اضطهاد التلاجة

التلاجة في البيت اهم مننا احنا شخصيا! اه والله !! 

من غير تلاجة هانصيع! مش هاعدد فوائد التلاجة ...هاندخل في المتين على طول: ليه الاهانة دي للتلاجة اللى شايلانا وساكتة؟

في بيوت كتير بتعامل اخر رف من التلاجه انه اوضة الكراكيب! خصوصا بقى لو كانت تلاجة كبيرة شوية...اغطس كده وشوف فيها ايه هايجيلك ذهول!! 

نبدأ بباب التلاجة "حمَال القسية"! البيض بياخد جزء من المكان المخصص له والباقي بنحط فيه انصاف ليمون...نصف الليمونة يا حرام يفضل زي اليتيم كده في الباب لحد ما يغمق وينشف و"يألحف" وبرضه محدش بيشيله...المكان المخصص للزجاجات...نصها بس فيه مياة والباقي محشور فيهم اكياس او برطمانات...برطمان مخلل فيه حتة لفت وجزر مهري وبايظ من كتر المياة والملح وطول الزمن! شيكولاتة مفتوحة...برطمان عسل اسود فيه سنتي عسل ومسكر ومتحجر (مستني ست البيت تحطه في مياة سخنة علشان يسيح وبعد كده يترمي برضه في الزبالة علشان طعمه اتغير)..برطمان عسل ابيض سكَر بره واتحط في التلاجة لنفس ست البيت اللى هاتعمل فيه نفس اللى هايتعمل في العسل الاسود (من اربع سنين)...كيس فيه بودرة بيضا (بيتخلف بقى ده نشا ولا شوية دقيق ولا كاستر)...وغالبا الست بتنسى جواه ايه وبتخليه يمكن تفتكر! وادويا..للحكة والاسهال ومضاد حيوي وللحموضة...وكلهم فات تاريح صلاحيتهم بس اصلهم عشرة وحرام نرميهم!
في التلاجة يوجد زجاجات حاجات ساقعة مليانة مياة...وعصير اختراع منزلي وكل العيلة قرفت تشرب منه بس حرام نرميه دي نعمه ربنا...شوية رز بقى حصى خلاص من الركنة...معلقتين فاصوليا كل الناس نفوسها تعففت عنها...حتة تورتة من عيد ميلاد ابتسام...ساندوتش حلاوة الولد مارضيش ياكله في المدرسة وقعد في التلاجة واتحنط...بيضة مسلوقة جنب البيض التانى احتمال حد يغلط وياكلها....ازازة حاجة ساقعة متبقى في قعرها بؤ محدش راضي يقرب له...طبق سلاطة حمض وبعد كده عفَن وبعد كده بقى حفنة تراب! 
كيس في قاع التلاجة فيه حلويات المولد من السنة اللى فاتت...جنبه كيس ياميش رمضان ناشف ومقدد مع شوية بلح بتاع الخشاف ده...وفي الجوار لفة قمر الدين كان عليها تخفيض وهي اصلا قشر برتقال مفروم! 
مش هاتكلم عن الخس الدبلان ولا البقدونس اللى مات ولا الطماطم اللى تحللت وبقت كتلة "مظفلطة" في الكيس! 
في ستات برضه بتشيل توم مفروم وتسيب الغطا مفتوح علشان تعطر التلاجة كلها...وهي نفس الست اللى بتسيب ازايز المياة من غير غطا علشان تلقط الريحة وتسعد العطشان...وهي برضه اللى بتسيب الصلصة في التلاجة مش في الفريزر لحد ما يطلع عليها طبقة بيضا كده وبتعتبرها طبقة عازلة وتشيلها وتكمل باقي البرطمان عادي (هيا فلوس على الارض وخلاص؟)...وفي الصيف الست بتخصص حتة في باب التلاجة للمكياج (علشان الروج بيسيح من الحر والماسكرا اهو ترطب العين!)
ندخل على الضحية المنسية...الفريزر!!! اي حاجة بتتجمد عادي عند الستات....بصل...توم...صلصة...شوية بشاميل زيادة من اخر سبع مرات (شوية اكياس صغيرة مرمية في انحاء الفريزر)....كيس اعشاب (الست بتنسى جواه كسبرة ولا كرفس ولا زعتر اخضر)...بن (اه والله بن...علشان هيا مش عايزة تشربه فتحطه في الفريزر!)...بواقي جاتوه او تورته (حرام اللى بيحصل ده!) تتبيلة بفتيك..تتبيلة سمك مقلي...بواقي لحمة محمرة مربوطة في كيس!! بواقي كبدة اسكندراني محروقة والست مستحرمة ترميها. وغير قوالب التلج اللى مش لاقية حد يسئل عليها وفاضية مفيهاش حاجة...داخلة الفريزر تغير جو مش اكتر! وفي شوية علب لبوس!! حتى لو منتهى الصلاحية "ماهو في الفريزر!! مش بيبوظ". كميات جبارة من العيش المكسر في اكياس ملهاش عدد "يمكن تنفع في الفتة!"...عيش فينو معضعض وملوش شكل "هايتحمص ويتعمل بقسماط ناعم"...اكياس خلطة محشي...وعضم علشان الشوربة(!!)...كيس ليًة خروف (!!!!)...نص فطيرة...علب شوربة ...كيلو سبانخ مطبوخة ومحدش رضى يجي على نفسه وياكلها...حتة خميرة من الفرن (انتحرت خلاص بقت حتة طوبة مش بتشتغل في العجين)...كيس فيه قشر برتقال علشان لو عملت كيكة بالبرتقال! 
اي مصيبة بتتحدف في التلاجة...في ناس ضروري تفهم ان دي مش تلاجة موتى...دي تلاجة الاكل!! والاكل السليم مش اي اكل يترمي فيها لحد ما يبان له صاحب!! 
هوا يعنى علشان ملهاش اهل يسئلوا عنها...نعمل فيها كده؟
اتقوا ربنا في التلاجة يا جدعان حرام عليكوا! 

