في ناس كده قلة معرفتها احسن والبعد عنهم مكسب كبير!
تكون مثلا زميلتك في الشغل...
"صباح الخير يا فلانة" تبتسمي ووشك كله بهجة (صبح بقى)
"خير؟ طيب! صباح النور يا ستي" وتلاقي وشها مقفول ويقطع الخميرة من البيت
"مالك؟"
"العادي يعنى!! هوا في حاجة عدلة اصلا!!"
ويبدا العزاء اليومي بتاع العيال وابوهم والعيشة واللى عايشينها والحياة والمصاريف والدروس والتدريبات والغسيل والمواعين والقرف والنيلة!!
احيانا ببقى مش عارفة هما بيبعدوا العين ولا فعلا مش شايفين حاجة حلوة في الدنيا؟
اصل لو مش شايفين حاجة حلوة في حياتهم دي بجد تبقى مأساه!
محدش سعيد في حياته مية في المية...ولا في حياة تعيسة جدا للدرجة دي!
كلنا بنمر بمشاكل واوقات فوق وتحت واحيان اخرى تحت الارض...عادي..وياما هانشوف ولو قارنا مشاكلنا بغيرنا هانحس بالذنب ان معندناش مصيبة زيهم! الواحد هايتكسف :)
وفي جزء دايما بيبصوا لنصف الكوب الفاضي...زي مثلا جوزها مش بيتكلم كتير..طبعه كده! فتنقل ان حياتها قرف وصمت وجحيم وملل وتعاسة...ولكن مش بتقول ان جوزها كريم وبيهاديها في كل المناسبات وبيكبرها قدام اهله وبيساعدها في البيت وبيشيل عنها الاولاد! فتيجي الشغل قالبة خلقتها زي الشراب المستعمل المحدوف في باسكيت الغسيل ولما تشوف حد والحد ده غلط وسئلها "مالك"....بكابورت وبيفتح ..."انا تعبت وزهقت وخلاص مش طايقة دي عيشة مملة انا عايشة مع صنم لا بيحس ولا بينطق...كل حاجة بيعملها silent حتى يا ربي الضحكة...بيضحك من غير صوت!!! ياريتنى اتجوزت راجل اخرس على الاقل هايكون له عذره!! ال صمت زوجي ال...انا عندي صمت ابدي!! ده مش بيقولي حتى تصبحى على خير...ده بيشاور لي بايده!!" ومش بتقول مثلا انه بيطبطب عليها قبل ما يدخل الاوضة.
وفي اللى بتشتكي ليل نهار من الفلوس والمصاريف والغلاء الجنوني للاسعار....كلنا (بمعنى كلنا) بنشتكي من الفلوس ولكن مش لكل الناس! يعنى لو صديقة مقربة...اختك...امك...ابوكي...من باب الفضفضة...بس مش ماشيين في الشارع قالبين خلقتنا علشان الفلوس مش مكفية اللى احنا عايزينه...ودايما يصاحب الموضوع ده كلام زي "هانعمل ايه بقى...اهو قرف وخلاص! والله ما بجيب حاجة لنفسي علشان العيال" وتلاقيها ماسكة موبايل احدث موديل...ولما تبصى على الموبايل وهيا تفهم تقول "ده انا حتى تليفوني باظ وجبت ده بالتقسيط! مكنتش عايزة اجيبه بس جوزي صمم...علشان مابقاش متضايقة يعنى لو مسكت حاجة مش حديثة!" وبرضه بعد ما تشتكي صاحبتك من الفلوس وقلتها وان المرتب مش مكفي حاجة وان السلع نااار...تلاقيها بتحكي مع حد في التليفون على خروجه المطعم الغالي معاهم اول الاسبوع و"تتكرر قريب اوي ان شاء الله"!! او تروحي لها البيت تلاقي عندها حاجات مش عند حد مستواه عادي! ولو جه الاوكازيون بيجيلها صرع وبتجيب حاجات كتير لنفسها ولعيالها "تنفع السنة اللى جاية اصل سعرها حلو"...ماهي سعرها حلو فعلا بس لو جمعنا كل الحاجات دي هايطلع مرتب كامل! وفي نفس الوقت لو جبتي سيرة المدارس ومصاريفها (كلام عادي بيحصل بينا كلنا) تلاقيها فتحت البكابورت الخاص بها وتشتكي من الفلوس وجفاف الحياة!! يا رب يجف ريقك من الكدب يا شيخه!!
