خد من التل يختل

خد من التل يختل...مثل قديم وصحيح 

بس غالبا بيتقال على الفلوس....لو محوشة شوية فلوس وايدك جت عليهم حاجة صغيرة في حاجة صغيرة ....المبلغ هايتعفرت ويطير! وده حقيقي ...جربي كده اعملي جمعية مثلا وشيلي الفلوس فترة معاكي من غير ما تعملي بيهم حاجة كبيرة على بعض...هانقول هاتقبضي الف جنيه مثلا....خدي منهم خمسين تخرجي مع اصحابك...خمسين من الف جنيه حاجة صغيرة ....وبعدين وانتى في الطريق عجبك ايشارب ولا شنطة...هاتجيبيهم...وانتى في الكافيه مع اصحابك كنتى عاملة حسابك على قهوة وجاتوه...وريقك جري على الباستا اللى عندهم وطلبتيها (ما انتى معاكي الف جنيه بقى براحتك ولما تقبضي مرتبك هاتسدي اللى خدتيه من فلوس الجمعية)....هاتلاقي على اخر اليوم انك صرفتي ربع المبلغ مثلا! وعلى اخر الاسبوع هاتكونى طيرتي الالف جنيه كلها ومش عارفة الفلوس راحت فين!!

صح؟ 

المهم...انا كلامي النهاردة عن حاجة بعيد عن الفلوس والماديات....كلامى عن "تل" مختلف....شوفي لو انتى كل شوية حد بيقولك "شكلك اتغير اوي انتى مش مهتمة بنفسك ليه"....لو كل فترة جوزك قالك "انتى مش ناوية تخسي؟"...لو كل مناسبة حد قالك "ما انتى عارفة ان في فرح من شهرين ليه مخستيش شوية؟"....هايبقى شعورك ايه؟ اكيد هاتحبطي...ولما تعملي رجيم او حتى فعلا خسيتي شوية قليلين محدش هايحسسك بكده! في الاخر هاتستسلمي انك خلاص فعلا قبيحة وانك بجد فشلة وكرنبة ومعندكيش ارادة! هاتستلمي وترضي بامرك الاليم وخلاص! الناس هاتاخد من تل ثقتك بنفسك وهاتختل في الاخر....وبعد كده هاتخلص وتختفي!

تخيلي لو كل شوية حد قالك "حرام عليكي" ...لو حد قالك "انتى معندكيش قلب؟" لو عملتي اي حاجة مش عاجبة الناس مع عيالك....لو انتى بتروحي شغلك وتسيبي العيال مع دادة في البيت هايتقالك "حرام عليكي انتى معندكيش قلب؟ انتى مش خايفة عليهم؟"....لو اطفالك كبار شوية وبتسبيهم في النادي على ماتخلصي شغل "هايتقالك حرام عليكي انتى خايفة عليهم"...لو سبتيهم في البيت لوحدهم من غير دادة هاتسمعى "انتى مش بتخافي يموتوا بعض من غير ما ياخدوا بالهم؟" لو سبتيهم في البيت لوحدهم وسبتي المفتاح مع جارتك كل شوية تبص عليهم وتطمن هاتسمعي "انتى اعصابك هادية اوي على فكرة وقلبك قاعد مش بتخافي"....لو وديتي العيال الحضانة هاتسمعي "يابنتى حرام عليكي الفلوس الكتير دي ماهم في مدرسة لازمتها ايه الحضانة"...لو سبتيهم عند جدتهم هاتسمعي "حرام عليكي الست كبيرة ماتقدرش على بهدلة العيال دي وطلباتهم ودوشتهم والكركبة اللى بيسيبوها بعديهم"...مش هايتبقى لك حل غير انك تسيبي العيال في الفريزر لحد ما تيجي!!! كل ما حد ياخد من تل امومتك كل ما هايختل توازنك وشعورك نحوهم وفي الاخر خالص هاتلاقي نفسك بتعملي حاجات غريبة علشان ترضيهم وبرضه هايفضل عندك شعور بالذنب ملوش لازمة...في نهاية الامر هاتبقى ام حزينة وهما هايبقوا عيال "واطية" وهايفهموا انك بتعوضيهم حاجة هما مش فاهمينها بس هايعرفوا كويس اوي يستغلوكي!!
لو في كل خناقة او كل مناقشة حاجة مع جوزك سمعك الكلمتين بتوع "انتى اتغيرتي ....انتى مفيش في حياتك غير العيال والاكل...انتى نكدية ...اة اصل بقالك كتير متخانقتيش...عيشتك بقت تقرف....انتى مملة...الواحد المفروض يرتاح في بيته وانا باجي هنا اتنكد ليل نهار...افردي وشك...وطي صوتك شوية ,,,هوا انتى بتودي الفلوس فين؟...الخ" لما ياخد من تل طبيعتك كانثى في الاخر هاتبقى حاجة كده ملهاش شخصية وكائن غريب عليكي ...هاتحاولي ترضيه وهايكون على حسابك اعصابك وبالتأكيد هاتعانى من الاكتئاب في فترة من الفترات!
لما انتى تفضلي تقولي لعيالك "انت غبي....يا حيوان قلنا مليون مرة لا...انت مابتفهمش....انت قرفتني...حرام عليكوا انا طقهت....عيشتكوا سودا....ابو اليوم اللى شفتكوا فيه...اتخمدوا بقى انا تعبت....انت متخلف؟؟...هوا انت بتفهم من المرة الكام؟؟....ده لو كان جحش كان زمانه فهم!...الخ"...متخيلة الطفل اللى شايف امه هيا كل حاجة في حياته تعبانة منه...هايحصله ايه؟ مبدئيا طبعا هايحاول يرضيها لانها امه وبعدين هيا مش هايعجبها برضه لانها فعلا تعبانة ولكن بتطلع غلبها وتعبها في الطفل ومتخيلة انه مش فاهم...بعد كده هايبقى عنيد ويعمل الغلط بمزاجه بما ان الكويس مش عاجبها يبقى خلاص نقرفها بقى! وبعدين في النهاية هايبقى طفل متردد او عنيد مش بيسمع غير دماغه وبس! لما تاخدي من تل ثقته بنفسه هايختل توازنه النفسي! وانا هنا ماجبتش سيرة الضرب المبرح والشبشب اللى بيطير في كل مناسبة!
لما كل شوية تقولي لجوزك "هوا انت بتعملنا ايه؟ ... انت مش فارق معاك حد في الدنيا غير امك...انت مبتعرفش تضحك؟؟....وهيا الفلوس اللى بتديهالي دي فلوس؟!...اطبخي يا جارية كلف يا سيدي!!....الخ" هايحبك زيادة يعنى؟ هايحاول يشيل من عليكي؟ هايحاول يرضيكي؟ هايحاول يحسن من دخله علشانك؟ ولو حسن من دخله هايديكي الفرق ده؟ لو في باله يغير عربيته ومن غير مقدم هايديكي القديمة؟؟ اكيد لا! بالعكس هوا هايفضل قافل وشه ويتخانق معاكي في كل مناسبة وهايسمعك كلام يوجعك عن عمد!
احنا لو بنقدر بعض...لو بنراعي شعور بعض...التل هايبقى جبل...بس احنا ناس بتكره نفسها للاسف!


https://www.facebook.com/groups/329904227056535/
ريم اسامة