ريم اسامة
جروب المدونة على الفيسبوك :
https://www.facebook.com/groups/329904227056535/

يوم الخميس

يوم الخميس يوم مميز اوي - تانى يوم اجازة وناس كتير عندها اليوم اللى بعده كمان اجازة...الخميس واحنا صغيرين كان هدف في حد ذاته...نذاكر علشان الخميس نلعب كتير ومفيش واجبات...يوم الخميس طنط فلانة هاتيجي تزورنا ومعاها اولادها نلعب معاهم...يوم الخميس هانروح نزور تيتة وعماتي واعمامي يكونوا هناك نلعب مع اولادهم...الخميس نسهر ونجيب لب وسودانى ونعمل عشاء مميز...الخميس هو المعنى الصريح للفرحة :)

الواحد بيصحى اليوم ده متفائل كده متفهموش ليه...مع ان برضه في شغل وفي مدرسة...وبنصحى بدري بس بنصحى مبسوطين وفي تفاؤل. الست تجيب فاكهة زيادة او تعمل اكل مميز...او جوزها يقولها بلاش النهاردة تطبخي احنا ناكل بره...والاولاد يرجعوا من المدرسة مفيش مذاكرة ولا واجبات...يتفرجوا على التليفزيون او يطلعوا اللعب يبهدلوا الشقة بيها (وامهم ماتتكلمش ده اليوم المفتوح)...وبتكون مجهزة حلويات وعصاير.

زمان التليفزيون شخصيا كان بيعمل يوم مميز...اليوم المفتوح...افلام قديمة كوميدي...مسرحية بالليل كوميدي ومش سخيفة...طبق اليوم...وتلاقي المذيعات بيضحكوا زيادة عن اللزوم (يوم مفتوح بقى)...وعلى القناة التانية بيجي سهرة اجنبي...برنامج اوسكار...افلام مميزة برضه وكانت كل البيوت بتسهر تتفرج على المسرحية او الفيلم الاجنبي. الام المصرية بتجهز السهرة على حسب الموسم...يعنى في الصيف تجهز بطيخ او كنتالوب ( في الفترة دي كان في شمام) ساقع..فراولة بالسكر..تفاح مصري...اطباق جيلي او جيلي على كاستر...تجيب علبة ايس كريم العائليه...تكون عاملة تلج في الفريزر وتجيب ازازة حاجة ساقعة كبيرة...في الشتاء بتكون مجهزة بطاطا...او خساية كبيرة مغسولة ومتصفية في مصفاة (او مش متصفية وننطر كل عود قبل ما ناكله وفي الاخر نلاقي الدنيا غرقت)...وتعمل عصير برتقال او برتقال على جزر...حمص الشام....بليلة سخنة....سحلب...طشط صغنن كده يوستفندي....او هيا تاخد طبق بلاستيك على رجلها وتقشر برتقال بسرة للعيلة كلها وقت الفيلم...او تكون عاملة صينية جلاش بالمكسرات (او السودانى حتى فقط). بس في جميع الاحوال اللب والسودانى ثابتين...وممكن لو العيلة ثرية شوية تجيب مكسرات يتسلوا بيها (بس ده مش بيحصل كتير عندنا). 

غالبا الاطفال بتنام على الكنبة قدام الفيلم او المسرحية اليوم ده...ما الاب والام مش بيقولوا لهم قوموا ناموا...ده خميس مفيهوش نكد.

الخميس المغرب كده العيلة بتتجمع في البيت الكبير...احنا زمان كنا بنروح بيت جدتي الله يرحمها ونقابل اولاد وبنات اعمامى وعماتي وبيكون يوم جميل وبننتظره من الاسبوع للتانى...ودايما كانت جدتي الله يرحمها تعمل كيك :) وساعات اللى عاملة حاجة حلوة في بيتها تجيبها معاها...ولما دخلنا الجامعة كان في موبايلات...كنا نعمل جلسة املاء لنغمات الموبايل :)) كانت زمان بالحروف والارقام نحطهم ورا بعض ونشغلهم تطلع اغنية (محدش هايفهم من الجيل الحالي اللى انا بتكلم عنه). ولو الناس اتجمعوا في بيتنا او بيت عمتي جارتنا كنا نلعب مونوبولي او بنك الحظ...او نلعب اتاري ونعمل دورة river raid...او دورة ملاكمة...وكان الكبار كمان بيشتركوا معانا فيها. وكان في لعبة بالكوتشينة اسمها "تاتش"..او نلعب "كونكان"...كانت احلى ايام....احلى ايام خميس اقصد طبعا :).

طبعا الرجالة يوم الخميس على القهوة مقدس ومن اساسيات الحياة...يتجمعوا على القهوة وممكن عشا خفيف سوا ودورة دومينو او طاولة.

