المرتب بالشوال

"جايبين كاجو وفسدق وبندق بس السنة دي...امال فين البرفانات والساعات والهدوم بتاعة قبل كده؟ ما طبعا...ما طول ما الهانم دي وراه مش هايلاقي يجيبلنا حتى كيس مناديل من بره معاه"

نموذج متكرر من اهل الراجل اللى مسافر بره مع مراته! اول ما سافر لما كان بطوله كان بيجيب لامه واخواته وخالاته وعماته وعم اسماعيل البواب هدايا وهدوم وقماش وبرفانات وساعات وكرافاتات وشرابات وجلود باشكالها ومش بعيد يجيب علب كومبوت (ايام ما كان موجود بس في بورسعيد) واجهزة كهربائية....وعم الفييس اتجوز بقى ...وخلف..وبرضه الخليج مبقاش ميغة زي الاول...والايجارات بره بقت غالية جدا....وغير كده في تعليم الاطفال...وفي تأمين مستقبلهم انه يجيب لهم مثلا شقة في مصر باسم الاولاد...او يجيب عربية. 

اللى ليهم حد مسافر بره متخيلين انه بيقبض اخر الشهر في شوال! يجيب الشوال كده و"افتح المحبس يا عم" لحد ما الشوال يتملي فلوس وده يبقى مرتبه الشهري. الناس هنا متخيلة ان اللى في الخليج دول عايشين احلى عيشة واغنى ناس واكتر ناس مرفهة....طيب لو هما مبسوطين اوي كده مرجعوش ليه بلدهم؟ يا ترى هما مبسوطين في الغربة؟ 

في ناس هاتقول طبعا مبسوطين وهما لو مش مبسوطين هايقعدوا ليه؟ وفي اللى هايقول ماهم مش عايزين يسيبوا الفتة ويجيوا هنا للعيشة الضنك! 

الناس اللى في الخليج حارمة نفسها من اهلها...من الاصدقاء...من دفئ الوطن ... من الاخوات...من القعدة الحلوة واللمة في رمضان...من طعم العيد المميز في بلدنا...من سهولة التعامل مع الناس هنا....من المناسبات زي الافراح والحفلات والتجمعات العائلية والعزومات علشان لقمة العيش ...علشان لو كان في خير في بلدهم مكانوش دوروا على الرزق برة...لو كان في مستقبل لاولادهم في بلدهم كانوا تمسكوا بالاستقرار ومسافروش غير مثلا للفسحة كل فترة.

اللى مسافر برة يا طفشان من قرف البلد...او من البطالة ...او من قلة المرتبات اللى بقت سمة لجميع الوظائف...او من المستقبل المظلم اللى مش باينله نور! اللى بيسافر برة بيتعب فعلا علشان يثبت نفسه في وسط ناس مستقرين بالفعل! بيحاول ويحارب علشان يفضل في وظيفته ويترقى فيها ويعلى....والناس في مصر بتحسب الناس عايشة ازاي بانها تشوف الدينار ولا الدرهم وصل كام مصري دلوقتي ويحسبوا فلوس الراجل بالمصري تطلع كام الف في الشهر ويقولوا "دي عيشة عنب"! 

لا عنب ولا خيار...هيا اه عيشة افضل من مصر اكيد طبعا...ولكنها مش الثراء الفاحش يعنى...وبعدين اسعار مصر غير اسعار برة...احتياجاته هنا غير هناك...مستوى المعيشة هنا غير هناك....اللى ربى عليه عياله هناك مش هايقدر يوفره هنا فهوا متمسك بهناك علشان الاطفال ... مسحول ومربوط في الساقية زيه زي غيره في اي بلد.

واللى مسافر بره - اهله جوا بقى مش عايزين يشتروا هدوم ولا جلود ولا حتى غيارات مصري...عايزين كله متسورد...ما ليهم رجل بره مصر يجيبوا من جوا ليه؟؟ واللى عيان يبعت للبني ادم ده يقوله عايز دوا كذا علشان المادة الفعالة برة غير هنا...وعايز كمان فيتامينات علشان اللى عندنا مضروب...والستات عايزين كريمات علشان اللى في مصر مش بتضيع القشف كويس...ولا بتحسن تقصيف الشعر!! والرجالة بيكون همهم الاكبر من اللى جاي بره "السجاير"...قاروصتين تلاته كده ويبقوا فل الفل...الستات بقى مستنيين:

الاقمشة

التوابل الغريبة (اللى بتسوس وتترمي بس لازم يجيب)

البرفانات

الكريمات

شنط حريمي

جزم 

كوتشيهات اصلي

شرابات مش بتتخرم بسهولة!!

مكياج

مكسرات طبعا 

هدوم للعيال !

ومش هايرفضوا موبايلات اخر اصدار!

