احب احيي كل واحد وواحدة منكم...وكل واحد هايعرف نفسه:
احيي كل ست بتهري عيالها بوس لما يناموا - احساسا بالذنب!
احيي كل راجل حاطت خمسين جنيه زي الكارنيه في محفظته مش بيقرب منها علشان عارف انه لو فك منها ربع جنيه هاتطير كلها ولازم يحافظ عليها "للظروف"
احيى كل ست بتختار البيض الصغير لنفسها وتسيب الكبير للعيال
وكل راجل بيشد على عياله وعامل حمش وقلبه بيقع في رجله لما حد من اولاده يتخبط
كل ست بتعمل الاكل اللى جوزها بيقرف منه لما تكون متخانقة معاه
والراجل اللى بيسيب الازازة فاضية في التلاجة بعد ما يشرب
وماننساش الست اللى بتسيب الازايز فاضية اللى جوزها شرب منها وبتملى ازازة صغيرة لنفسها وتخبيها في التلاجة علشان لما هيا تعطش ...يمكن يبطل العادة السيئة دي!
تحية لكل ست تفضل طول السنة تشيل في فاكهة وخضار في الفريرزر علشان رمضان ولما يجي رمضان متعملش منهم حاجة
تحية لكل راجل كل ما مراته تقرب من اكل بيتخن ينكد على ابوها ويفكرها انها تخنت!
ولكل راجل متاكد ان الكرش هاينزل في تلات اسابيع رياضة...بس هوا مكسل! (عن الاسطورة نتكلم)
وكل ست بتستنى لحد ما جوزها ينام علشان تاكل اللى نفسها فيه من غير "تقطيم"
كل راجل متخيل انه بيعمل اللى عليه علشان بينزل الشغل ويرجع...بس مش اكتر!!
والست اللى بطلت تحط بارفان لحسن يكون حرام وبتحط مكانه سبراي علشان كده نضافة مش تعطر!!
والراجل اللى بيحلق دقنه لما يكون خارج ويسيبها زي المساجين في الاجازة "بريح دقني - انا حر في البيت" (ولا اكنه متجوز مروحة سقف تلاتة ريشة ملهاش نفس تشوفه مهندم!!)
لكل واحد وواحدة كل ما يسافروا بره فترة قصيرة يغيروا في الفيسبوك انهم lives in United Kingdom او خلافه!! و"ينسوا" يرجعوها زى الاول لما بنزلوا بلدهم!!
لكل واحد او واحدة خدوا كورس تبع الشغل ببلاش في مكان محترم فيغيروا على الفيسبوك تعليمهم انهم متخرجين من المكان ده!!
لكل واحد سمى ابنه او بنته على اسماء ابوه وامه في الصحة من غير ما يتفق مع مراته ...اجلالا لهم....تقولوش هوا اللى كان حامل وتعب في الولادة!!
واللى بتتجوز واحد "محترم" من عيلة من غير ما تحبه خوفا من "العنوسة" - بس انتى ليكي مقالة لوحدك بعدين على فكرة
واللى بتدخل جمعيات من غير ما تقول لجوزها علشان تجيب له الموبايل اللى نفسه فيه في عيد ميلاده
واللى بيدخل جمعية من غير ما يقول لمراته علشان يصيفوا في مكان حلو ويفسحهم كويس
وتحية كبيرة اوي لكل راجل بيساعد مراته من غير ما يذلها انه بيساعدها بعد كده...ولكل ست بتقوله "عنك انت - معنديش رجالة تشتغل...انت تتخدم وبس يا حبيبي"
وتحية ونص لكل واحد وواحدة لسه بتقول للطرف التانى حبيبي/حبيبتي حتى بعد سنين من جوازهم...لانهم فعلا بيحبوا بعض مش من منطلق العادة!
ولكل واحد بينده مراته باسم دلع (سامعاكي ياللى بتتنهدي سمعاكي - معلش يا حبيبتي كلنا لها)
وكل واحد مش بيحط قمصانه المستعملة في الغسيل ومتوقع من مراته تشم باط القميص علشان تعرف يتحط في الدولاب ولا الغسالة!! نفس الحوار مع الشرابات!!
كل واحدة بتستحمل غتاته حماتها علشان جوزها كويس معاها
كل واحد عارف ان امه ام عظيمة بس حماة "اجارك الله" وبيطنش علشان الدنيا تمشي
كل بنت بتجيب مكياج وكريمات وادوات تجميل كتير جدا بشكل مبالغ فيه قبل الجواز...وترميهم لما الصلاحية تخلص!!
