قبل ما ابدا في الموضوع - يا جماعة انا بكتب انعكاسات المجتمع من حولي - مش بكتب عن حياتي انا الشخصية !! والموضوع اللى جاي فعلا ملوش علاقة بحياتى :) ارجوكوا كفاية رسايل مواساه :)))))
المرة دي الموضوع حساس شويتين - ولقيته عند كتير من الستات وهو : بخل اهل الزوج!!
ممكن مايكونوش بخلاء اصلا ولكن بيمسكوا ايدهم اووووي على ابنهم لما يتجوز.
يعنى بيكونوا شايفين ان مراته دي "لاهفة" خيره كله ومش هايدوله زيادة يفكوا زنقته علشان مراته هيا السبب. او ممكن يكونوا شايفين ان ابنهم كان ممكن يتجوز واحدة احسن من (وش الفقر) اللى اختارها!
لو الست عندها ولد وبنت والاتنين متجوزين هاتلاقوا ايدها "فرطة" اوي مع بنتها وماتديش حاجة ابدا لابنها! مع انهم اولادها ولكنها مش بتحب ابدا تدي حاجة لمراته - وفي نقط تؤخذ في الاعتبار :
- مراته خدت ابنها منها (ما علينا)
- مراته شافطة المرتب كله ليها (بتشيل من بالها طبعا ان مراته برضه بتشتغل وبتصرف معاه على البيت)
- ان مراته مشيلاه الهم والغم وعلى طول مخلياه حاسس بالزنقة والفقر (ماهو مرتبه مش كبير وحتى لو كبير ما كل حاجة بتغلى)
- مش هاتدي ابنها حاجة علشان بكده مراته هاتتعود تاخد فلوسه وفلوسهم!!
- لو هيا ست شاطرة كانت تدبر حالها مهما كان حال جوزها (تعمل ايه تانى مرات الابن اكتر من انها ساعات بتعدي الشهور العصيبة من غير ما تشتري لحوم مثلا وبتعتمد ان اولادها بياكلوها في الحضانة؟)
- لما اهل الزوج يساعدوا ابنهم بيدولوا حاجات عينية - يعنى مثلا فرخة..كيس لحمة...كام كيس مكرونة على ازازة زيت. انما فلوس كاش في ايده neverrrrr
- الحما لو شافت مرات ابنها لابسة بلوزة جديدة ولا حد من العيال لابس جزمة جديدة على طول بيجي في بالها "ما انتوا بتصرفوا بالهبل على اللبس اهه - بتشتكوا ليه بقى؟"
اهل الزوج بيجوزوا ابنهم باقل التكاليف في معظم الاحيان. عادي يعنى لما يتجوز من غير شوية اجهزة من بتوع المطبخ...في اعتقادهم ان الاجهزة اللى على العريس هي: البوتاجاز والتلاجة والغسالة وسخان وتليفزيون! (اصغر بوتاجاز فيكي يا مصر مع تلاجة 14قدم وغسالة رخيصة مصري وسخان صغير وتليفزيون حجمه نص الاوضة وابو من غير ماركة!) انما بقى المكنسة والفلتر اللى فوق البوتاجاز والتكييف والمراوح والدفاية والمايكروويف والشواية والخلاط والكيتشن ماشين والتليفزيون الLCD ومضرب البيض الكهربا...كل ده رفاهية ولو الزوجة (روح مامي) نفسها فيها يبقى تشخشخ جيبها ولا جيب ابوها وتجيبها!!
كتير جداااا اهل الزوج بيطنشوا فستان الفرح! ايوة يا جماعة فستان الفرح على العريس! واهل العروسة مش بيتكلموا في الحاجات الصغيرة دي علشان مايتقلش عليهم جاعنين او معفنين واهل الزوج بيطنشوا يجيبوه لان "هيا اللى هاتلبسه مش ابننا!!"
عادي برضه ان اهل الزوج يرفضوا يجيبوا شبكة فيها فصوص! ليه؟ علشان ابنهم مايخسرش فيها لو اتباعت (!!!!) - والله العظيم الكلام ده حقيقي مش من وحي خيالي!
في الجهاز اهل الزوج بيتعرفوا ب"اوضة نوم - اوضة سفرة - الصالون" فقط!! طبعا اللى قلته ده بيجي بالنص مش لوحدهم بيشيلوه! ملهمش دعوة بقى بحاجة اسمها living ولا حاجة اسمها اوضة الاطفال ولا حاجة اسمها مكتبة او دولاب زيادة - وبرضه ملهمش دعوة ان الست عايزة تعمل دولاب في الحمام او تقفل تحت الحوض في الحمام على النظام الاجنبي!!! اللى عايز حاجة يعملها بنفسه!! احنا بنعمل المتعارف عليه - احنا مش قاعدين على تل فلوس!!
