صديقك الفريزر

رمضان قرب ان شاء الله -  كل سنة وانتوا طيبين 

المقالة لستات البيوت...طبعا رمضان يعنى اكل مميز وعزومات وحلويات واللذي منه 

في فكرة حلوة اوي...احنا ممكن من دلوقتي نجهز للشهر ده...يعنى بدل ما يتخرب بيتنا اول رمضان ممكن من دلوقتي نظبط حالنا. وبرضه علشان في شوية منتجات بتتشفط من السوق وبنلاقيها بالعافية. مثلا زي اللسان عصفور...مع انه حاجة هايفة جدا ورخيصة بس بيخلص اول رمضان واحيانا بنستبدله بالشعرية في الشوربة...وكمان المكرونة القلم (بتاعة المكرونة بشاميل) بتخلص بسرعة اوي...والزبدة والجبنة الريكوتا (اللى بتتحط في الكنافة والحلويات). ممكن من دلوقتي نجيب الحاجات دي...ممكن نقسم حاجة رمضان على تلات شهور...يعنى الشهر ده واللى جاي واول رمضان...بدل ما نتنفخ فلوس في شهر واحد نقسمها ونرتاح خصوصا ان في لسه عيد بعد رمضان على طول. ممكن من دلوقتي نجيب السلع اللى بتقل في رمضان وبيكون وجودها نادر...خصوصا الزبدة لو انتوا غاويين تعملوا بسكوت وكحك وبيتي فور في البيت.

ممكن نقسم على التلات شهور دول حاجات زي الفراخ واللحمة واللحمة المفرومة والزيت والسمن والمكسرات وممكن مثلا بما ان لسه في برتقال نشيل بشر في الفريزر(بيتعمل بيه حاجات حلوة) وكرفس وكسبرة خضرا مجمدين اختصارا لوقت الغسيل والتقطيع...وبرضه ممكن خضار مجمد...الفريزر او الديب فريزر هو كلمة السر في الفترة دي.

لو نحضر من دلوقتي لحمة مفرومة جاهزة وسمبوسك محشية وجاهزة على التحمير....وفراخ بانيه وبفتيك متبل وجاهز بالبيض والبقسماط في الفريزر..وكبيبة...ونشيل فاكهة تتعمل عصير على الفطار...وممكن برضة خلطة محشي علشان الوقت والتعب في الحر...وحشو الجلاش الحلو (مكسرات وزبيب وقرفة وجوز هند على بعض يتحدف جوا الجلاش وخلاص :) )...ممكن تجهزوا ورق عنب من دلوقي...لو بتحبي المخلل البيتي الحقي خللي.
لو عندك بواقي بفتيك او فراخ بانية متبلة شيليها بالتتبيلة في الفريزر وتتعمل بعد كده شاورمة او فتة شاورمة.
المقال صغير النهاردة بس قلت احتمال ينفع:)
رمضان كريم

ريم اسامة 
https://www.facebook.com/groups/329904227056535/