ليه صحيح لما نروح عند الناس عيالنا بيفضحونا وبيطلعوا اقذر ما فيهم؟
مع انهم مش كده في البيت ومعانا؟
تروحي لصاحبتك اول مرة وواخدة العيال ومستحميين قبل ما ينزلوا وكله تمام..اول ما يدخلوا يمسكوا كل حاجة قدامهم...لو اتقدم لهم عصير يدلقوا منه شوية على السجادة او الكراسي...يلعبوا بلعب اولاد صاحبتك بغتاتة ويخطفوا حاجاته غصب عنه! ولو حد فيهم عطس او كح مايحطوش ايدهم على بؤهم على غير العادة في البيت! ويفضلوا يجروا في الشقة لحد ما يعرقوا ويبقى ريحتهم خل وعطانة! ومش هاننسى طبعا انهم بيمشوا حافيين! (ممكن الموضوع ده لو حد قريب منك بس مش عند كل الناس) ...ولو اتقدم لهم حاجة لازم يلغوصوا الدنيا وياكلوا بشكل غير المعتاد وانتى تفضلي تقولي "انا مش عارفة مالهم" من كتر الكسفة! ولما تمشوا لازم يشبطوا في لعبة من بتوع ابن صاحبتك.
ليه الاطفال بيطلعوا اسوا ما فيهم مع الضيوف او عند الناس؟ ليه التربية بتكون قدامنا احنا بس...يا ترى خوف؟ ولا بيسكتونا؟
ولو خرجتي وابنك شاف اكل في ايد اي حد من القاعدين معاكوا...ويزن عليها..."عايز من دي" ويشاور ويزعق ويبقى شكلك عره...ولو انتى من النوع اللى بيتكسف اوي هاتجيبيها بسرعة...ولو انتى تنحة حبة هاتقولي له "عيب يا حبيبي كده" ولو انتى وشك مقشر هاتقولي له "خد حته منه"!
ولو رحتوا زيارة وابنك دخل بزفة العياط والزن والصريخ (بلا مبرر) وكل الناس تسئل "ايه ده ماله؟؟ مش كبر على الحركات دي؟ انتى اصلك مدلعاه اوي!!" وانتى قدامك حلين... يا تتكسفي وتزعقي في ابنك او تحطي الوش المضحك وتهزري على انه قلبه كبير وبيحب الناس...انتى وشخصيتك وانا انصحك بالحل التانى..عن تجربة يعنى.
ولو ابنك راح عيد ميلاد واندمج مع العيال وصمم يفتح الهدايا! والطفل صاحب الحفلة ممكن يكون شخصية ضعيفة او هفأ شوية ويخلي العيال يفتحوا للعب بتاعته وتكتشفي لعبة منهم في شنطة ابنك لما تروحي...هاتعملي ايه؟ ويبدأ سيل الاسئلة "هيا بتاعتك؟ تاخدها ليه؟ انت بسترق؟ مش انت عندك زيها؟ خدتها ليه؟ ارجعها ازاي انا دلوقتي بقى؟؟؟" و تعرفي من ابنك ان كل العيال خدوا لعب وهما ماشيين!! وتتصلي بصاحبة العيد ميلاد تجسي النبض وتلاقيها عايشة في مياة الجبنة ومعندهاش فكرة! في الحالة دي هايصعب عليكي اوي صاحبة الحفلة لانها صرفت كتير جدا وفي الاخر ابنها لسه برضه بيلعب بالحاجات القديمة او اللعب الغبية اللى باقي الاطفال مرضيوش ياخدها من كتر ماهي وحشة!
ولو خدتي ابنك محل لعب واتفقتوا من قبلها انه هايختار لعبة واحدة بس...وطبعا عينه هاتزغلل من كتر اللعب ويسمعك جمل زي "انا معنديش لعب خالص انا عايز" او "انتى مش بتجيبيلي حاجة" او "انا مش بحبك!!" اثبتي على مبدئك ولو صمم خديه وامشوا خالص سيبيه يزن براحته بقى...يبقى نكد ومفيش لعبة كمان! متهيالي ممكن تفكريه كل شوية بالواقعة دي لما تروحي محل لعب تانى!