برضه ملهمش دعوة لو الست عايزة تقفل البلكونة الوميتال مثلا!!
اهل الزوج بيستخسروا اي حاجة في مرات ابنهم - وبعدين مش بيعملوا اي حاجة زيادة في بيت الولد علشان من المعروف "البيت بيت الست مش بيت الراجل" - يعنى حلو اوي تكون الشقة باسمه والباقي تتصرف فيه هيا!!!
برضه ملهمش دعوة خااااالص هايتصرف ازاي في فلوس شهر العسل! (يروحوا يومين في اي حتة في اسكندرية وخلاص - لازم يعنى المنظرة؟)
في رمضان مش بيجيبوا حاجة لبيت ابنهم - اهل البنت بيجيبوا علشان مناسبة سعيدة ويساعدوا الشباب اللى مش عارف يمشي حاله في البلد الغالية دي!! وبيصعب عليهم بنتهم بعد ما كانت عايشة في النعيم انها تختصر حتى في الشهر ده
في العيد مش بيجيبوا حاجة للاطفال - بيدوا عيدية كفاية - اهل الزوجة بيدوا هدايا ويكونوا جايبين حاجات حلوة للاطفال ومش بعيد يكونوا جايبين لهم طقم زيادة لتانى يوم العيد هدية
اهل الزوج في العيد الكبير بيعزموا ابنهم ومراته على الغدا - لكن مايخدوش حاجة من الخروف البيت!
اهل الزوج لما ابنهم بيكون في مشكلة مادية حقيقية بيسلفوه الفلوس (ويردها في اول فرصة) - اهل الزوجة "بيمنحوها" الفلوس - كادوه يعنى - مساهمة منهم في حل المشكلة (وغاااالبا مش بتترد الفلوس تانى ابدا)
اهل الزوج شايفين ان مراته بتقبض على قلبها قد كده وبتحوش من وراه! مع انها غلبانة بتحط كل فلوسها في البيت وبتجيب الهدوم للعيال وبتصرف على الفسح بتاعة اسرتها الصغيرة - مرتب الست بيكون للمسة الرفاهية البسيطة في حياتهم وحياة اولادهم...ولو حوشت فلوس بيكون بعلم جوزها علشان المدارس! مش علشان تجيب عربية 4*4
لو موبايل الراجل اتغير بيكون "يا حبيبي بقاله 4 سنين معاه نفس الموبايل - وبقى قديم وبيهنج كتير" - لو مراته غيرت موبايلها "كل سنة بتليفون جديد ولا ايه؟ ما احنا لو فضلنا ورا الموضة مش هانخلص!" - مع ان تليفونها اقدم من تليفون جوزها!!
اهل الزوج شايفين ان الاكل برة والسفر في نهاية الاسبوع او رحلات اليوم الواحد او السينما والمسرح - مضيعة فلوس "وترجعوا تعيطوا ان الفلوس مش بتكفي"
الحما شايفة ان شنطة سودا وشنطة بيضا وشنطة بنى كفاية اوي في دولاب مرات ابنها - مش لازم درجات الطيف كلها يعنى!!! هوا هايلاحق على ايه ولا ايه!
الحما برضه شايفة ان الهدوم الكتير للعيال مضيعة لفلوس ابنها علشان العيال بتكبر والهدوم بتترمى من غير ما تتلبس
مفيش داعي لاكتر من لابتوب في البيت! كفاية واحد! مفيش داعي للحضانة الغالية ماهي في الاخر حضانة ومش محسوبة من سنين التعليم!! مفيش داعي للخروج الكتير ! مفيش داعي لكل اللعب دي (ما كل اللعب بتتكسر في الاخر او بتروح زهوتها)! مفيش داعي تخرجوا لهم اللعب دي كلها مرة واحدة - شيلوا شوية لحد ما يزهقوا من اللى عندهم وطلعوا من اللى مخبينهم!!
مفيش داعي للعصير الكتير للاطفال - اعملي في البيت ارخص
ولا داعي للبسكوت اللى في التلاجة كل ايام الاسبوع
ولا داعي للكيك كل شوية (بياخد لبن وبيض كتير حرام)
مفيش داعي...نتنفس!!!
كلمة اخيرة: مال الكنزي للنزهي ... والحدق يفهم!
ريم اسامة
No comments:
Post a Comment