وهما صغيرين احسن

كلنا بيجيلنا افكار غريبة وبتسيطر علينا - ممكن تروح بعد فترة وممكن تتمكن اكتر واكتر 

عامة انا بخاف من الموت - مش انى انا اللى اموت...لا....انى افقد اي حد من اهلي....ليالي كتير جدا جدا جدا بنامها معيطة ومخنوقة بسبب الفكرة دي...كتير هايقولوا لي الشيطان بيلعب بيكي! ولكن طول عمري خايفة...اول فترة من جوازي كانت جحيم على جوزي لانى طول الوقت متضايقة انى بعيد عنهم وكل ليلة لازم اعيط واخاف وبتاع...الراجل استحمل بصراحة :)

لكن...لو هانتكلم في فقدان الاعزاء...دايما بفكر في اولادي...مين هايموت الاول؟ انا ولا (بعد الشر) حد منهم؟

معرفش ايه اللى خلانى افكر في كده لانها فعلا فكرة سلبية وكئيبة جدا جدا 

لكن الفكرة مسيطرة عليا اوي

ولما بسرح فيها بسئل "لو انا اكتشفت انى مريضة مرض خطير ....هاتعالج ولا هاسكت واخبي؟" لقيت انى تلقائي بقول انى طبعا هاخبي ومش هاتعالج!!

لو العلاج هايبهدلني ويخليني في السرير وهايصرف كل اللى ورانا واللى قدامنا...اكيد مش هاتعالج..هاخبي....هاخلي الفلوس ليهم يمكن تسعدهم....عارفة انتوا بتقولوا الفلوس مش بتعوض الام...ايوه طبعا ده حقيقي

لكنهم اطفال هاينسونى!!

اليتم في الصغر احسن من اليتم في الكبر!! 

الصغير هاينسى...مش هايتألم...مش هايفتكر مواقف محددة في حياته...هايفتكر موود الطفولة ولكنه مش هايفتكر حاجات محددة!! انما الكبير فاكر كويس وواعي وحافظ ابوه وامه.

كتير ببص لاطفالي واخاف ماشفهمش تانى....بخاف يكبروا....مش عايزاهم كبار انا عايزاهم على طول فتافيت كده وكلهم براءة ونقاء...لانى حتى لو اتوفيت وهما في السن ده....مش هايتألموا....ابني هايسئل عني انا عارفة ولكن بالوقت ويوم ورا يوم وشهر ورا اللى بعده مش هايفتكر حاجة....صوتي هايروح من ودانه...وشي هايروح خط ورا التانى من ذاكرته....مش هايميز ريحتي...مش هايفرق حضني من حضن غيري...ولا ضحكتي من ضحكة غيري!! بنتى مش هاتفتكر اي حاجة طبعا...عمرها شهور....ولكن يا ترى لما يكبروا هايحسوا بعدم وجود "الام"؟ ولا هايكونوا اتعودوا خلاص؟ ابني هايفتكر انى كل ما اعمل حاجة حلوة كنت بخليه يساعدني؟ هايفتكر الحكايات اللى كنت بألفها له؟ هايفتكر الارنب "ارانيبو" اللى بينط في الجنينة ويلاقيه ويطلب منه طلبات؟ هايفتكر الاغانى اللى حفظانا سوا؟ هايفتكر ان وش امه كله نمش؟؟ انه مايرضاش ينام غير في حضني؟ هايفتكر جلسات التلوين اللا نهائية؟ انى كنت بخليه يشاركنى كل حاجة حتى نشر الغسيل وانى كنت بسيبه يحط بال5مشابك في الحاجة الواحدة علشان تمسك كويس؟ هايحتفظ جواه بكل الحب اللى قدمته وكل الحنان اللى حاولت احسسه بيه؟؟ 

يوم عيد الام هايكون ايه بالنسبة لهم؟ عادي؟ ولا هايحسوا بحرمان؟ ولا هايكونوا نسيوا خلاص؟

ولما يتجوزوا هايفتكروني؟ هايحسوا انى كان المفروض ابقى جنبهم ولا هايكونوا نسيوا؟

هايدعوا لي؟!!!

هايقروا الكلام ده ويحسوا بيا ولا هايحسوا انه كلام من واحدة كانت في الدنيا ومايعرفوش عنها حاجة؟

هايحتفظوا بحاجاتي من بعدي؟ حد هايشيلهم حاجات من بتاعتي يديهالهم لما يكبروا؟ ولا اللى هاتيجي بعدي في بيتي هاتتخلص من كله؟ طبعا هاتتخلص من كله :) 

لو مت الاول قبل اي حد من اللى بحبهم....هايكون ايه رد الفعل اتجاه الاولاد؟ اكيد في الاول هايتخانقوا مين ياخدهم ولكن بعد فترة صغيرة وحجم المسئولية....هايرموا؟ هايستحملوا؟ هايدعوا لي ويحسوا انهم بيخدمونى انا؟ هايصعب عليهم الاولاد حتى في الفترات الصعبة معاهم؟ 

لما ابني يسئل "ماما فين" هايقولوا له ايه؟ سافرت؟ طلعت السما؟ ماتت؟!!

مين هايبقى البديل؟ امى؟ اختى؟ مرات ابوهم مثلا؟!!!

لما امى تقرا المقال ده هاتقولي "انتى بتدعي عليا ليه؟"...مش بدعي عليكي يا امي والله...لكن مش هاستحمل فراق حد منكم ولا منهم....ولو الموت مصير لا فرار منه....فالافضل لهم يتيتموا بدري...علشان ينسوا بسرعة!!

كئبتكم معلش!!

ريم اسامة 

https://www.facebook.com/groups/329904227056535/