). 

انتى بتنامي الضهر؟ انتى بتريحي نص يوم؟ طيب ربع يوم؟...طيب ربع ساعة تغمضي عينك وسايبة ودانك صاحية لاي مصيبة تحصل في الشقة؟

بصى بقى بيعملوا ايه في الساعتين ونص دي...هوا بيقولك هاريح نص...مقالش انام...التلاعب بالالفاظ يا هانم!! هيا نص ساعة يبص على الفيسبوك ويرد على الواتساب ويتفرج على اي حاجة في اي حتة في المخروب التليفون (ربنا ياخد التليفونات كلها) فتكون النص ساعة "ترييح" خلصت..فينام بقى! فهمتي؟

وعامة الرجالة كلامهم "نص"...نص وارجع اكلمك...نص واكون في البيت...نص واعدي على البقال...هاعدي على القهوة نص....هاروح مشوار "نصًاية" كده...الخ الخ من الانصاص!

زينا كده بس بنقول خمس دقايق...خمس دقايق والغدا يجهز...خمسة هاشوف اللى على النار (وتقعدي ساعة تعملي المواعين على ما الحلة تستوى)...خمسة وارجع اكلمك (دي بتكون خمس ايام)....خمس دقايق واجهز (الراجل بيحمض مكانه وانتى لسه بتجهزي)...خمس دقايق وانزل لك (نفس الراجل اللى بيحمض اهه تانى)...هابص على الفيسبوك خمسة كده (ومبروك علينا الرز الشايط)....احنا برضه نغيظ يعني.
خلاصة الكلام...سيبيه يا ستي ينام ولا يريح...نص او ربع او اسبوع....هوا بيتعب برضه في شغله وانتى مفترية معظم الاوقات :)
enjoy your نص :)

ريم اسامة 
جروب المدونة على الفيسبوك:
https://www.facebook.com/groups/329904227056535/

رسائل الطفولة

بابا سافر سنة بره مصر...سنة واحدة...سابنا كام شهر كده على ما رحنا له. في الكام شهر اللى سابنا في مصر (ماما وانا واختى) تزامن معهم رمضان والعيد الصغير وعيد الام والترم الدراسي التانى. في الفترة دي بابا كان بيبعت لنا جوابات كل اسبوع. مكنش في بقى ايميل وموبايل وواتساب والحركات دي...هوا جواب كل اسبوع واتصال كل مناسبة. 

واحتفظت بالجوابات دي...ولقيتها في صندوق قديم عندي (كتبت عنه في مقال سابق وكان بعنوان "صندوق في قاع دولابي"). في الفترة دي كان عندي عشر سنين. وقرأت الجوابات كلها طبعا...وحبيت اكتب عنهم لثراءهم ولانهم بمثابة علامات ودلائل على اسلوب عائلتي في التربية وتشكيل شخصيتنا. مكنش في مواقع التربية الحديثة او انتشار التوعية عن التربية النفسية السليمة للاطفال والحاجات الموضة دي. كان في الصح والغلط والحرام والحلال والفطرة. 