الهدف من مقال النهاردة حاجة...ناس كتير اوي الدنيا خدتها...وكل الشباب بقت سهرتهم الخميس لوحدهم مع الافتراضي على النت قدام شاشات الكمبيوتر والموبايلات...انا مقتنعة ان هنا بيجي دور الام والاب انهم يجمعوا نفسهم تانى ان شالله يوم في الاسبوع...اتفقوا مع اولادكم يوم الخميس ده يوم العيلة...ممكن يتريقوا عليكم...مش مهم...برضه حافظوا على التجمع الاسبوعي...ده اللى هايخليهم مرتبطين بالبيت لما يكبروا...ده اللى هايخلي عندهم ولاء للعيلة وويتخلد في ذاكرتهم وبالتالي هاينفذوه مع اولادهم في المستقبل.

وكلمة اخيرة لكل الستات...بلاش تنكدي عليه كل خميس الله يكرمك...خليه يا ستي يسهر معاكوا شوية ويكمل مع اصحابه...خليكي ست متسامحة اليوم ده

العيلة هي اساس الحياة...والخميس رمز السعادة :) :)

ريم اسامة

جروب المدونة على الفيسبوك: https://www.facebook.com/groups/329904227056535/

الست دي امى - مبعزقة كرامتنا

الام المصرية دمها خفيف حتى لما بتزعق لعيالها وتهدر كرامتهم برضه دمها خفيف...وكل الامهات لهم نفس الجمل ونفس طريقة التهزئ لعيالها...(المقال مش من خيالي انا استعنت باصدقائي وبعض التعليقات على النت) ومن الجمل المأثورة:

- سيب الزفت اللى في ايدك (على حسب الموقف بقى الزفت ممكن يكون تليفون او كمبيوتر او لعبة او ساندوتش..الخ)

- في اي مناسبة "انا مش عايزة هدية...انا عايزة عيال محترمة ومتربية"

- تاكلوا ايه؟

- تفي على وشي ان فلحتي  (واحيانا على قبري..وفعل مشين غير التف)

- اوضة دي ولا زريبة؟؟ (سبحان الله انا كمان بقول كده - الدم يحن برضه)

- انا اصلي خدامة اللى خلفوكوا !!!

- عفاريت الدنيا بتتنطط في وشي وروحي في مناخيري!!

- انا زمان كنت رفيعة ووسطي زي الكحكة!

- انا اصلي مخلفة بقر! (احيانا بهايم)

- هوا انا لازم اجي اشاور على الحاجة علشان تلاقيها؟؟

- يا فلاااااانة...ولما تروحي لها من اخر الشقة وتسيبي اللي في ايدك تقولك "ناوليني الريموت" (اللى قدامها) :)))

- ربي يا خايبة للغايبة

- انتوا مش بيتمر فيكوا حاجة؟؟ 

- يعنى انتى مش شايفة الورق اللى في الارض؟؟ وكمان بتعدي من فوقيه؟؟ ايه البرود ده! ده انتى بيتك هايبقى معفن!

- بطل تلقط من الاكل قبل الغدا مش هانلاقي حاجة ناكلها 

- مفيش ساندوتش...هو رز وسبانخ لو مش عاجبك ماتاكلش!

- ما هم الصيع اللى انت ملموم عليهم دول السبب!

- وطوا التليفزيون شوية...الجيران عندهم واحد...انتوا طرش؟!

- اللى هايتجوزك امه داعية عليه 

- صحتي خلصت عليكوا

- انا لو بربي حمير كانوا فهموا

- عايز ايه من التلاجه؟

- انتى بتعملي ايه في المطبخ؟؟؟

- هوا انا هاخاف من طرطورك؟؟ (حبيبتي يا ماما) 

- اللى بتعملوه فيا ده هايطلع على حبابي عنيكوا من عيالكوا

- يا رب تخلفي عيالك زيك! 

- البلوزة ضيقة (هاتوسع في الغسيل)..البلوزة واسعة (هاتكش في الغسيل) 

- هاتي لي شبشب الطم بيه !

- اصوت ويقولوا الولية اتجننت؟؟؟

- بكرة لما تخلفي هاتعرفي قيمتي

- مين الهبلة اللى هاترضى بيك دي!!!

- بقينا العصر قوم !!

- الطحالب طلعت عليكي....قومي اتهوي من مكانك

- جتها نيلة اللى عايزة خلف!

- انا مش هاسخن الاكل تانى

- قومى روقي الشقة - انشري الغسيل - اغسلي المواعين...لمي الغسيل وطبقيه

- اللى في سنك فاتحين بيوت وشايلين عيالهم!

- اكل ومرعى وقلة صنعة!!!!

- متكوريش الفوطة كده افرديها هاتكمكم!

- ايه كل الغسيل ده؟؟ حرام عليكوا!

- لما توصلي رني عليا

- حطي الاكل في التلاجة 

- براحتك..اللى بيشيل قربة مخرومة بتخر على دماغه

- انا هاسيب لكم البيت وامشي

- انتوا بتاكلوا في قتة محلولة مش حاسين بحاجة

- اللى عايز حاجة هايعملها...ده في عيال بتذاكر على نور عواميد النور علشان يفلحوا وانتوا فاشلين 

- ادي اخرة الدلع!! تستاهل!

- ماما... - انا مش ام حد...

- ما بدري يا بيه!! 

