في اكلات جميلة بس هي كابوس كل ست بيت...خصوصا بقى لو كان في اطفال في الموضوع!
مثلا الايس كريم...رائع...لذيذ...بيرطب على القلب كده في الحر النار...بس العيال لازم يلغوصوا الدنيا...يهطلوا على نفسهم...ومفيش اي مانع لو جت حاجة على ايدهم يمسحوها في هدومك او في الكنبة! مع ان في مناديل بس مش بيجي على بالهم يستخدموها...غلابة والله مع القصور الذهني اللى بيجيلهم ساعات كده!
في برضه الجيلي..يا سيدي على الجيلي وجمال الجيلي....الاطفال بيحبوا اوي الجيلي ...شكله وهوا بيلعب بيجيب لهم سعادة فورية ويجي طفل غتت يقولك "مش بحب الجيلي ساقع" فيسيبه اعتقادا منه ان الطبق هايفضل نفس الشكل بس سخن!!! فبيسيح...والطفل برضه هايحاول ياكله بالمعلقة...هيصي بقى البقع في كل حتة من اول الكنبة والشلت والسجاجيد وطبعا الهدوم بتاعتهم...الهدوم دي بتتعامل نفس معاملة الخيشة!
ومش هاننسى الشيكولاته!! لغوصة من اول الرموش لحد الدقن والايدين طبعا...وبما ان الشيكولاته كلها سكر فالطاقة بتدب فيهم مرة واحدة فيجروا كتير وينطوا ويتعفرتوا قبل حتى ما يغسلوا ايدهم...كل حاجة ملزقة كل حاجة ملحوسة وكل حاجة مستنية النمل!!
والعصير...لازم يتدلق منه اول بؤ على هدومهم او على الكرسي.
كل اللى فات ده الحاجات الخفيفة سهلة التنضيف...تعالوا بقى في التقيل!!
الملوخية!!!! مفيش ام بتحب الملوخية...مفيدة طبعا..كلها حديد...بتخلي العيال تتقلب تنام من كتر التوم اللى فيها...بس لما العيل من دول يصمم يشربها لوحدها او ياكلها من غير رز بيكون يوم كله زروطة ! وفي عيال ال (اللى قلنا عليهم فوق اللى بيعانوا من القصور الذهني دول - كل العيال يعنى) بيحطوا الطبق على الترابيزة مش على حجرهم - زي ما الام بتصمم - والبيه يفضل منجعص ورا اوي كده وياخد المعلقة من الطبق لحد بؤه في مشوار طويل لحد ما توصل المعلقة فاضية...ويتزامن مع الكلام ده ام بتلطم وتشتم!!
عندنا برضه المانجة (المانجو) - الحل الوحيد لاكلها هو في الطشط او تتاكل مقطعة...بس العيال بتحب الثمرة صحيحة...فياكلوا وينقطوا من كل حتة من الذقن والكوع والركب احيانا!! نصيحة: خلوا العيال ملط وهيا بتاكل المانجة علشان البقع!
واخو المانجة...البطيخ!! وخصوصا البذر الصغير اللى بيتَف في اي اتجاه وفي اي حتة...او في شعرك!
والكورن فليكس...بيتدلق اللبن في كل حتة ولما بيزهقوا بيعلبوا بالكورن فليكس الطري اللى بيزلق على اي حاجة بقى.
ويوم لما تاخدي عيالك تاكلوا بيتزا في اي حتة وتجيبي لنفسك سلاطة من نفسك...وتغلطي غلطة العمر كله وتجيبي بنجر...وهما يعجبهم اللون الاحمر القاني الجمييل "ماما عايز من ده!" لو رفضتي المحل كله هايتفرج عليكوا من الزن وهايتقال "الست البخيلة مستخسرة في عيالها حتة من السلاطة!" ولو وافقتي هاتعيشي حياتك فاكرة اليوم ده من البقع اللى مش هاتطلع من لبس الخروج!
وعذاب كل ام..المكرونة الاسباجيتي الحمرا!! يا سلاااااااااااااااام....يوم عالمي...مش محتاجة اقول اي كلام انتوا فاهمين لوحدكوا..او ممكن نقول انتوا مجربين!
تفتكروا في ايه ممكن العيال تاكله من غير ما يبهدلوا الدنيا غير العيش الحاف؟
ريم اسامة
https://www.facebook.com/groups/329904227056535/
No comments:
Post a Comment