اولا في كل الجوابات بابا كان بيكتب اسمي كتير (ريم)...يعنى مثلا ازيك يا ريم اخبارك ايه...مش ازيك وخلاص. وكان استخدام الاسم فيه كتير اوي من الخصوصية والاهتمام (قاعدة عامة لو عايز حد يحس انك بتهتم بيه في الكلام قول اسمه كذا مرة وانت بتكلمه) وكان بيسئلني عن المذاكرة والصلاة وخلافه بس مش بأسلوب (بتذاكري كويس ولا لأ)...كان في كل جواباته كاتب "انا عارف انك بتذاكري ومقدرة المسئولية لوحدك"...كان عندي عشر سنين!! عشرة بس..كان مفهمنا معنى المسئولية وبيتعامل معنا على الاساس ده. وفي جواب منهم فهمت انى كنت كاتبة له انى متضايقة انى خدت درس رياضيات (بابا ظابط مهندس وكان بيذاكر لنا الرياضة والعلوم) وكاتب لي انه مش متضايق طبعا وانه "فرحان" انى عرفت اقرر انى محتاجة درس. بجد الجملة دي وقفت عندها كتير. وافتكرت مواقف كتير جداااااااااااااا في حياتي كان دايما يقولي نفس الكلام تقريبا...ان اهم حاجة في حياة الانسان انه يصبح قادر على اتخاذ القرار وتحمل عواقبه وتبعاته. وفي كل واحد منهم كان بيكتب الورقة وش وضهر...كلها...بيحكي لي عن البلد اللى هوا فيها...او يفكرني بحاجة كنا بنعملها مع بعض او جملة كنا بنقولها دايما في مناسبة معينة...وكان بيقولي في النص حاجات تضحك برضه....كأننا قاعدين مع بعض! الجوابات كلها تنبض بحب الاب لبنته...من غير ما يقول ولا مرة انى وحشته او انه بيحبني...مكنتش محتاجة خالص الكلام ده...متعودتش انه يقولي "انا بحبك اوي" بس على يقين كامل اننا اهم حاجة في حياته....من واحنا اطفال انا عارفة انه بيحبنا اوي اوي...ومفتكرش ولا مرة انه قالنا لفظا انه بيحبنا...وحاليا لما بقى عندي اطفال شايفة انها معادلة صعبة....ازاي اقنعهم بحبي من غير حتى ما اشير لحبي ليهم لفظا؟!
طول عمري خطي في العربي وحش اوي...وكان بيذكر دايما "خطك وحش لسه" بطريقة مضحكة...وانه المرة اللى جاية عايز يشوف خط احلى وقالي على ملاحظات في كتابتي لبعض الحروف...وكان في جواب تاني كتب لي فيه "لاحظت ان خطك احسن كتير...برافو عليكي"....انا متاكده انه لا اتحسن ولا حاجة بس بيشجعنى انى فعلا بجد احاول احسنه (للاسف لحد دلوقتي برضه بشع لا يمكن قراءته مهما حاولت او كتبت ببطيء)
لما قربنا على عيد الام كتب لي "جبتي هدية ايه لماما"...مسئلنيش جبتي ولا لأ....لانه شيئ طبيعي انى لازم هاجيب طبعا. سألني بس جبت ايه كنوع من المشاركة.ولما قرب العيد الصغير...قالي "طبعا هاتروحي الصلاة مع عمو نبيل (زوج عمتي) وبناته واختك" ...وقالي مفيش مذاكرة في العيد، العيد للانبساط وبس...مفيش اسئله...كلها ثوابت...هاروح الصلاة...هاجيب هدية...هاذاكر ايام الاسبوع...مش هاتعب امى....مش هاسيب الواجب...مش هاذاكر في العيد....مفيش اختيار في الاساسيات دي. وكلها من غير ما يأمرني. كان بيحسسني انى مسئولة عن افعالي ويبث فيا ثقة رهيبة انى اقدر اعمل كل ده ولازم اعمله.
وفي اخر كل جواب كان بيوصيني بحد....بماما...باختي...ببنات عمتي (كانوا ساكنين في الشقة اللى قدامنا)...ويقولي قربنا نروح له ويوصف لي اوضتي والبيت. وكان بيسألنا عايزين هدية ايه لنجاحنا....وكتب ان اختى طلبت كاميرا وساعتها وعدها بيها  لو طلعت من الاوائل (وفعلا طلعت الاولى وكانت في سنة تالتة ابتدائي) وانا مش فاكرة طلبت ايه بس هيا اكيد جت لي. 
الجوابات حاليا بالنسبة لي مهمة اوي...نور على طريق تربيتي لاولادي...عمري ما اوعد بحاجة واخلف....ازرع فيهم ثقة كبيرة بنفسهم....احسسهم انهم على قدر كبير من الالتزام (حتى لو مكانوش اوي كده)...ازرع فيهم شعور انى يثق فيهم وفي اختياراتهم....لازم اعودهم على اتخاذ القرار وتحمل عواقبه...المجاملات الاجتماعية....الالتزام الديني والفروض...اقنعهم انهم مهمين بالنسبة لي ورأيهم له نفس الاهمية كرأيي بالظبط...وقت الراحة مهم زي وقت المذاكرة. واهم من كل ده ان في علاقة خاصة بكل واحد فيهم...كان ممكن يكتب لي سطرين في جوابه لماما...او يقولها اي حاجة تقولها لي...بس هو اهتم بينا اوي وكان بيكتب لكل واحدة فينا جواب كبير خاص بيها.
عشت احلى طفولة...يا ريت اولادي لما يكبروا يفتكروا طفولتهم ويدعوا لي...زي ما بدعي لبابا وماما على احلى فترة في حياتي.
ربنا يخليكم لنا ويبارك لنا في عمركم:)