- انتوا فاكرينها لوكاندة؟

- يا تذاكر يا تقوم تجيب عيش من تحت 

- هاقول لابوكوا لما يجي!

- يقطع ماما وسنين ماما وسنينها السودا!

- بعد ما تحدف شبشب على حد من عيالها تنده له يجيب لها الفردة الطائرة

-امشي من هنا  مشش في ركبك 

- يا ربي انا مخلفة عاهات؟ - واحيانا بهايم - حمير - جاموس - متخلفين!

- لو ماشلتش حاجتك من الارض هارميها في الشارع 

- ما تيجي تاكلني احسن..ما انت لسه واكل!!!

- لما الاكل يتاخر على النار "اولع في نفسي تحت الحلة؟" او "هوا انا النااااار؟؟"

- بطلوا افترا..بكره تتمنوا عيش حاف ماتلاقيهوش

- يخرب بيت الكمبيوتر - الموبايل - السماعات - التليفزيون..الخ

- انت عايز تجيب لي الشلل؟؟

- لما تسئلها احط اي حاجة فين ترد "فوق راسي!"

- ما انا قلت لك...بس كلامي انا مش بيعجب! تستاهل!

بس الام المصرية تدعي على اولادها من ورا قلبها وتكره اللى يقول امين ... بتدعي لاولادها وتنسى تدعي لنفسها...احن واجمل ام في الدنيا كلها

ربنا يخلي لنا امهاتنا و يرحم امواتنا امين 

ريم اسامة

جروب المدونة على الفيسبوك: https://www.facebook.com/groups/329904227056535/

اولهم شماتة واخرهم حسد

والدة صديقتي قالت حكمة...خلفة البنات اولها شماتة واخرها حسد...في مجتمعنا الشرقي (معرفش الغربي كده برضه ولا لا) بس احنا بنفرح اوي اوي بخلفة الاولاد..بنحب الذكور...الراجل لما يعرف ان جاي له ولد ينفش ريشه كده ويحس انه جامد وشديد وقوي...والست لما تعرف انها حامل في ولد تتفرد وتحس انها جابت جون...زمان حصل حالات طلاق كتير جدا بسبب خلفة البنات...الراجل يبقى هايتجنن ويجيب ولد بس مراته بتجيب له بنات...ومع كل طفلة يتخانق مع الست ويزفت عيشتها ويسود حياتها انها مش بتجيب غير بنات وكان بيتجوز عليها والست كانت على اعتقاد راسخ ان العيب فيها وانها مش زي باقي الستات اللى بتخلف ذكور وبيجي دور الحماة في توليع الدنيا وتعرض عليه فكيهة بنت اختها وست ابوها جارتهم واللى معروف عن عيلتهم خلفة الاولاد ابا عن جد (بغض النظر انهم جم بنات في نفس العيلة الكريمة)...ويبدا الراجل في تهديد مراته ان العيل اللى جاي لو طلع بنت هايتجوز عليها....وفي المستويات الاجتماعية المتدنية الست كانت بتروح لشيوخ علشان تعمل اعمال وتفك الحسد وتفك النحس وتزور الاضرحة علشان تجيب ولد علشان كده بيتها هايتخرب....وممكن جدا تيجي برضه بنت وتقع الكارثة والراجل يطلق مراته او يتجوز عليها....وبرضه يخلف بنت!!
ولما العلم اثبت ان الراجل هو اللى بيحدد نوع الجنين الرجالة رفضت الكلام الاهبل ده...مفيش حاجة اسمها كده..الست هي السبب...بس الحمد لله ان رجالة كتير اوي مبقتش بتفكر بالاسلوب ده...بس برضه معظمهم هايموتوا ويخلفوا اولاد مش بنات.
الولد يشد ضهرك ويشيل اسمك - الجملة الاشهر! 
الولد عزوة ويخلد اسمك واسم ابوك...يشيلك ويشيل مراتك ويحفظ اخواته...بس في جملة محدش بيقولها بس هي سبب من اهم اسباب حب خلفة الذكور...وهي الميراث! اللى عنده ولد محدش ياخد منه مليم احمر...الولد يحفظ الاملاك ويحرم باقي العيلة من كل حاجة...وبيحصل حتى الان جرائم قتل بسبب الورث وخلفة الذكور...بس ده مش موضوعنا.
البنت بقى...يا مخلفة البنات يا مخلفة الهم للممات...اكسر للبنت ضلع يطلع لها 24...البنت ضرة امها...البنت لعمتها...اقلب القدرىة على فمها تطلع البنت لامها...الخ من الامثال المحبطة السلبية.
وتعدي الايام والام برضه بتفرق في التربية وفي المعاملة (بحكم عادات المجتمع ان عيب الولد يجيب لنفسه حاجة طالما اخته قاعدة زي البرطة)...لو كان ولد له اخوات بنات فده بيقولوا عليه "فرخة بكشك"...يتعمل له كل حاجة بداية من بؤ المياة نهاية ب طرقعه السمانة! وفي الاخر "حيلتها" يروح يتجوز واحدة يطلع عينها وامه تكمل مشوار النكد على البنت المسكينة علشان "قلب امه" ابنها مش مرتاح زي ما كان مرتاح في حضن الست الوالدة! الست هي اللى بتبوظ الرجالة والله بالدلع والمرقعة الزيادة دي! 
وتمر السنين والاطفال يكبروا والاب والام كمان بيكبروا ولو حد منهم محتاج حاجة او اصابه مرض لا قدر الله...ومحدش يشيلهم غير البنات...اه الولد طبعا بيكون عليه عبئ ولكن بيكون عبئ مادي احيانا او توصيل مشاوير او يجيب طلبات..بس البنت هي اللى بتهتم بهم في كل تفاصيل عيشتهم والحياة اليومية...الاكل والشرب والتنظيف والاهتمام بهم وبتحتضنهم وتحسسهم بالحب والامان...البنت هي الدفئ في البيت...الام مش هاتتكسف تطلب من بنتها حاجة بس ممكن تتحرج تطلب من ابنها خاصة لو كانت حاجة شخصية اوي...البنت قلبها بيكون مزروع في بيت ابوها وامها وبتعتبره بيتها الاول ومستحيل تخلي حد في البيت الاصلي محتاج حاجة منها وتقصر فيها....البنت ونس وحياة....تملى البيت بهجة وتجيب اولادها تملى بيهم بيت جدهم وجدتهم...وبالتالي البنت بتكون مصدر حسد...الناس تحسد اهلها على النعمة اللى عندهم وفي بيتهم.
انا مش بتكتب المقال ده علشان اضايق ام الذكور...لا والله...بس لاحظت شماته من واحدة مخلفة اولاد بس في واحدة مخلفة بنات....اتقى الله...دي ارادة ربنا ملكيش اي فضل فيها. 
علشان كده اولهم شماته...واخرهم حسد!

