"مين قالك كده؟؟" سؤال رخم من حد سخيف للاستهزاء برأي شخص ما!
اختيار الكلمات وتوقيتها يدل على الشخصية....لما حد يتكلم وسط مجموعة ويقول عن مثلا حاجة حصلت في البلد او عن معلومة عامة غريبة وتلاقي واحد وسط المجموعة طلع زي الدمل يقول بملئ فمه "مين قالك كده؟" ...السؤال ده بينم على الرخامة طبعا (لانه ببساطة هايحرج حد وسط مجموعة)..ثانيا ليه يشكك في كلام اي حد ويضعه كمتهم مطلوب منه الدفاع عن نفسه وعن رأيه؟...لكنه هايبقى سؤال طبيعي جدا لو مكنش في مجموعة!
الكلام بيفضح صاحبه...اختيار الالفاظ بيظهر الشخصية اكتر من الملابس والمكياج والعربية ونوع الموبايل...الbody language واختيار الكلمات اتنين من اهم مفاتيح الشخصيات...يعنى مثلا:
- "ولد عندي في الادارة"...لما تلاقي حد بيقول جملة شبه كده تعرف على طول انه انسان متسلط...وشايف نفسه مركز الكون! ومش بعيد يكون مش لاقي له دور في الادارة دي ولكنه اعلى منصبا من "الولد" اللى بيتكلم عنه! وبعدين المفروض الشخص الطبيعي هايقول "ولد زميلي في الادارة" او "ولد معانا في الادارة"....مش "عندي!!"
زي بالظبط لما حد من اصحابك يسافر برة ويبعت يقولك "عندنا اوكازيون رهيب"....عندنا!! عندكوا فين؟؟ هيا فرنسا بقت بتاعتكوا خلاص؟! اللى يسافر ويقول على اي حاجة خاصة بالبلد انها "عنده" ...في اعتقادي الشخصي هوا انسان طموح ومتطلع... ولكنه بيعشق المنظرة! فشخار يعنى من الاخر! من الطبيعي مثلا انه يقول "في هنا اوكازيون"....او "عندهم هنا اوكازيون"...ولكن جملة "عندي" بتدل على انه ينتمى لمكان ما (ولكن الحقيقة غير ذلك)...هو يتمنى ان ينتمى ...والامنية دي بتنعكس على اختيار الكلمات.
وفي ناس بعد كل كام جملة تسئل "فاهم؟"....ايه فاهم دي؟؟؟؟ طيب ولما حد يسئلني كل شوية "فاهمة" المفروض ارد ولا اهز دماغي ؟ هوا انا طول الحديث هاقول "اه فاهمة؟"...ده لو درس احياء مش هاتسئل كتير كده عن فهمي للموضوع!!! وبعدين اللى بيسئل "فاهم؟" كتير كده مش عارفة ممكن نحلل اختيارهم للسؤال ده بايه!
وتلاقي برضه واحدة صاحبتك وهيا ماشية تقول لواحدة تانية "ظبَطي بقى!"....او "زي ما اتفقنا!"...اللى بتقول الكلام ده ...جمل مش مفهوم مغزاها لباقي الاشخاص...بتكون فعلا مفتقدة الاهتمام او مفتقدة الاصدقاء المقربين! عارفين هيا بتقول ظبطي او زي ما اتفقوا على ايه؟ هاتلاقوا على مثلا انها تحط التوم قبل الكسبرة على طشة الملوخية!! والله العظيم ما بهزر...هاتكون حاجة هايفة لدرجة لا تذكر ولكن هاتدي انطباع ان في سر شخصي بينها وبين اي واحدة تانية لمجرد اضفاء الغموض والعمق لشخصيتها السطحية!! والله اللى بيقولوا الكلام ده بيكونوا غلابة جدا ومحتاجين اهتمام اكتر من اصحابهم! لو ليكوا حد بيعمل كده حاولوا تقربوا منهم شوية!