ريم اسامة

جروب المدونة على الفيسبوك: https://www.facebook.com/groups/329904227056535/

طموحى اكبر من الكفتة

في جملة منتشرة اوي بقالها فترة كده...وبتتقال من البنات...بيقولوا "انا طموحي اكبر من انى انقع فرخة من بالليل لغدا تاني يوم". متفهميش ايه العلاقة!! يا ستي برافو عليكي...دائما في تقدم!! مالك بقى ومال اللى بينقعوا الفراخ؟ هيا الست الوالدة مش بتنقعها ولا بتاكلوها مجمدة "بريشها يا عبعال"؟؟

واحنا بقى نشوف البوست ده ونمصمص شفايفنا في صمت....ونفتكر ايام الجامعة والطموحات الجامحة والامال العريضة والكورسات واللغات والحركات دي كلها. المشكلة انك بتكونى فعلا بتشتغلي وتشوفي البوست تضايقي برضه :) طيب متضايقة ليه يا عديلة؟ ما انتى بتشتغلي...وبتنقعي فراخ برضه عادي يعنى :) 

المشكلة ان الصنف ده بيكون غالبا في الكلية لسه متعرفش حاجة عن الشغل...هيا متخيلة انها هاتتخرج تشتغل مدير عام مراجيح مولد النبي قسم "طوحيني يا ليمونة"...ولما تقبض هاتاخد معاها كيس السوبر ماركت تقبض فيه فلوس كتير! يا بنتي فوقي من الوهم ده...انتى لو لقيتي تدريب في شركة ببلاش احمدي ربنا...وفي بوست لسه شايفاه (واللى استفزني اكتب المقال ده) لمزمازيل كاتبة "انا طموحي اركب بي ام والف العالم واجيب هدوم غالية مش اتجوز وانقع فرخة من بالليل لغدا تانى يوم"...طيب كويس جدا...بتغيظي مين بالكلام يعنى؟ ما تركبي ولا تسافري ولا تنطي من بلكونة بيتكم...مش هانحس بيكي! وبعدين مش لما يبقى عندك البي ام ولا يطلع لك حتى تأشيرة عمرة تبقى تتكلمي! ده انتى لسه بتاخدي المصروف ومحتارة تجيبي بيه روج ولا مانيكير!! 

وطموح ايه يا بتاعة الطموح؟ ما انتى لو فعلا عندك طموح تشتغلي في صمت...مش عاملة لنا فرح وبتتريقي على الستات الغلابة...وبعدين مش عايزة تتجوزي...احسن ريحتينا....الجواز للجدعان على فكرة بقى...الست تبقى وتد كده...صامدة لكل حاجة..وده بيشمل غباوة العيال...تسلط حماتها...تحكمات جوزها....تناحة جيرانها....قرف مديرها في الشغل....حقد زميلاتها....بجاحة زمايلها...جبل ما يهزك ريح! مش تقولي لي تنفع فرخة! الست دي ممكن تنقع العيال ساعتين مايتحركوش من مكانهم علشان العيد مش الفراخ بس! يا ريتك زي الست اللى بتقرر تتجوز...لان بعد كام سنة بيجي لها مناعة من كل المشاكل والاهوال...يعدي عليها اي حاجة...هيا صامدة علشان البيت لازم يفضل قائم...وتيجي انتى يا تافهة تتريقي عليها!!! (مش عارفة مصمصة الشفايف بتتكتب ازي بس تخيلوها معايا كده مسسشيييممم)

وتعالي هنا....ايه نقع الفراخ ده صحيح....الفراخ مش بتتنقع اصلا! انتى تطلعي الفرخة تحطيها في طبق او صينية وهيا هاتفك لوحدها...لا يكون المياة اللى نازلة من الفرخة دي اللى تقصديها؟!!!!!!! 