ريم اسامة
جروب المدونة على الفيسبوك: https://www.facebook.com/groups/329904227056535/

بليز!

ناس كتير اوي متخيلين ان لو اتكلموا انجليزي في نص الكلام هما كده متعلمين ومستواهم الاجتماعي عالي واولاد ناس ومحدش زيهم - بس المشكلة كلها لما اللى ملوش فيه يعمل كده! هنا التلوث السمعي في قمة توهجه!

مش عيب ابدا ان الواحد مايعرفش انجليزي - عادي مش حاجة تنقص من شخصيتك او من قيمتك...اللغات كويسة ومهمة بس مش دليل ابدا على عمق الشخصية او المستوى الاجتماعي والمادي ولا ليها علاقة بتقدير المجتمع ليك!

المقال النهاردة مش درس انجليزي بس بجد في حاجات بتفقع المرارة ولازم بقى اقولها معلش استحملوني - للعلم انا اداب انجليزي وبطلت من زماااان اتكلم انجليزي في وسط الكلام....بما ان اصحابي وانا كنا بنتكلم كده فمكنتش متخيلة ان في ازمة او مشكلة او ان الكلمات الانجليزي اللى بنقولها في وسط الجمل ممكن تخلي الحوار كله ملوش معنى لو اللى قدامي مش فاهم شوية الكلمات دي... معلش كنت صغيرة وخيالي ضيق :) المهم بعد ما اشتغلت ولقيت ان بجد محدش فاهم والناس بدأت تحس انى بتنطط عليهم باللغة وانى بتمنظر وحاسة انى اعلى منهم وحاجات كده مش حقيقية...ركزت مع نفسي وفي النهاية بطلت فعلا اقول اي انجليزي خالص...الحياة بقت اسهل وابسط والناس مبقتش متضايقة منى.

لكل اللى بيحشر كلمات اجنبية من اي لغة في النص...شكلك وحش! اه والله شكلك فعلا وحش وبيئة! لما الكل يبقى عارف انك متعرفش حرف انجليزي وتاخد لك كورس ولا تسافر تبع الشغل في اي حتة وترجع تفرض الكلام الغريب ده في النص بيكون منظرك مش ولا بد- الناس كلها في ضهرك بتتريق عليك بالمناسبة...وفي النص لما تقول "عندنا هناك في كندا في كذا وكذا"...عندكوا ؟؟ انتوا مين؟؟

على رأي صديقتي "ام بيبو"...بتقولي مش عيب ابدا الواحد يقول شفاطة...بس فضيحة انه يقول "شالامووه"...مش عيب نقول زبادي خلاط...بس عرة نقول "ميلك تشيك"!! فرق السما من العما بين ال sh  وال ch مش اي شين بيتحط قبلها تاء علشان تبقى انجليزي لكنة امريكي!!! كل واحد عارف نفسه واحب اضيف بس ان ال sh مش بيتنطق قبلها تاء...كده بقى انجليزي لكنة روض الفرج!

 كلمة جزمة مش محرجة...بس صعب اوي كلمة "شوزاه"...هيا الشوز بقت مؤنث في الانجليزي امتى؟ لا وكمان بنأنثها بالعربي :) شعب ملوش كتالوج! مش ضروري نقول "بيك ااااب"...كلمة نص نقل مفيهاش حاجة تكسف!

فرق شاسع بين ال P وال B...عيب اوي نقول habby رمضان! ما تقول اي حاجة!! ايه هابي دي!! ولما تطلب من حد اي حاجة وتقول "blease عايز ..."...بليز؟؟ العصاية تحت يا حبيبي مش فوق!! (بما ان كتير اوي بيميزوا الفرق بين الحرفين ان واحد العصاية فوق والتانى العصاية تحت! سامحنى يا رب)...واللى تصمم  تقول "سانكس" بدل شكرا...يا روحي اسمها thanks مش Sanks!! واللى لا تفقه في الفرنساوي حرف ولا حتى تعرف تقول  الحروف الابجدية وتصمم كل ما حد يشكرها بكلمة مرسي انها تقول "دي ريا" ...هما فرنساوي زي بعض بقى ملناش دعوة!