وفي اللى على طول تعيب في نفسها! ايوة ده حقيقي! مثلا...تكون بتحب تشرب الشاي وتاخد سكر على طرف المعلقة ...عادي...كل واحد حر....لا هيا عارفة انها بتحب حاجة مش طبيعية شوية وخايفة من الانتقاد ...فتبادر هي به! "انا عارفة انى رخمة وان طرف المعلقة دي حاجة غبية اساسا" وتضحك جامد...هيا مش عايزة تضحك...هيا محرجة وخايفة...خايفة من الانتقاد...خايفة حد يقولها "انتى هايفة" فتبادر بالضحك على نفسها قبل ما حد يعمل منها مسخرة القعدة!!! الناس دي عندها نقص رهيب في ثقتها في ثقتها. وحساسين لدرجة انهم بيتريقوا الاول قبل ما حد يتريق...بيسبقوا! لو ليكوا اصحاب كده اتكلموا معاهم على انفراد وانك ملاحظة انها بتعمل كذا...وانها شخصية جميلة جدا وانها بتغلط في حق نفسها بالاسلوب ده!
وفي الشخصيات النرجسية ...محبين لنفسهم لدرجة مقيئة...شايفين انهم الصح وانهم عباقرة المجتمع وانهم خسارة في البلد وانهم كتير على شريك حياتهم وان اولادهم محظوظين ويابختهم ان ليهم ام/اب زيهم! والنوع ده مش بيسمع بقى خالص!! بيتكلم عن انجازاتهم فقط لا غير! عن ذكائهم الفطري الغير مسبوق وانهم طفرة جينية في الخليقة! دول ملهمش لازمة في الكلام غير كلمة "انا عملت"! انا الوحيد في تاريخ الشركة اللى عمل كذا...انا الوحيدة في الوزارة اللى اقترحت كذا...انا جبت كذا بسعر خرافي مش ممكن حد يجيب زيه!...انا فكرت في حاجة مستحيل تخطر على بال حد...انا انا انا...هم مركز الارض والحياة والكون كله!! لا بيسمعوا ولا بيلاحظوا ولا بيفرق معاهم حاجة...دول عايزين جوز ودان تسمع وراس تتهز بالموافقة وخلاص!
وفي اللى بيخلي اللى قدامه يكرر الكلام! زي مثلا "انا قلت له مش هايحصله طيب...مش هايحصله اييه؟؟" فانت ترد بكل تلقائية "طيب"...وبعدين تكتشف ان دي طبيعة كلامه...يتكلم وبعدين يسئلك هوا قال ايه....بيؤكد على الكلام...انت بتزهق طبعا ومش بترد بقى ما اصلك مش قاعد بتتكلم مع فقي! حاجة مملة اوي...الشخصية دي من الاخر هايفة!! مش هاقول اكتر من كده لانها لا تستحق التعمق ولا الاستفاضة :)
وطبعااااااااا في اللى نص كلامهم انجليزي عمال على بطَال! في كلمات بتطلع من الواحد عادي فعلا في وسط الكلام...زي مثلا كلمة اوبشن او by the way...او ممكن كمان whatever! حاجات بسيطة...ولكن في ناس بيتخلل كلامهم بعض الكلمات العربية!! احنا نتكلم عربي وهما يردوا انجليزي! لا حول ولا قوة الا بالله....وهيا تتكلم الانجليزي بتاعها وارد انا بالعربي...خلاص بقى هيا عرفت انى عارفة انجليزي وانا تأكدت انها متمكنة من اللغة...كفاية! اكيد في ناس مش بتفهم الكلام ده! عيب! دي مش شياكة....دي منظرة فارغة وقلة ذوق في كثير من الاحيان!
وفي ناس بتستخدم الفاظ نابية لتعطي الانطباع انكوا اصحاب وعادي بقى يتكلم براحته...يعنى هوا لازم راحتك في الكلام تبقى سفالة؟؟ ما تخليك محترم!!
ريم اسامة
No comments:
Post a Comment