من العوامل اللى بتعصب الواحد وتنرفزه وتثير اعصابه هي عدم احترام حرية الاخرين ...تلاقي جارتك ناشرة غسيل غرقاااان مياة وبينقط او "يشر" على غسيلك...عادي جدا ولا اي غضاضة! ولما تشتكي او حتى تعترضي تلاقي بكابورت فتح في وشك قلة ادب ووقاحة...ووسط السيل الهائل من الاهانات تسمعي كلمة "انا حرة ...براحتي!! ولو كان ليكي قرش عندي خدييييه"
وبعد كده كل مرة هاتنشر الغسيل مش معصور علشان تربيكي وتعرفي مقامك وازاي تدوسي لها على طرف تانى!! هيا دي ثقافة كتير جدااا من الناس....انا ومن بعدي اللى مش عاجبه....هما وبس...مفيش مراعاة جار ولا قريب ولا غريب ولا حتى مراعاة لحدود الاخرين وحرياتهم...ولا تعاليم الدين...ناس كتير اوي الدين عندهم بيقتصر على الصلاة والصوم فقط لا غير....التعامل ده بقى فهلوة! مع ان لو عصرت الغسيل هاينشف اسرع بس هوا كده بقى غتاتة واللى مش عاجبه "اضربي راسك في اتخن حيطة يا حبيبتشي "
مرة كنت رايحة الشغل ولحظي العاثر ركبت مواصلات...اتوبيس ميني باص كان اسرع وسيلة من مدينة نصر للمعادي واركب مواصلة واحدة وانزل عند الشغل...من غير تنطيط ولا غيره...المهم ركبت وطلعت واحدة ست بجلابية (عادي والله مش بتريق على الجلابية بس بشرح اللى حصل) وماسكة في ايدها رصة فطير غرقان سمنة....والفطير باظظ لبره ومدلدل على حجري!!! انا جالي حالة من الكهربا الزيادة في المخ من منظر الفطير اولا ومن الدلدلة على حجري ثانيا ومن تناحة الست ثالثا..ولما نطقت (قطع لساني ) وقلت لها لو سمحتي اتاخري الحاجات دي شوية مش ممكن كده...خدت من المنقي ورق عنب!! يا سلااااااااااااام....هزأت نفسي من الاخر!!
وفي اللى بيشغل اي حاجة على كمبيوتر الشغل (موسيقى او تواشيح او يسمع فيديوهات او يشغل اي حاجة) ويعلي الصوت كأنه في اوضة نومه...يتحرق اللى عايز يشتغل على اللى عايز هدوء ويركز..مش مهم...ولما حد يعترض دايما في جملة مش بيتقال غيرها "اذا كنت انا نفسي مش سامع!"
ولما تلاقي حد حاطت كولونيا خمس بصلات ولا سبع سمكات وماشي يشع...بجد البرفان الكتير اوي ده بيخنق وبيدوخ وبيعصب...ما تحط رشتين ...تلاته يا سيدي...مش لازم تستحمى بالريحة دي...في ناس تانية بتضايق جدا...وده مش شيك اصلا!!!! ما انت مش صينية مسقعة بالتوم علشان الناس كلها تشم الريحة - انت بني ادم!!
لو واقف في اشارة مرور طولها بتاع اربعة كيلو...تلاقي اللى وراك ميت على الكلاكس ....تستحمل مرة...اتنين...خمسة...بعد كده بتثور جدا ولو اعترضت يقولك "انا مستعجل في ايييييييييييه؟" ....ولو بجحت فيه شوية هايقول انه بيزمر للى قدام مش ليك...مع انك الوحيد تقريبا اللى جاله خرم في دماغه من الكلاكسات واللى قدام مش سامع اي حاجة!!
كنت في الشارع مرة وفي مسيرة صغيرة كده وقافلين الشارع تماما والناس عايزة تعدي...وكان في ميكروباص مصمم يعدي وجواه ناس...الناس اللى في المسيرة دغدغوا الميكروباص كله!! "ازاي يعدى يعنى؟؟ خلاص مفيش احترام؟ مش هانعرف كمان نتظاهر سلمي؟؟" - يا سلام على الحريات يا سلام!!
كنت بصلى مرة في جامع وجنبي ست غلبانة (بيت ربنا لكل الناس طبعا) بس هيا مصممة واحنا بنصلي انها تلزق قدم رجلها في قدم رجلي!!!! واحنا كنا بدأنا الصلاة خلاص يعنى مش هاقدر اقولها الحركة دي للرجالة مش لينا!! ولما ابعد رجلي تلزق اكتر واكتر...مش ممكن!!!