ولو خدتيه محل هدوم وفضل يشد في كل حاجة او يختار حاجات غالية اوي متقدريش عليها...نفس الموقف اللى فوق...جرجريه بره المحل ومفيش هدوم خالص! بلاش تتكسفي من الناس...العاملين بالمكان شافوا الموقف ده مليون مرة...عادي يعنى!
وعادي جدا لما ابنك يروح في اي بيت ويقدموا موز انه يحدف القشرة في اي مصيبة! او حاجة تيجي على ايده ويمسحها في قماش الانتريه...او يزق العصير اللى مش على كيفه ويتدلق! او يفتح الساندوتش وياخد الحشو ويسيب العيش حاف!
للاسف الناس بتحكم علينا عن طريق تصرفات عيالنا...انا موافقة من حيث المبدأ بس يكونوا اطفال كبيرة...مش فتافيت...اصل الصغير ده ملحقش اصلا التربية تأثر فيه...لو طفل عنده تلات او اربع سنين وشبط في حاجة...في حلول كتير..تسيبيه يتفلق...تجيبيها..او تجيبي حاجة اقل شوية وتساوميه او تقنعيه...كل ده مقبول..الغير مقبول انه يستعمل الزن كسلاح! خدي بالك من الموضوع ده...ومش فكرة لعبة بخمسين جنيه مثلا....الفكرة انه بيستغل ضعفك قدام الناس وانك بتتكسفي...العيال اذكى مننا بكتير على فكرة :)
ويبقى السؤال: ليه العيال بتحب تحرجنا مع الاغراب؟ ليه بيطلعوا الزفارة اللى جواهم قدام الناس وفي البيت بيكونوا محترمين؟
هاتلاقي ناس تقولك علشان انتى كابسة على مرواحه على طول...او انك شديدة العقاب في البيت..او انكوا مش اصحاب.
لا...السبب انهم عيال عرة....مايستاهلوش الخروج!!
ابقى زحلقيهم في اي حتة واخرجي انتى وانبسطي! بلا هم!
ريم اسامة
https://www.facebook.com/groups/329904227056535/
مع انهم مش كده في البيت ومعانا؟
تروحي لصاحبتك اول مرة وواخدة العيال ومستحميين قبل ما ينزلوا وكله تمام..اول ما يدخلوا يمسكوا كل حاجة قدامهم...لو اتقدم لهم عصير يدلقوا منه شوية على السجادة او الكراسي...يلعبوا بلعب اولاد صاحبتك بغتاتة ويخطفوا حاجاته غصب عنه! ولو حد فيهم عطس او كح مايحطوش ايدهم على بؤهم على غير العادة في البيت! ويفضلوا يجروا في الشقة لحد ما يعرقوا ويبقى ريحتهم خل وعطانة! ومش هاننسى طبعا انهم بيمشوا حافيين! (ممكن الموضوع ده لو حد قريب منك بس مش عند كل الناس) ...ولو اتقدم لهم حاجة لازم يلغوصوا الدنيا وياكلوا بشكل غير المعتاد وانتى تفضلي تقولي "انا مش عارفة مالهم" من كتر الكسفة! ولما تمشوا لازم يشبطوا في لعبة من بتوع ابن صاحبتك.
ليه الاطفال بيطلعوا اسوا ما فيهم مع الضيوف او عند الناس؟ ليه التربية بتكون قدامنا احنا بس...يا ترى خوف؟ ولا بيسكتونا؟
ولو خرجتي وابنك شاف اكل في ايد اي حد من القاعدين معاكوا...ويزن عليها..."عايز من دي" ويشاور ويزعق ويبقى شكلك عره...ولو انتى من النوع اللى بيتكسف اوي هاتجيبيها بسرعة...ولو انتى تنحة حبة هاتقولي له "عيب يا حبيبي كده" ولو انتى وشك مقشر هاتقولي له "خد حته منه"!
