من ساعة ما وعيت وكبرت بسمع ان الست المصرية نكدية!
واتعودنا نسمع عن اي مشكلة زوجية ان الست السبب....واي حالة طلاق ان الست السبب...واي ست متضايقة "كويس ان جوزها مستحملها"...واي راجل متضايق "اكيد مراته مضايقاه"
لحد ما كبرت وبقيت ست مصرية...نكدية! وبقوا اصحابي كلهم زيي كده...ستات مصريات نكد!
ولكن مع احتكاك الحياة والظروف وخلافه...اقدر اقول ايه سبب النكد وليه المصرية ساكته على الوصف المشين ده ومش بتعمل اي حاجة لمحو السمعة السيئة!
الست المصرية جبل...بجد والله...بتستحمل وتسكت وتكمل...تمرض وتسكت وتكمل....تتبهدل في شغل وبيت وشارع...تسكت...وتكمل!
لحد ما يطفح الكيل...ويكون الطلاق!
ده بكل بساطة...الست بتشيل فوق طاقتها...متربية انها ست وتشيل...الراجل كويس اوي انه يشتغل...كفاية عليه...ولو قدم اكتر من كده يبقى سيد الكل..اكيد مش كل الرجالة كده..ولكن جيلنا احنا معظمه كده!
جيلي...جيل اخر السبعينات والتمانينات....اللى بين سن التلاتين والاربعين....الستات دي اتعلمت كويس...تعرف لغات..."كان" عندهم طموح مختلف خالص عن الواقع الحالي...الجيل ده اللى كسر كل الارقام القياسية في الطلاق والخلع...الجيل اللى اتحمل اكتر من طاقته...ماديا ومعنويا واجتماعيا...بس احنا الجيل اللى قدر يطلب الطلاق عادى...ولما اترفض طلبهم...خلعوا اجوازهم بكل يسر وسهولة وموت الضمير!
المصرية ربنا خلقها حمولة...تتحمل ضيق الحال...وقلة الرزق...تبيع دهبها علشان الحياة تستمر وتعيش كويس...مش مهم دهب...ده شوية معدن في الاخر...المهم معدن الحياة!
في شوية حكم ورثناها من اللى قبلنا...ومنعرفش ليه ماشيين بيها رغم انها بتضايقنا اوي...وهي ان الراجل عنده "ازمة منتصف العمر" والست لازم تتحملها!! ليه ؟؟ ما الست برضه عندها نفس الازمة وعندها سن يأس....عندها تقلبات هرمونية تقلب عمارة بحالها...بس كل ده جميل طالما بعيد عن الراجل!! لا!! فوقي كده!! وهوا ذنبه ايه؟ هانستهبل؟
والراجل؟
الله؟؟ امال يعنى مين يتحمله لو انتى مستحملتيش؟ ده ياما جاب لك...ياما شال...مش كفاية عليه شغله المقرف ومصاريف المدارس (اللى انتى طبعا بتشاركي فيها عادي ...بس ده بره الموضوع )...انتى مراته..انتى البيت...انتى انتى انتى....!!!
كلام كلنا بنسمعهم باستمرار لحد ما بقى من المسلمات...اللى لازم نستحملها ونعيش بيها!
الراجل مش عايز نكد...بس لو مراته اتقلب حالها يومين مثلا يحق له هجر البيت لحد ما ترجع لعقلها!
كتير جدا من اصحابي مطلقات بالمناسبة....وعندهم حق! مفيش واحدة فيهم اتطلقت لاسباب تافهة او دلع منها مثلا...مفيش ست بتهد بيت لاسباب سطحية او تافهة...كلهم وصلوا لمرحلة "اللا تحمل" وقلبوا البيت ورا ضهرهم!
حقيقي في اطفال...وهما شخصيا بيعانوا ماديا جدا (علشان طبعا الافندي مش بيصرف بعد الطلاق! دي حالة عامة بالمناسبة)...لكن كفاية انها اشترت نفسها...وبطلت تيجي على نفسها واعصابها وصحتها...لمجرد ان البيت يستمر! بيت بيمتص كل انسانيتها!
على فكرة دي مش دعوة للطلاق...خالص! هوا بس الكلام جاب بعضه!