برضه في ستات بيصمموا يفضحوا عيالهم ويقولوا عليهم جاحدين..."ده مش بيسئل عني...ده مش بيتصل غير لما بيكون عايز حاجة...انا بشوف اولاده مرتين في الشهر بس...ده سافر من غير ما اسلم عليه...لما كنت عيانة اتصلت بالتليفون بس ومجاش يبص علي امه حتى!!" وصدفة بقى لو اتصلتي بيها تسمعي صوت احفادها جنبها ولما تسئلي ايه ده هما عندك؟ تقولك انهم بايتين بقالهم يومين!! وتلاقي ابنها ده مفحوت في شغله من الصبح لاخر الليل وفعلا مفيش فرصه انه يروح لامه شخصيا...وفي اجازة الاسبوع بيروح لها يوم كامل من الصبح لاخر اليوم...واتصاله بيكون لما هيا تصحى وبعد الضهر وقبل ماتنام غير اتصالها هيا بيه....وهيا اللى بتتصل بيه لما تكون بتشتري حاجة وبتسئله لو تجيب لهم حاجات معاها علشان مفيش فرصة او وقت انهم ينزلوا بنفسهم...والاعياد والمناسبات وعيد الام واول ونص واخر رمضان عندها...غير زيارتها هيا ليهم!! وترجع تشكتي هي من الوحدة و"اللى خلفت ولد مخلفتش اصلا!! الراجل بيطير والبنت هي اللى بتزود العيلة!" كلام خايب واهبل وملوش معنى ولا طعم! كل ده علشان محدش يحسدها على ابنها البار بيهم اللى شبه عايش معاهم كل وقته الفاضي. تسكت احسن لها بدل ما هي ناكرة نعمة ربنا! محدش هايحاسبها لو ابنها سئل عنها كتير ولا حد هايحسدها!! بس في ستات مخهم تعبان لهذه الدرجة وبيخافوا من الحسد و"القر" و"النق" اوي اوي
وطبعا كلنا مش هاننسى اي عروسة لازم تشتكي من كل حاجة في حياتنا بداية من طبع جوزها واهله نهاية الى السباكة البايظة في الشقة! ونستمتع كلنا ببكابورت "الكهربا ضربت في اوضة السفرة...السخان مش بيشتغل...مفيش اسانسير...الشقة حر...امه بتتصل كل شوية...بيرجع من الشغل ياكل وينام ومش بنخرج بالليل...زهقت من وقفة المطبخ" وفي الحقيقة الكهربا اللى ضرب دي تطلع لمبة فرقعت...والسخان مش بيشتغل علشان هي في الصيف..مفيش اسانسير علشان هي اصلا ساكنة في الارضي...الشقة حر لنفس السبب....امه بتتصل كل شوية علشان عيانة!...بيرجع من الشغل ومش بتخرج بالليل علشان بيخرجها خميس جمعة وسبت...وزهقت من "تستخين" الاكل في المطبخ!!!
كل واحد يلم البكابورت بتاعه بقى قرفتونا!!!! محدش بيحسدكوا...محدش فاضي اصلا يبصى لتفاصيل حياتكوا....بالوقت هاتتعودوا على الشكوى ومش هاتشوفوا اي حاجة حلوة في الدنيا وكل همكوا هايكون اصطياد العيوب الهايفة وتضخيمها لعرضها على المجتمع اللى اصلا مش فارق معاه التفاصيل دي! عالم مريضة!
ريم اسامة
https://www.facebook.com/groups/329904227056535/
"مالك؟"
"العادي يعنى!! هوا في حاجة عدلة اصلا!!"
ويبدا العزاء اليومي بتاع العيال وابوهم والعيشة واللى عايشينها والحياة والمصاريف والدروس والتدريبات والغسيل والمواعين والقرف والنيلة!!
احيانا ببقى مش عارفة هما بيبعدوا العين ولا فعلا مش شايفين حاجة حلوة في الدنيا؟
اصل لو مش شايفين حاجة حلوة في حياتهم دي بجد تبقى مأساه!
محدش سعيد في حياته مية في المية...ولا في حياة تعيسة جدا للدرجة دي!