ولو رحتوا زيارة وابنك دخل بزفة العياط والزن والصريخ (بلا مبرر) وكل الناس تسئل "ايه ده ماله؟؟ مش كبر على الحركات دي؟ انتى اصلك مدلعاه اوي!!" وانتى قدامك حلين... يا تتكسفي وتزعقي في ابنك او تحطي الوش المضحك وتهزري على انه قلبه كبير وبيحب الناس...انتى وشخصيتك وانا انصحك بالحل التانى..عن تجربة يعنى.
ولو ابنك راح عيد ميلاد واندمج مع العيال وصمم يفتح الهدايا! والطفل صاحب الحفلة ممكن يكون شخصية ضعيفة او هفأ شوية ويخلي العيال يفتحوا للعب بتاعته وتكتشفي لعبة منهم في شنطة ابنك لما تروحي...هاتعملي ايه؟ ويبدأ سيل الاسئلة "هيا بتاعتك؟ تاخدها ليه؟ انت بسترق؟ مش انت عندك زيها؟ خدتها ليه؟ ارجعها ازاي انا دلوقتي بقى؟؟؟" و تعرفي من ابنك ان كل العيال خدوا لعب وهما ماشيين!! وتتصلي بصاحبة العيد ميلاد تجسي النبض وتلاقيها عايشة في مياة الجبنة ومعندهاش فكرة! في الحالة دي هايصعب عليكي اوي صاحبة الحفلة لانها صرفت كتير جدا وفي الاخر ابنها لسه برضه بيلعب بالحاجات القديمة او اللعب الغبية اللى باقي الاطفال مرضيوش ياخدها من كتر ماهي وحشة!
ولو خدتي ابنك محل لعب واتفقتوا من قبلها انه هايختار لعبة واحدة بس...وطبعا عينه هاتزغلل من كتر اللعب ويسمعك جمل زي "انا معنديش لعب خالص انا عايز" او "انتى مش بتجيبيلي حاجة" او "انا مش بحبك!!" اثبتي على مبدئك ولو صمم خديه وامشوا خالص سيبيه يزن براحته بقى...يبقى نكد ومفيش لعبة كمان! متهيالي ممكن تفكريه كل شوية بالواقعة دي لما تروحي محل لعب تانى!
ولو خدتيه محل هدوم وفضل يشد في كل حاجة او يختار حاجات غالية اوي متقدريش عليها...نفس الموقف اللى فوق...جرجريه بره المحل ومفيش هدوم خالص! بلاش تتكسفي من الناس...العاملين بالمكان شافوا الموقف ده مليون مرة...عادي يعنى!
وعادي جدا لما ابنك يروح في اي بيت ويقدموا موز انه يحدف القشرة في اي مصيبة! او حاجة تيجي على ايده ويمسحها في قماش الانتريه...او يزق العصير اللى مش على كيفه ويتدلق! او يفتح الساندوتش وياخد الحشو ويسيب العيش حاف!
للاسف الناس بتحكم علينا عن طريق تصرفات عيالنا...انا موافقة من حيث المبدأ بس يكونوا اطفال كبيرة...مش فتافيت...اصل الصغير ده ملحقش اصلا التربية تأثر فيه...لو طفل عنده تلات او اربع سنين وشبط في حاجة...في حلول كتير..تسيبيه يتفلق...تجيبيها..او تجيبي حاجة اقل شوية وتساوميه او تقنعيه...كل ده مقبول..الغير مقبول انه يستعمل الزن كسلاح! خدي بالك من الموضوع ده...ومش فكرة لعبة بخمسين جنيه مثلا....الفكرة انه بيستغل ضعفك قدام الناس وانك بتتكسفي...العيال اذكى مننا بكتير على فكرة :)
ويبقى السؤال: ليه العيال بتحب تحرجنا مع الاغراب؟ ليه بيطلعوا الزفارة اللى جواهم قدام الناس وفي البيت بيكونوا محترمين؟
هاتلاقي ناس تقولك علشان انتى كابسة على مرواحه على طول...او انك شديدة العقاب في البيت..او انكوا مش اصحاب.
لا...السبب انهم عيال عرة....مايستاهلوش الخروج!!
ابقى زحلقيهم في اي حتة واخرجي انتى وانبسطي! بلا هم!
ريم اسامة
https://www.facebook.com/groups/329904227056535/
No comments:
Post a Comment