كل راجل بيجيب جرايد كل يوم ومراته تكون اول ايد تتمد عليها لما تحتاج تحمر بتنجان...بعد شهر!!
كل راجل مايحبش ياكل غير من ايد مراته ومع ذلك مش بيقولها تسلم ايدك...لا تتغر ولا حاجة!!
وكل راجل مش بيتكسف يشيل مع مراته العيال
وكل ست مقدرة امكانيات جوزها وبتحاول تساعد....مش تعجزه!!
وتحية مخصوص لاي ست مطلقة ومش بتحاول تنتقم من جوزها في عياله....لا بتشوه صورته ولا بتشتمه قدامهم حفاظا على توازنهم النفسي
وكمان تحية لكل راجل طلق مراته وبيصرف على عياله اللى معاها!!
لكل راجل عايز يزود رفاهية بيته وبيلزم نفسه باقساط وفوايد علشان يرتقى ببيته وعيلته
ولكل راجل وست بيتقوا ربنا في فلوسهم علشان يربوا عيالهم بالحلال ويطلعوا ذرية صالحة
لكل اسرة لسه بتعلم اولادها "نعم" و"حاضر" و"لو سمحت" و"من فضلك" و"انا اسف" و"الحمد لله" و"بسم الله"
لكل ام شايلة دهبها رافضة تبيعه وتفك زنقة حياتها علشان بناتها لما يكبروا يبقى عندهم حاجة عليها القيمة...او تبيعه وتجيب شبكة لابنها لما يكبر
وللست اللى بتروح للكوافير وترجع البيت تربطه الكحكة المتينة برضه وتزعل ان جوزها مخدتش باله من التغيير (لا لا معندوش حق!!)
وللراجل اللى كل ما يستحمى ينسى يمسح المياه من الارضة
وتحية مفقوعة المرارة من اللى بيدخل الحمام يستحمى ويغرق بكرة التواليت - منكم لللله
للى مابياخدش باله ويغسل اسنانة بفرشاة مراته ولما يكتشف مايقولهاش!! (هيا بتكتشف لوحدها لما تلاقي الفرشاة مبلولة)
لكل راجل بيسيب مراته تنام شوية في الويك اند وياخد العيال بعيد عنها (انت عظيم على فكرة)
لكل ست بتعرف تصلح الهدوم مش بتستسهل وتجيب غيرها
لكل اب وام بيلعبوا مع عيالهم - مش سايبينهم بالعاب مبهرة يلعبوا مع نفسهم
لكل راجل لسه بيستعمل موبايل عادي مش Smart phone - انت محتاج تمثال دهب يا هندسة والله!! انت محترم ويابخت مراتك :)
لكل ست مش بتقول جملة "انا جايبة لك اغلى حاجة" لاطفالها...لاقتناعها ان الجملة دي بتبوظهم جدا في المستقبل
لكل ست لسة بتحترم سر بيتها وسر جوزها
وكل راجل ماستهبلش وكلم بنات وستات اونلاين لمجرد ان مراته مبقتش زي الاول
ولكل ست بتنضف بيتها بنفسها ومش بتقول لحسن حد يقول عليها "بيئة"
لكل واحدة وواحد لسه بيحاول يحافظ على هواياته بالرغم من المشاغل والبيت والعيال
لكل اللى لسه بيحب يهادي الناس ويشوف الفرحة في عينهم بالهدية
للى بيعمل مفاجأت لمراته علشان يهون عليها تعبها في البيت ومع اولاده
ولكل بنت مش مستنية ابن الحلال اللى "تبدأ" معاه حياتها - ومقتنعة ان الجواز ده جزء من حياتها اللى بدات يوم ميلادها فعلا
ولكل واحدة بتخلف علشان هيا عايزة تخلف مش علشان حماتها "بتستعوئها"
تحية لكل ست بتشد السيفون بعد عيالها اللى لازم بينسوه كل مرة!!
تحية ليا انا طبعا علشان سايبه العيال يعيطوا ويتفلقوا وبفكر فيكوا :))
ريم اسامة
https://www.facebook.com/groups/329904227056535/
حاسس ان مجدي يعقوب هايظهر في اخر البوست وهو بيقول "شكرا شكرا شكرا"
ReplyDeleteبس اجمدحاجه حكاية الست اللي بتعمل الاكل اللى جوزها بيقرف منه لما تكون متخانقة معاه
انا طول عمري بقول ان جواكوا كمية شر كبيره
احنا مفيش جوانا شر - احنا الشر بعينه :))
Deleteهههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
ReplyDeleteالف تحية وشكر يا ريم