والحاجة الساقعة...يا تقولي علبة حاجة ساقعة...يا تقولي "كان" حاجة ساقعة...بس كانز دي مجموع مش واحدة على فكرة...واللى بيقول بقى كانزات ده هايروح النار اصلا!

في ستات كتير اوي اوي بينطقوا العكس ...ال b تبقى  p...شوياكة وحركات...زي اكثر الكلمات انتشارا pus ...الاتوبيس يعنى؟؟اسمه bus يا ختي انتى وهيا...وعلى كتب المدرسة pooks...كده هيا رقيقة وبنت ناس !

الامثلة لا نهاية لها بس نقدر نناشد اخواننا اللى لسه داخلين كار الانجليزي جديد...بلاش! مرارتنا لا تحتمل!! وبعدين بلاش احنا...نتفلق عادي...احنا اصلا معظمنا تبع تعليم الصرف الصحي...الجيل اللى جاي فيه شوية امل بلاش نخيبه! كفاية احنا!!!

 

blease كفاية فتي D:

 

ريم اسامة

 

جروب المدونة على الفيسبوك: https://www.facebook.com/groups/329904227056535/?ref=bookmarks

فالانتاين المتجوزين

كلنا يوم عيد الحب بنشارك مع اصحابنا صور محبطة ومضحكة عن اليوم ده ... يوم الفالانتاين...هوا يوم الحبيبة والعيال الصغيرة الورور...احنا كبرنا بقى وحب ايه اللى انت جاي تقول عليه 

بس والله احنا غلط...اليوم ده لكل الاعمار...وبلاش نتمسك اوي بالنكد ونقول اليوم ده حرام! احنا بنحتفل بعيد الام..اشمعنى نيجي على عيد الحب ويبقى كخه؟....انا مش بقول نعمل حاجة فظيعة ونضحك علينا الناس...مش لازم نلبس احمر ونسبل عنينا من اول النهار ونوشوش بعض ونبص لبعض نظرات طويلة سمجة...بس ممكن انتى كزوجة وربة منزل وعندك قرود مش هاتعرفي توديهم في حتة علشان تعملي اي منظر انت وجوزك...اعملي للراجل يوم مميز في البيت..يعنى كنوع من التغيير ارجوكي اقلعي الجلبية القطيفة والبسي حاجة عدلة...اشتري من قبلها لبس حلو للبيت يشوفك مميزة في اليوم ده...مش لازم يفضل فاكر انك ام عياله...انتى شريكته...وممكن برضه متشتكيش من العيال...ورتبي من قبلها يكون في اكل حلو (مش ضروري ابدا شيكولاته وتورته)...الراجل هاينبسط برضه بحلة محشي محترمة مع شوية بفتيك ويتقدموا في اطباق النيش اللى حالفة براس اجدادك ما يطلعوا. رتبي السفرة بشكل فيه شوية اهتمام...اعملي حسابك يكون مع الغدا حاجة تتشرب وحاولي تفتحي اي موضوع مش متعودين تتكلموا فيه.

او اعملي حسابك من قبلها بفترة وحوشي مبلغ صغير كده وهاتي له هديه رمزية يكون محتاجها..بلاش الدباديب والماديليات اللى بقلوب واول حرف من اسمه وامسك وحركات ثانوي دي...احنا دلوقتي عارفين هما محتاجين ايه...يعنى لو كان نفسه في بارفان معين او بلوفر او خلافه...هاينبسط اوي بيه وهايحس انك فعلا مقدراه وبتحسي ايه ناقصه...ممكن تلفيها..بس وحياة عيالك يا شيخه ما تحطي له فيها جليتر (انتى اللى هاتشربي...انتى اللى هاتنضفي الجليتر لما يقع على الارض).

وفي فكرة تانية...اعملي شعرك! اه ارجوكي اعملي شعرك...مش ضروري تقصي وتضربي لون وتعمليه شنيون...روحي الكوافير وانتى غاسلة شعرك في البيت (اهو توفري عشرين جنيه برضه حلوين) واعمليه سيشوار! بيفرق حقيقي...انتى هاتحسي  بفرق برضه.

وبعد الضهر اطلبي منه تنزلوا شوية...اشربوا عصير او لفوا شوية في الشارع...اتمشوا في اي مول او في اي مكان...حسسيه ان اليوم ده بتاعه وانك عايزة تخليه مبسوط...بلاش شكوى...بلاش طلبات...لو قالك نروح لماما وافقي بلاش اعتراض...لو سابك وانتى عاملة كل المهرجان ده ودخل ينام شوية الضهر متزعليش نفسك. هوا اكيد بيحبك بطريقته الخاصة :) عدي اليوم على خير واعلمي بأصلك ونكدي عليه تانى يوم عادي D:

كل سنة وانتوا طيبين ومع بعض على طول

ريم اسامة

جروب المدونة على الفيسبوك: https://www.facebook.com/groups/329904227056535/

الورقة ام صورتين

الورقة ام صورتين - او صك العبودية ... او اللقب المؤدب : قسيمة الجواز !!

ورقة عليها صورتك وصورة المالك وختم ايدك وايده وابوكي ماضي انه موافق !!