ناقص يجيبلهم نجف من برة!! كان اول ما طلع البلد الاجنبي بيجيب من باب ان دول اهله برضه اللى استحملوه سنين البطالة ومحدش بخل عليه بحاجة وهوا برضه عارف هما نفسهم في ايه! ولكن الظروف بتتغير بعد ما يتجوز ويخلف! ومش بعيد ابدا لو حد من اخواته جه يتجوز الاهل يعتمدوا عليه في الجهاز! "ما احنا ساعدناك في جوازك انت المفروض تساعد اخوك بقى"

لما اللى مسافر بره ده يجي مصر...اهله بيكون عايزينه كل يوم ....مفيش مشاكل طبعا من حقهم يشبعوا من ابنهم ولكنهم عايزين مراته وعياله برضه كل يوم! طيب ما مراته دي ليها اهل برضه نفسهم يشبعوا منها ...ولو ده مصر وراح يزور اهل مراته بيقلقوا ويفضلوا يقولوا ويفكروا "يا ترى الهانم جايبة لهم ايه؟ طبعا شئ وشويات وكله من خير الواد الاهبل اللى مسلم لها دقنه!"

ولو حصل وجمع اهل الزوج والزوجه في اي مناسبة او عزومة تلاقي الاهلين بيبصوا لبعض ويخمنوا يا ترى الهدوم او الجزمة او الشنطة دي جاية لهم هدية ولا لا!! ويقارنوا الهدايا !!!

وطبيعي جدا يسئلوه مثلا "ها؟ عملت الخميرة ولا لسه هاترجع تكمل؟" او "حقك  تشتري حتة ارض تسقعها "...ولو قالهم ان معهوش فلوس للارض يتغامزوا عليه مش مصدقين ان فعلا معهوش فلوس! ومتخيلين ان مراته بتحوش من وراه...مفيش راجل مسافر بره غير لما الناس تكون على يقين ان مراته بتحوش من وراه او انها بتبعت فلوس لاهلها من وراه برضه!!

ولما يجي بتاع البلد الخليجي ده اخواته بيكونوا متوقعين انهم كل ما يخرجوا سوا يعزمهم! ماهو مقرش (بكسر الميم) ومعاه ويعنى ينوبهم من الحب جانب - ياما استلف من مصروفهم! ولا هاينسى الواطي ده؟!
في بقى صنف بيجند نفسه للمغترب...يفضى نفسه 24ساعة يودي مشاوير ويجيب وينزل شوبنج معاهم ويوصلهم كل حتة فيكي يا مصر...علشان ينوبه من الحب جانب في اخر الزيارة او يخليها عادة فالمغترب يعمل حسابه على هدية special كده ولا حاجة!
الشكوى من الفقر والضنك والغلاء والحاجة بتزيد اوي مع "موظفي الخليج"...متخيلين ان الراجل ده مأجر فانوس علاء الدين وهايسلفهم الفانوس يومين!
في شوية جمل مقترنة دائما بالمغتربين بالدول العربية:
- خدنا تحت جناك يا عم - هاديك الCV وشوفلي حاجة هناك بقى خلينا نقب على وش الدنيا!!
- تلاقيك مش مستحمل الجو هنا - ما هناك ناقص يكيفوا الشوارع (الحرارة بتوصل 50!! طبيعي جدا انهم يكيفوا كل المكاتب والبيوت والاماكن العامة...الناس هاتنصهر كده!)
- ما تمد ايدك ...ولا قرفان؟ (على اي اكل شعبي)
- فاكر لما كنت بتزرع فجل في جنينة العمارة وتبيعه على ناصية الشارع اللى ورانا؟ (طرائف ونوادر لزوم "اعرف مقامك يا معفن" )
- الا هو الدولار وصل كام؟ (بداية حديث العملات ده غير مطمئن)
- اصلهم هنا بيدفعونا تمن الحاجة مرتين بعد الضرايب واللذى منه (يعنى متفرحش اوي باللى معاك انت جايبه رخيص )
- روح سلم على اهل مراتك بكره - الدنيا مش هاتطير...ولا مستعجل اوي تديهم الهدايا!!
- هوا احنا مش واحشينك ولا ايه؟ (مع كل زيارة للحمام!!)
- لو نزل مع اصحابه شوية ورجع لاهله تانى (اااااة طبعا من لقى احبابه نسى اصحابه - يا بختهم يا سيدي بالاهتمام)
- لازم تنزل رمضان اللى جاي بقى (معتقدين تماما ان المغترب ده بيلاقي تذكرة السفر في الشيبسي! او ان تمنها لا يمثل له شئ جنب البلاوي الزرقا اللى محوشها)

ناس جعانة!


https://www.facebook.com/groups/329904227056535/
ريم اسامة