اغلى من امى...مفيش

اقوى المشاعر المصاحبة للامومة هي الحب...والخوف...والشعور الثقيل بالذنب!!

بنحب اطفالنا طبعا....حب الام هو حب بلا شروط ولا قيود ... حب فطري ومتدفق...مهما قالت الام عن عيالها ...ممكن تخلع عين اللى يجيب سيرتهم بحاجة وحشة "ادعي على ابني واكره اللى يقول امين!"

الخوف هو الوجه الاخر للحب...خوف من الموت ومن المرض ومن الفقر ومن الفشل والعجز وضيق الحيلة....خوف من المستقبل والحاضر...خوف من الغيب...خوف من كل حاجة حتى من نفسك!

ومع كل ده بيجي الشعور بالذنب بيخلينا مانفرحش بعيالنا....الذنب زي جلدنا...لا بنغيره ولا بنعيش من غيره ولا بنستخبى منه!!

لو عمل حاجة غلط وزعقتي له....هنيئا لك ليلة طويلة جدا من تأنيب الضمير والدموع...غير انك هاتهريه بوس وهوا نايم وتوشوشيه انك بتحبيه وكلام من ده

لو عمل حاجة صح وشجعتيه...لما ينام هاتحسي انك كان المفروض تزودي شوية من حماسك للحاجة الحلوة اللى عملها....ويجيلك شعور بالذنب انك احبطيه...وليلة تانية طويلة كلها دموع وبوس في الواد

لو ضربتيه بقى...فيها لتانى يوم الصبح لما ابنك يصحى علشان تصالحيه بحاجة حلوة (مع انك هاتلاقيه مش فاكر انه اتضرب) وتبوسيه كتير جدا وبرضه مش هاتنامي لما ينزل الحضانة او المدرسة 

لو اتخانقتي مع جوزك قدامه هايجيلك الشعور ده برضه وانه شاف حاجة ممكن تدمره نفسيا 

لو ابنك صوته عالي هاتحسي بالذنب لانه بيزعق وبيقلد طريقتك...فتفضلي برضه متضايقة 

لو كلمتيه ومردش عليكي وعمل فيها اطرش....هاتحسي بتأنيب الضمير علشان انتى ساعات بتكوني سرحانة ومش بتردي عليه

لو شبط في لعبة هاتسحي كده برضه علشان معودتيهوش يبقى قنوع 

لو مشبطش في لعبة هاتحسي بالذنب انه عودتيه يرضى بقليله

نفس الموضوع لو راح السوبر ماركت ومطلبش اي حاجة حلوة....او لو طلب حاجات كتير وعيط وسط الناس...لو ابنك منطوي...لو جرئ مابيخافش....لو حد انتقد امومتك انك مدلعاه زيادة او انك شادة عليه زيادة....لو حد سئلك "هوا ابنك عامل كده ليه؟" ده سؤال كفيل انك تدخلي في دوامة اكتئاب...لو نفسه في حاجة مع غيره ومش قادرة توفريها...لو لبسه مش غالي زي لبس اصحابه او قرايبه (مع ان العيال مش بيفرق معاهم اصلا تمن الهدوم) لو حماتك او مامتك علقت على مستوى نضافة طفلك...لو جوزك لفت نظرك لحاجة ناقصة لطفلكم...لو ابنك بيكره الخضار..لو بيكره الفاكهة...لو رافض يشرب لبن او اي عصير طبيعي...لو رافض يسمع الكلام من اول مرة...لو ابنك مش بيجي غير بالتهديد....لو مش بيجي غير بالحرمان....كل دي عوامل لتدمير معنوياتك واحباط محاولاتك للتوازن النفسي!!

كلام تخين اوي :)

لا بجد....الام مدرسة فعلا...بتعلم عيالها ازاي ياكلوا وازاي يشربوا من غير صوت ويلبسوا لوحدهم وينقوا هدوم الوانها لايقة على بعض وتعلمهم يخبطوا على الباب قبل ما يدخلوا ولما يطلبوا اي حاجة لازم استأذان ولو خدوا حاجة يقولوا شكرا...تعلمهم لغة تانية وتالته لو تقدر...تشجعهم على الرياضة وعلى الهوايات وعلى الصداقات وعلى الابتكار وعلى الابداع وعلى التفكير السليم وعلى اختيار الاصدقاء...الام بتساند اطفالها في كل مراحل عمرهم حتى بعد ما يكبروا ويخلفوا...بتفضل قلقانة حتى الموت....الامومة حب مميت....الام بتشوف اولادها لسه بيتلعثموا في الكلام حتى لما يكبروا...صورتهم البريئة الجميلة المعتمدة عليها هيا اللى بتفضل في مخها....هيا اللى بتفضل في وجدانها...مفيش ام فرحانة ان عيالها كبروا...كل واحدة نفسها عيالها يفضلوا محتاجين لها واطفال كلهم برائة ...مفيش اسرار ولا هموم ولا زعل ولا شيل الهم....كل ام عايزة اولادها يناموا لحد ما يشبعوا نوم ويصحوا مفيش في مخهم حاجة غير هايلعبوا ايه الاول...مفيش ام غاوية تضرب عيالها...اللى بتمد ايدها على ابنها وبنتها بيكون من خوفها عليهم...مش علشان هي عنيفة!! بتحاول مرة باللين ومرة بالصوت العالي ومرة بالتهديد وفي الاخر بتضرب!! 

الام بتخاف تطنش الاخطاء علشان ماتكبرش....بتقلق من العادات السيئة علشان ماتلزقش فيهم....الام مفيش ارق من قلبها....ومفيش اقوى من عقلها وارادتها وادارتها للوقت.

المقال ده مهدى لامى....ربنا يديكي الصحة....ويدينا القدرة على اسعادك....يا رب نكون بنسعدك زي ما طول عمرك واقفة جنبنا...محدش وقف جنبي مع اولادي غيرك....حتى في تعبك ومرضك كنتى برضه اللى شايلانى..مفيش حد احن على اولاده واحفاده زيك....مفيش ام بتطمن على اولادها اكتر منك....كتير اوي بنخاف نقولك على حاجة مضايقانا علشان ماتشيليش الهم...ماتزعليش لو في يوم زعقنا قدامك او فيكي...بنكون مش قاصدين والله نضايقك ولا قلة ادب مننا...بس بننفعل وبنتعامل معاكي اكنك اختنا بالظبط....يا ماما انت اغلى ست في حياتنا وزعلك غالي اوي عندنا....عمرك ما بخلتي علينا بحاجة ابدا...لا بمجهود ولا باي حاجة تخصك وملكك....كل فلوسك بالكامل رايحة علينا وعلى العيال الفتافيت دول :) ربنا يخليكي لينا ويديكي الصحة وطول العمر ويبارك لنا في حياتك....انا عمري ما اتمنتيت ام احسن منك....انت احسن ام ربنا خلقها...ربنا يخليكي.

ريم اسامة

https://www.facebook.com/groups/329904227056535/