وبرضه في حركة غبية كانت بتحصل (ايام ما كنت بركب مواصلات والحمد لله ربنا تاب عليا) وهي انى مثلا ادخل ميكروباص اركب جنب اي حد....الحد ده مش بيتحرك ولا بيتزعزع من مكانه علشان يوسع لي شوية...ويوسع ليه؟؟؟ ماهو قاعد بفلوووسه!! هوا يفضل قاعد "مفخد" في مكانه وانا اقعد على الحديدة مش مشكلة!! ولما بقيت اخد اكتر من كرسي علشان محدش يضايقني اسمع ما لا يحمد عقباه من انانيتي المفرطة و"بدل مش عاجبك كده اركبي تاكسي ولا انت بنت عريان باشا ملط؟؟"
ولما حد يدخل هجم عليكي الاوضة او المطبخ او يفتح شنطة ايدك من غير استأذان...واللى بيستعمل حاجاتك من غير اذن ولا يديكي حتى فكرة بسيطة ...الحريات في كل حاجة حتى لو كانت بسيطة...اللى يشد سيجارة من علبة جوزك او ياخد بؤ من اي حاجة بتشربيها او قطمة من اكلك او لبانة من الباكو او حتى يحط حاجة متخصكيش في درجك...كلها حاجات بسيطة وكلها حاجات تغيظ!!
"حريتك تنتهى عند حدود حرية الاخرين" - ارحمونا بقى !!
ريم اسامة
https://www.facebook.com/groups/329904227056535/
لو واقف في اشارة مرور طولها بتاع اربعة كيلو...تلاقي اللى وراك ميت على الكلاكس ....تستحمل مرة...اتنين...خمسة...بعد كده بتثور جدا ولو اعترضت يقولك "انا مستعجل في ايييييييييييه؟" ....ولو بجحت فيه شوية هايقول انه بيزمر للى قدام مش ليك...مع انك الوحيد تقريبا اللى جاله خرم في دماغه من الكلاكسات واللى قدام مش سامع اي حاجة!!
كنت في الشارع مرة وفي مسيرة صغيرة كده وقافلين الشارع تماما والناس عايزة تعدي...وكان في ميكروباص مصمم يعدي وجواه ناس...الناس اللى في المسيرة دغدغوا الميكروباص كله!! "ازاي يعدى يعنى؟؟ خلاص مفيش احترام؟ مش هانعرف كمان نتظاهر سلمي؟؟" - يا سلام على الحريات يا سلام!!
كنت بصلى مرة في جامع وجنبي ست غلبانة (بيت ربنا لكل الناس طبعا) بس هيا مصممة واحنا بنصلي انها تلزق قدم رجلها في قدم رجلي!!!! واحنا كنا بدأنا الصلاة خلاص يعنى مش هاقدر اقولها الحركة دي للرجالة مش لينا!! ولما ابعد رجلي تلزق اكتر واكتر...مش ممكن!!!
وبرضه في حركة غبية كانت بتحصل (ايام ما كنت بركب مواصلات والحمد لله ربنا تاب عليا) وهي انى مثلا ادخل ميكروباص اركب جنب اي حد....الحد ده مش بيتحرك ولا بيتزعزع من مكانه علشان يوسع لي شوية...ويوسع ليه؟؟؟ ماهو قاعد بفلوووسه!! هوا يفضل قاعد "مفخد" في مكانه وانا اقعد على الحديدة مش مشكلة!! ولما بقيت اخد اكتر من كرسي علشان محدش يضايقني اسمع ما لا يحمد عقباه من انانيتي المفرطة و"بدل مش عاجبك كده اركبي تاكسي ولا انت بنت عريان باشا ملط؟؟"
ولما حد يدخل هجم عليكي الاوضة او المطبخ او يفتح شنطة ايدك من غير استأذان...واللى بيستعمل حاجاتك من غير اذن ولا يديكي حتى فكرة بسيطة ...الحريات في كل حاجة حتى لو كانت بسيطة...اللى يشد سيجارة من علبة جوزك او ياخد بؤ من اي حاجة بتشربيها او قطمة من اكلك او لبانة من الباكو او حتى يحط حاجة متخصكيش في درجك...كلها حاجات بسيطة وكلها حاجات تغيظ!!
"حريتك تنتهى عند حدود حرية الاخرين" - ارحمونا بقى !!
ريم اسامة
https://www.facebook.com/groups/329904227056535/
No comments:
Post a Comment