عامة احنا في بلادنا اتعودنا على الرغي الكتير...الدور والباقي على الهانم اللى قاعدة مستنية الفرخة فعلا تسيح علشان تعمل الغدا وبتزعل لما بتشوف الكلمتين دول!! في ايه يا عديلة؟ عادي...تلاقي امها طالبة منها تنفض الشيش وهيا خايفة شعرها يبوظ بعد ما عملته ب25 جنيه بحالهم من مصروفها عند مسيو عبده بوستيج! عادي!! انتى اكبر واعمق من كده...انتى المفروض تضحكي عليها لانها جاهلة...ايوة جاهلة طبعا...لانها متعرفش ان اللحمة المفرومة كمان لازم تسيح علشان تتصبًع الكفتة!!! انتى بقى اضربي ضربة مضادة...اكتبي "انا حياتي اعمق من انى اسيح لحمة علشان اصبع كفتة"...شايفة العمق؟؟ هوا ده.

ستات هبلة!!!!

ريم اسامة

جروب المدونة على الفيسبوك: 

https://www.facebook.com/groups/329904227056535/

دليلك لخروجة ناجحة

الخروج مع العيال متعب بلا شك...وللاسف ممكن الخروجة تتحول لمأساة. وبالتجربة الحمد لله بقيت اتجنب كتير من مشاكل الخروج مع الاطفال - فقلت اكسب فيكم ثواب :))))))

الخروج يعنى شنط.. شنطة الاطفال مهمة اوي..تقسيمها..شكلها... رص الشنطة. نبدا الاول بشكلها...متكونش غويطة ولا فتحة الشنطة ضيقة. افضل شئ شنطة الضهر (علشان في النادي او المول ترمي الشنطة على ضهرك وخلاص..احنا مش ناقصين ربكة ولخمة)...وغالبا الشنطة دي بتكون بجيب بره او اكثر. اول حاجة فوطة...الفوطة مهمة اوي خصوصا لو في طفل لسه بيلبس بامبر....لو انتى في الربيع او الخريف خدي جاكيت (بس بلاش بالطو او جاكيت مبطن علشان هاتملى الشنطة كلها - خدي سويت شيرت بسوسته) وطقم كامل خارجي وداخلي لكل طفل وبرضه اختاري هدوم مش بتاخد حيز كبير (يعنى بنطلون قماش افضل من الجينز علشان هيا شنطة واحدة بس اللى هاتاخديها) واعملي حسابك تخلي دايما في شنطة العربية جزمة لكل طفل او شبشب او اي حاجة لرجله (متعرفيش ممكن يتجنن وينزل في نافورة ولا حاجة!). 

لازم يكون معاكي وايبس ومناديل عادية (العبوة الكبيرة 550) وكيس بلاستيك وكيس من قواعد التواليت النايلون وبلاستر وزجاجة مياة صغيرة لكل طفل وعلبة فيها اي حاجة تتاكل لو جاعوا فجاة ومفيش مكان تشتري منه اكل (ساندوتش او بسكوت او بقسماط). 

لما تروحي النادي اعملي حسابك يكون معاكي كورة!! ايوة كورة...لانهم لو زهقوا هاينكدوا عليكي اليوم...اهو ترمي لهم الكورة يلعبوا بيها وخلاص. ولو هاتتجمعوا مع ناس بره تعملوا ديش بارتي (dish party) ضروري يكون معاكي اطباق (اطباق غويطة علشان الاطفال معندهمش اي تقدير والاكل هايقع لو في طبق مسطح)...شوك وملاعق وشاليموه (اسمعي منى بس هاتلاقي له لازمه والله) واكياس كاتشب صغيرة (في عيال مش بتاكل غير بالكاتشب) واكتر من كيس بلاستيك فاضي...واعملي حسابك يكون معاكي فكة (علشان لو راح يشتري حاجة وفهم ان معاه فلوس كتير هايتشري كتير ويخرب الدنيا او الراجل هايقوله هات فكة وتحتاسي...اختصري التوتر واعملي حسابك في فكة)...ومهما كان الاكل اللى اتفقتوا تعملوه...اعملي بطاطس محمرة كتير للاطفال...البطاطس المحمرة بتنقذ الموقف خصوصا في وجودهم...مفيش حد مش بيحبها :) هاتضمنى انهم هاياكلوا.

