هيافة ستات!!

في ناس كده مش بنطيقها لمجرد انهم "ذات صفة" معينة!

بمعنى: اخت الزوج - الحماة!

مجرد انها اخت جوزك او حماتك فانت بدون مقدمات شايلة منها! الحقيقة في ناس فعلا لازم يتشال منهم - ولازم اصلا يتشال راسهم من على جسمهم من اللى بيعملوه في مرات الابن! 

تعالوا نتناول الموضوع من جميع الاطراف:

اولا: ام الزوج واخته!

من غير ما مرات الابن تعمل حاجة هيا سايقة جوزها وممشياه على مزاجها وعلى عجين مايلخبطوش!  الست الكبيرة شايفة ان ابنها هفأ وبريالة وحمار انه بيسمع كلام مراته وهيا برضه شايفة انه بيسمع كلامها من غير تفكير! "تقوله شي بيشي على طول" (شي يا حمار يعنى) واخته شايفه ان مرات اخوها دي مسهوكة ومايصة وبتعمل حركات قرعة علشان تخليه تحت طوعها وخلاص و"انا مش بيدخل عليا حركات البنات دي - انا فاهماها كويس !" وطبعا بما انها هيا ومرات اخوها في نفس السن تقريبا بيخليها متخيلة انها فاقساها!! 

الام شايفة ان خير ابنها رايح على الهانم مراته اللى بتحب الفشخرة ومش عامل حساب للزمن ومش بيشيل قرش لبكره! اخته شايفه انه بطل يجيب هدايا عليها القيمة في عيد الام وفي الاعياد الميلاد من ساعة ما خد "اللى ما تتسمى".

الام شايفة ان ابنها وقع على بوزه واتخدع فيهم! اخته شايفهم انه ما صدق حد يقوله كلمة حلوة "ماهو اهبل طول عمره! يا ما نصحته مايتسرعش!"

الام: قلبي على ولدي انفطر وقلب ولدي عليا حجر! - لما تكون عايزاه في مشوار حتى لو هايف مثلا وقالها خليه بكره علشان مشغول شوية ومرتبط بمواعيد!

الاخت: انا مش فاهمة شبكة بعشرين الف جنيه ليه؟؟؟؟ حوش الجمال والحلاوة!! دي امها كانت مخطوبة بحزمة بصل!! انا مش فاهمة انتوا وافقتوا على المبلغ ده ليه! ويقولوا لك "احنا بنشتري راجل!!" - اسمها احنا بنبيع لمغفل!! لازمته ايه الفرح اللى باربعين الف وشبكة بعشرين الف وكمان ندفع مهر خمسين الف!!! فوق ال100 الف جنيه علشان ياخد "دي!!" - امال لو كانت حلوة شوية ولا شيك ولا حتى غنية كانوا عملوا فينا ايه؟؟؟ بيعونا هدومنا!!
والجوز دول مقتنعين ان مرات الابن بتبعد الاولاد عنهم علشان مايتعودوش عليهم ولو حصل مشكلة بتحرمهم من العيال! لو طفل منهم قال انه مش قادر ياكل مثلا عند جدته على طول يفسروا انها اكلتهم قبل ما ينزلوا علشان ماياكلوش عندنا حاجة!!
ولما العيال تقعد مكانها مايعملوش دوشة - مش بيقولوا انهم عيال متربية وان امهم تعبت معاهم - لا ...بيقولوا انها مفهماهم انهم يتعاملوا زي الاغراب بالظبط ... مش واخدين على المكان! ولو خدوا على المكان وبهدلوا الدنيا هايتقال انها مهملة فيهم!!

دي الاخت والام (مش كلهم علشان مظلمش حد بس في ناس كتير اوووي كده) - طبعا في ستات بتاخد مرات ابنها دي ابنة تانية ليها وتعتبر انها فرد جديد من العيلة - مش انها جاية تقسم العيلة لاسر صغيرة!!

المهم!

الزوجة!!!

الزوجة شايفة ان امه عايزاه ليها لحد دلوقتي حتى بعد ما عدى التلاتين!! مقتنعة انه لسه مش مفطوم! شايفة ان امه المفروض تقدر شوية خصوصيتهم ومش اي وقت تتصل ومش اي وقت تقوله تعالى عايزاك!! انه مش من الضروري ان جوزها يزور امه كتير كده في الاسبوع وملوش اي لازمة تليفون كل يوم بتاع اخته ده!!! عندها اقتناع كامل انهم عايزين يبوظوا حياتها وخلاص!! وانهم بيتعمدوا يحرقوا دمها بحركات قرعة! على يقين انهم بيعرفوا كويس اوي ازاي يضايقوها من غير ما يتمسك عليهم حاجة!! وشبه متاكدة انهم بيقصدوا ينكدوا عليها كل مناسبة سعيدة عندها زي مثلا عيد جوازها او عيد ميلاد حد من العيال او في المصيف او في الويك اند (وده بيحصل فعلا - سبحان الله)! بقت تتشائم من اي حاجة حلوة هاتحصل لانها عارفة انهم هاينكدوا عليها حياتها بانهم يفتعلوا مشكلة ويدخلوا جوزها طرف فيها وبكده الموود بتاعه هايبوظ وهيا مش هاتنبسط!

لو اخت جوزها دي مش متجوزة واكبر منها في السن مثلا كمان هايجيلها شعور غير مبرر انها عايزة تفسد بيتها وتطلقها من جوزها علشان هيا معقدة!!!!! بتحس ان اخت جوزها العن من حماتها لانها صغيرة في السن ولسه عندها طاقة وصبر تخطط وتقرف في الناس! مقتنعة ان اخت جوزها سوسة وبتصمم تدلع اخوها باسم سخيف زي "بسبوسة" علشان تضايقها مخصوص!! وان اخت جوزها بتفتعل المشاكل علشان تجذب اهتمام اخوها بعيد عن مراته! 

الزوجة شايفة انهم ضحكوا عليها في الجوازة! الفرح مكنش قد كده والشبكة تكسف والعفش كان ممكن يبقى اشيك بكتير من كده لو كانوا فكوا كيسهم شوية في عشرة خمستاشر الف كمان!! ما اللى دفع 100 مش هايحصله حاجة لو دفع عشرة كمان "بس نقول ايه بقى في النتانة!" 

نيجي لاخر طرف في العلاقة المريضة دي وهي: الزوج!!

الراجل بيحب امه واخته ومراته وماصدق بقى له بيت وعيال ومستقر مع الست اللى اختار انه يقضي باقي حياته معاها! شايف ان مراته مزوداها اوي وشايلة اهله فوق راسها وخلاص من غير سبب! شايف ان مراته سيئة النية اتجاه امه (بس مش متاكد اوي من موضوع اخته علشان هوا عارف انها ساعات بتضايق مراته عن عمد!)...وبرضه مقتنع ان لو كل واحدة ست من دول شالت التانية من نافوخها وركزت في حياتها ..الكل هايرتاح! وشايف ان كل ده في الاخر: هيافة ستات!!! فمش بيعلق على  اي موقف يحصل وعامل عبيط! عامل انه مش واخد باله اخته بتدلعه باسم بطلت تقوله من الابتدائيه...وعامل مش واخد باله ان مراته بتجز على اسنانها كل ما تشوف اهله...وعامل مغيب ان امه بتطلبه في اوقات غريبة وبتطلب حاجات اغرب!

الراجل مش فاضي...عنده مستقبل بيبنيه وشغل مركز فيه....دماغه مش فاضية للهيافة دي!!

https://www.facebook.com/groups/329904227056535/
ريم اسامة