وانتى بهبلك تقفي  تتصوري بالختم على صباعك وفاتحة بؤك نص متر في ابتسامة ساذجة مش فاهمة مستنيكي ايه بعد ما لطعتي الختم على الورقة !! 

فكرتنا عن الجواز قبل الورقة حاجة...وبعد الورقة ام صورتين حاجة تانية خالص.

ليه الجواز وحش اوي كده؟ وليه هو امل جميع البنات في نفس الوقت؟ الدبلة...الشبكة...الطارحة البيضا...الرقص...الزغاريط...الفرح واهتمام الناس...البيت الجديد...دي الحاجات اللى بتكون في دماغ كل بنت داخلة على الجواز...والاثبات على الكلام ده هو كمية الهبل اللى بتشتريه بمبالغ كبيرة جدا...انا فاكرة انى كنت شارية كمية شامبو وشاور جيل غبية...تحمي فيل واخواته! 
محدش ابدا بيأهل البنت نفسيا للحياة الحقيقية والواقع الصادم الاليم ومن هنا بيحي الاحباط والاكتئاب....الامهات عايزين يشوفوا بناتهم بالفستان الابيض وعايزين احفاد...بمرور الوقت فكرة "الاحفاد" بتكبر اوي في مخ اي ام وبتكثف كل جهودها وذكائها وعلاقاتها الاجتماعية علشان يكون لها احفاد...مع انها عارفة كويس اوي قد ايه الجواز مهلك ومتعب والامومة مؤلمة خصوصا مع اول طفل...بس هيا مصممة يكون لها احفاد وخلاص!  
ولما يحصل والبنت تتجوز...بتفضل اول فترة من الجواز بتكدب نفسها..."لا مش ممكن يعنى كل يوم كل يوم هاغسل مواعين وحلل وصواني..اكيد هايجي يوم اغسل فيه طبقين بس ولا حاجة!" وتقنع نفسها ان بسلامته هايكون عنده نظر ويحس على دمه ومثلا يغسل طبقه اللى اكل فيه! وبعد كده تحاول تقنع نفسها ان "مش ممكن يعنى كل يوم هاينزل القهوة تلاقيه بس بيشوف حد من اصحابه كان مسافر وعايز يقعد معاه اطول فترة ممكنة علشان هايوحشه"...وبعد كده تحاول تقنع في نفسها ان "مش ممكن يعنى امه هاتتصل بيا كل يوم مرتين تطمن طبخت ايه والمحروس نام الضهر ولا لا وجه امتى من الشغل! "واكيد طبعا مش كل ما حد يجي يبارك لي امه تشرفنا وتأنسنا وتعمل البيت بيتها...اكيد بس اول زيارتين تلاته فرحانة بابنها العريس!!"
"ومش ممكن برضه كل يوم هايجي من الشغل ياكل وينام ويصحى يتفرج على التليفزيون في صمت وينزل القهوة ويرجع يتعشى وينام!! اكيد هايفسحني يعنى!! واكيد مش كل ويك اند يضيع عن مامته ويوديني لامى اليوم التانى وخلاص على كده! اكيد هانسافر ويك اند او نتفسح في مكان مختلف زي ما كان بيوعدني ايام الخطوبة! اكيد!!"
وتتحطم الاحلام حلم ورا اخوه على صخرة الواقع اللى مفيش منه امل والست ترضى بالامر الواقع وتبدا الزهرة في الذبول! ويجي بقى فترة الحمل وقرفه والخلفة وقرفها والطفل الاول بكل معانى الاحباط والفشل والاكتئاب واحساس الهزيمة وحكم المجتمع والعيلة انك ام زبالة وفاشلة وابنك هايموت في ايدك! ولو يا جبانة اشتكيتي انك مكتئبة او محبطة تسمعي الجمل المتعفنة بتاعة "احمدي ربنا غيرك بيتمنى" وانتى مش بتتمنى حاجة وحشة انتى بس بتتمنى ترجعي زي الاول وحياتك ترجع مملة ومنتظمة وخلاص! بس انسي يا حبيبتي....الطبيعي بتاعك هايبقى العشوائية والالغاز. ما انتى مش فاهمة ومش مستوعبة  الكائن الربع متر ده عايز ايه ومش بيعبر عن نفسه غير بالزن والصريخ والعياط وكمان رافض ينام! ما طبيعي تتجنني! وبعدين جوزك عامل عبيط وبيبقى سامع الصريخ والزن ويمثل انه نايم وهى عارفه انه بيستعبط علشان مايشيلش ابنه على ما الست تعمل ببرونة. شعور الست بالذبول والتراب بيتراكم عليها بينعكس على تصرفاتها وقدرة تحملها للتفاهات بتاعة "الشباك ملحوس مش متلمع ليه"!!
بداية كره الست للجواز متزامن مع بداية الامومة...وده من كمية الاستهبال والاستعباط اللى بيمارسه الراجل. ولما الست تشتكي وتطلب منه يساعد شوية يقولها "يعنى عايزانى ارضعه"....ويجي دور المجتمع والجدات ان هما الرجالة كده..."معلش يا حبيبتي الامومة رسالة امال ربنا وعد الامهات بالجنة ليه - ماهو علشان بنتعب...معلش شوية وابنك يكبر وتفرحي بيه!"...بدل ما حماتك تمسك ابنها تديله درس في الرجولة ومعنى "رب المنزل" ومعنى كلمة زوج واب وتفكره بدوره ويخلي في عينه حصوة ملح...لا هيا بتسمع من مرات ابنها من منطلق "بدل ما تنكد على ابني ضنايا"!! في ركن مظلم في قلب بعض الزوجات مخصصاه لحماتها وابنها الحيلة! 