الست المصرية نكد علشان بتفكر في كل حاجة...مصاريف البيت..فواتير الكهربا والغاز والمياة... ميعاد قسط المدرسة...فلوس الباص...الولد بيدخل الاوضة بيتكلم كتير في التليفون هوا بيكلم مين؟...البنت سرحانه...الراجل مبوز وعلى طول باصص في التليفون...هاعمل اكل ايه بكرة...موسم الامتحانات....زيارة دكتور الاسنان...الغسالة بتعمل صوت وهيا بتعصر...لازم نغير مساعدين العربية...ميعاد تغيير زيت العربية...ترخيص العربية او الرخصة (بتاعتها او بتاعة جوزها..هيا بتفكر في كله)....الميس الفلانية قالت للولد كذا....ام الولد زميل ابني قالت كذا هيا قصدها ايه...الحلة اتعوجت والغطا مش راكبت عليها كده الاكل مش هايتظبط...مين الحيوان اللى سايب النور ده كله ومش قاعد؟...متبقى كذا من فلوس البيت هاعمل ايه ولسه بدري على اول الشهر...هانصيف السنة دي ولا مش هاينفع؟...عايزة جمعية قريبة واقبضها الاول!...لا مفيش قروض تانية كفاية!!....عيد ميلاد جوزي عايزة اجيب له حاجة تعجبه وينبهىر بيها....ميعاد مجاملة فلانة هاعمل ايه...عيد الام عايزة هدايا لماما وطنط والمدرسات وميس الباص!...الاوكازيون والاولاد محتاجين ضروري هدوم ومفيش فلوس....الفيزا ميعاد سدادها فات وكده اتراكم علينا فوايد...ميعاد القسط....عزومة فلان ومعنديش حاجة كويسة البسها ومش هاينفع اشتري....تجديد النادى...فلان وفلانة مدفعوش الجمعية...الجمعية ناقصة مبلغ هوا راح فين...النهاردة اخر الاسبوع عايزة اعملهم اكلة حلوة بقى...ميعاد تجديد النت...ميعاد تجديد باقات الموبايلات (البيت كله)...رمضان قرب هانجيب ايه ونخزن ايه...العيد والعيدية واللى عايزين يعيديوا!!!!
الست دماغها شغالة وابور طووووول الوقت...بتفكر فيك وفي اولادك وفي والدتك وفي والدتها وفي اخواتكم وفي الجيران وزمايل الشغل وفي كل البشر على وجه البسيطة!!!!!! دي الست المتجوزة...الست المطلقة اضربوا اللى الكلام ده في خمسة مثلا!
المصرية بتشيل جامد....اتولدت علشان تشيل...تشيل مسئوليات...وهموم...وتنظيم بيت وحياة...وبدل ما نشكرها...لا...لو حصل خلل في اي حاجة نبدا في اللوم والتنكيل بها!
هوا مش من حقها تضايق لها شوية؟ تكسل حبة؟ تغلط مثلا؟؟؟ مش من حقها تشيل من عليها حاجة او اتنين من اللى بتفكر فيهم ليل نهار؟ مش ممكن تخفف عنها الضغوط شوية وتقولها عنك انتى المرة دي؟ صعب تقولها فكري في نفسك شوية وبلاش تفكري فينا احنا؟ نشجعها بدل ما نعملها هدف؟ لو غلطت من حقها تسمع "انتى عملتي اللى عليكي" او "يا ستى جلَت منك مرة ما انتى بتظبطي الدنيا كل مرة"
بالراحة علينا...احنا بقينا ستات مش فارق معاها حاجة لدرجة اننا مش بنرد على سمعة "الستات نكد"...مش هاتفرق كتير...بنشوف اللى بيقولها شخص سطحى وغلبان في دماغه...بيصعب علينا...ماهو مش عايش على ارضنا...عايش في دماغه الفاضية اللى من غير هموم ومن غير ارق!
وصلنا لمرحلة "اللى عايز يقول حاجة يقولها"...احنا احسن وافضل وارقى واقوى واشجع واصلب...من اننا نرد على شئ تافه زي كده!
الرجالة اللى بيفضلوا الزواج من الاجنبية...هي فعلا الاجنبية احلى واجمل واشيك...وست مودرن..ومش هاتشيل اللى المصرية بتتحمله اطلاقا!! الحياة عندهم النص بالنص....انت تحط جنيه هيا تحط زيه...بس زي ما هيا بتشيل جزء من البيت ومسئوليات الاولاد...انت كمان هاتشيل غصب عنك مش بمزاجك...ده اللى متجوز مصرية متدلع اخر دلع...ومن كتر الدلع بدا يتنمرد ويتفرعن....وبيشتكى انها متضايقة من الكم العظيم الهائل اللا نهائي من المسئوليات والهموم!! اتقى ربنا يا اخى!!
الست المصرية جبل وسكن وبيت ودفئ...المصرية جميلة وطيبة وقلبها كبير...العيشة معاها حياة...والبعد عنها قحط!
الست المصرية...ريم اسامة