 لازمة الاكياس اللى عمالة اقول عليها....بنتى مؤخرا وقعت في حمام سباحة في حفل عيد ميلاد...فكانت المهمة سهلة الحمد لله ان معايا هدوم كاملة ليها وفوطة وكيس اتحط فيه الهدوم وكيس فيه الجينز (علشان غامق وكان ممكن يبهت على باقي هدومها) وكيس لجزمتها. وفي الخروج الاكياس بتنفع للمناديل والاطباق الورق المستخدمة وخلافه....باسكيت يعنى. 

والافضل لو رايحة النادي تجنبي تماما اي هدوم بيضاء..بهدلة! 

احسن شيء تتعودي تكون في شنطة متحضرة دايما وفي شنطة العربية...فيها غيار كامل وفوطة ومناديل وجزمة لاي ظروف! 
وقبل ما تخرجي اشحني التاب او الاي باد ipad علشان لو قررتي تقعدي في كافيه...ماتنكديش على الناس اللى قاعدة كلها!! يتلهوا فيه وانتى اشربي قهوتك براحتك من غير احراج ولا نظرات قرف من الناس.
لو رايحة بقى حمام السباحة...اول حاجة قبل الفوط كمان...حطي اكل في الشنطة! المياة بتجوع جدا حتى لو اولادك مش بيحبوا ياكلوا. ساندوتشات او بطاطس محمرة (كل طفل علبة علشان ماتوجعيش دماغك) وحاجة مسكرة (كيك او شيكولاته) علشان الطاقة. المرة دي كل طفل ليه شنطة فيها بشكير وفوطة كبيرة وفوطة صغيرة (علشان لو الفوطة وقعت منه في الارض في اوضة تغيير الملابس هاتضطري تنشفيه بالكلينيكس!) وهدوم كاملة طبعا داخلي وخارجي (يفضل شورت مش بنطلون) وبلاش جزمة - خليه يلبس كروكس او شبشب اريح لك...وطقم المياة (مايوه طبعا ونضارة المياة والبونيه او بورد السباحة) وماتنسيش كريم الشمس sunblock. 
لو رايحة زيارة لناس في بيتهم...مناديل ارجوكي...كيس صغير كده في الشنطة بتاعتك ومايطلعش...لو استخدمتوا مناديل لاي سبب حطي المنديل في الشنطة في الكيس في الخباثة كده...مش لازم الطفايات كلها تبقى مليانة مناديل! ولو قدموا لكم عصير شربي العيال بايدك...بلاش السجاد والانترية يشربوا مع اولادك. وبرضه لو الاكل فيه لغوصه اكلي اولادك بايدك مش عيب...العيب انك تسيبي المكان مبقع بعدك! 
لو رايحة لمامتك او حماتك وهاتقعدوا اليوم كله وتروحوا بالليل...تعملي حسابك في شنطة الاولاد يكون فيها كل ما سبق زائد بيجامة وفرشاة اسنان...قبل ما تنزلي من عندهم يغسلوا اسنانهم ويلبسوا هدوم النوم علشان اكيد اكيد هايناموا في العربية.
قاعدة ذهبية لو كنتي في اي مكان...قبل ما تنزلي من البيت وقبل ما تمشي من المكان اللى انتى فيه...دخلي اولادك الحمام! 
خروجة سعيدة ان شاء الله :)

ريم اسامة 

لينك المدونة على الفيسبوك: https://www.facebook.com/groups/329904227056535/