وبعد ما الست تتعود على عدم النوم والطلبات اللا نهائية ورضوخها ان عليها واجبات كتير ولا حقوق لها...بيجي لها الصمت بعيد عنكوا! تشوف البلوى من دول وتسكت...تشوف استبهال جوزها عيني عينك وتسكت...الافندي يشرب اي حاجة ويرمي الكوباية في اي حتة قريبة من ايده حتى لو كان جنب الكنبة على الارض وتشيل وتسكت...يطفي سجايره في قاع الكوبايات علشان مش قادر يا عين امه يمد ايده يطفي في الطفاية وتسكت...يرمي هدومه على الارض او على اي كرسي او على طرف السرير وهيا تضطر تشم باط الهدوم وفرد الشرابات وتغسلهم وتسكت...وتيجي القشة: "انتى مبقتيش زي الاول!! انتى اتغيرتي." وهنا فقط بيطفح البكابورت!! ولما البكابورت يبطل طفح يلوي بوزه اوي ويقولها "انتى شايلة جواكي كل ده!! فين اتفاقنا من الاول ان محدش يشيل جواه حاجة ونتكلم اول باول!! خلاص مفيش مميزات شايفاها فيا!! انتى مشكلتك اقتناعك انك ضحية! اسئلي اصحابك كده ان كان اجوازهم بيرضعوا العيال!!! (برضه الرضاعة اللى مجنناهم دي) ولا عايزاني بقى اسيب شغلي واقعد افصص لك التوم!! ايه المشكلة بروح القهوة...انا برفه عن نفسي بقعدة على رصيف في الشارع! انتى بتعتبري دي خروجه؟؟؟ دي مش خروجة اصلا! هوا انا بعمل حاجة غير الشغل وانتوا؟؟ (الكداب هايروح النار اقسم بالله)...وقبل ما تكلميني بصي لنفسك وشكلك...حاولي تهتمي شوية ما انا مش هافضل مستحمل على طول كده!!"
وبعد ما يخلص البكابورت الخاص به ينزل ويسيبك برضه.
لما يحصل المعجزة وتتغدوا في مطعم انتى بتفضلي تاكلي في الاولاد واكيد حد منهم هايفضل على رجلك وجوزك ياكل براحته ملوش دعوة باولاده علشان ده دور الام و لما حد منهم بيعمل صوت عالي او تصرف غير لائق بالمكان يبص لك علشان انتى تتصرفي...دايما انتى كوبري للاولاد الرجالة مش بتتصرف من نفسها ولو حصل واتصرفت بتعمل كارثة! ...وبتصعبي على نفسك اوى وانتى ماسكة حتة البانيه او البوفتيك في الشوكة تقطمى منها على طول زي الحمار ..ما ايدك التانة مش هاينفع تمسكي بيها السكينة وتاكلي زي الناس! وفي الوقت اللى بين ما تطلبوا الاكل ويجي اللى طلبتوه بيسيبك مع جنة الاطفال ويمسك هوا تليفونه يعيش مع الافتراضي! ولما تعترضي يقولك "ما احنا مش بنعمل حاجة!" - انتى جاحدة على فكرة ما تسيبي الراجل مش كفاية هايطفحك بره!! وبعد مهزلة الغدا ولغوصة العيال وتحاولي بكل الحيل والذكاء الاجتماعي اللى عندك تحلقي عليهم وتخليهم بني ادمين...تخلصوا وتروحوا وتقعدي على الخروجة دي كام اسبوع كده ولا كام شهر! 
الست لما تتعب او تمرض الراجل بيواسيها بشريط مسكن او دوا برد وبرضه مش بيشيل عنها حاجة...ولما يدخل عليها وهيا فسيخة في السرير بس فاتحة عينها يطلب منها تنام!! ولو اتكلمت في التليفون يقولها "الله؟ مش بتقولي تعبانة!!" - الراجل لازم يفهم ان في فرق بين المرض والموت!!!
رجالة كتير اوي مش هايعجبهم المقال...بس في نفس الوقت انا متاكدة ان الستات بتمصمص شفايفها وكل واحدة عندها مليون مثل عن قرف الورقة ام صورتين وعن الواجبات الغبية اللى اتحطت علينا علشان احنا ستات مش رجالة...الراجل دوره يشتغل ويجيب فلوس...والست كمان بتشتغل على فكرة وبتجيب فلوس....بس الجملة الحمضانة بتاعة "انا مطلبتش منك تشتغلي وانتى اللى صممتى" وان دورك كام وربة منزل ملوش علاقة بشغلك والست الشاطرة الذكية اللى متخليش شغلها يأثر على بيتها....جمل غبية ومجتمع ذكوري ورخم...وحتة ورقة ترهن حياتك وشبابك كله مع انسان بيستخسر مجهوده.
ليه ابهاتنا مش بيعملوا كده؟؟ اشمعنى الجيل الجديد بيعذبوا فينا؟؟ 
الورقة ام صورتين...ابهار بلا حدود!!

ريم اسامة 

جروب المدونة على الفيسبوك: https://www.facebook.com/groups/329904227056535/