كلنا بنمر بمشاكل واوقات فوق وتحت واحيان اخرى تحت الارض...عادي..وياما هانشوف ولو قارنا مشاكلنا بغيرنا هانحس بالذنب ان معندناش مصيبة زيهم! الواحد هايتكسف :)
وفي جزء دايما بيبصوا لنصف الكوب الفاضي...زي مثلا جوزها مش بيتكلم كتير..طبعه كده! فتنقل ان حياتها قرف وصمت وجحيم وملل وتعاسة...ولكن مش بتقول ان جوزها كريم وبيهاديها في كل المناسبات وبيكبرها قدام اهله وبيساعدها في البيت وبيشيل عنها الاولاد! فتيجي الشغل قالبة خلقتها زي الشراب المستعمل المحدوف في باسكيت الغسيل ولما تشوف حد والحد ده غلط وسئلها "مالك"....بكابورت وبيفتح ..."انا تعبت وزهقت وخلاص مش طايقة دي عيشة مملة انا عايشة مع صنم لا بيحس ولا بينطق...كل حاجة بيعملها silent حتى يا ربي الضحكة...بيضحك من غير صوت!!! ياريتنى اتجوزت راجل اخرس على الاقل هايكون له عذره!! ال صمت زوجي ال...انا عندي صمت ابدي!! ده مش بيقولي حتى تصبحى على خير...ده بيشاور لي بايده!!" ومش بتقول مثلا انه بيطبطب عليها قبل ما يدخل الاوضة.
وفي اللى بتشتكي ليل نهار من الفلوس والمصاريف والغلاء الجنوني للاسعار....كلنا (بمعنى كلنا) بنشتكي من الفلوس ولكن مش لكل الناس! يعنى لو صديقة مقربة...اختك...امك...ابوكي...من باب الفضفضة...بس مش ماشيين في الشارع قالبين خلقتنا علشان الفلوس مش مكفية اللى احنا عايزينه...ودايما يصاحب الموضوع ده كلام زي "هانعمل ايه بقى...اهو قرف وخلاص! والله ما بجيب حاجة لنفسي علشان العيال" وتلاقيها ماسكة موبايل احدث موديل...ولما تبصى على الموبايل وهيا تفهم تقول "ده انا حتى تليفوني باظ وجبت ده بالتقسيط! مكنتش عايزة اجيبه بس جوزي صمم...علشان مابقاش متضايقة يعنى لو مسكت حاجة مش حديثة!" وبرضه بعد ما تشتكي صاحبتك من الفلوس وقلتها وان المرتب مش مكفي حاجة وان السلع نااار...تلاقيها بتحكي مع حد في التليفون على خروجه المطعم الغالي معاهم اول الاسبوع و"تتكرر قريب اوي ان شاء الله"!! او تروحي لها البيت تلاقي عندها حاجات مش عند حد مستواه عادي! ولو جه الاوكازيون بيجيلها صرع وبتجيب حاجات كتير لنفسها ولعيالها "تنفع السنة اللى جاية اصل سعرها حلو"...ماهي سعرها حلو فعلا بس لو جمعنا كل الحاجات دي هايطلع مرتب كامل! وفي نفس الوقت لو جبتي سيرة المدارس ومصاريفها (كلام عادي بيحصل بينا كلنا) تلاقيها فتحت البكابورت الخاص بها وتشتكي من الفلوس وجفاف الحياة!! يا رب يجف ريقك من الكدب يا شيخه!!
برضه في ستات بيصمموا يفضحوا عيالهم ويقولوا عليهم جاحدين..."ده مش بيسئل عني...ده مش بيتصل غير لما بيكون عايز حاجة...انا بشوف اولاده مرتين في الشهر بس...ده سافر من غير ما اسلم عليه...لما كنت عيانة اتصلت بالتليفون بس ومجاش يبص علي امه حتى!!" وصدفة بقى لو اتصلتي بيها تسمعي صوت احفادها جنبها ولما تسئلي ايه ده هما عندك؟ تقولك انهم بايتين بقالهم يومين!! وتلاقي ابنها ده مفحوت في شغله من الصبح لاخر الليل وفعلا مفيش فرصه انه يروح لامه شخصيا...وفي اجازة الاسبوع بيروح لها يوم كامل من الصبح لاخر اليوم...واتصاله بيكون لما هيا تصحى وبعد الضهر وقبل ماتنام غير اتصالها هيا بيه....وهيا اللى بتتصل بيه لما تكون بتشتري حاجة وبتسئله لو تجيب لهم حاجات معاها علشان مفيش فرصة او وقت انهم ينزلوا بنفسهم...والاعياد والمناسبات وعيد الام واول ونص واخر رمضان عندها...غير زيارتها هيا ليهم!! وترجع تشكتي هي من الوحدة و"اللى خلفت ولد مخلفتش اصلا!! الراجل بيطير والبنت هي اللى بتزود العيلة!" كلام خايب واهبل وملوش معنى ولا طعم! كل ده علشان محدش يحسدها على ابنها البار بيهم اللى شبه عايش معاهم كل وقته الفاضي. تسكت احسن لها بدل ما هي ناكرة نعمة ربنا! محدش هايحاسبها لو ابنها سئل عنها كتير ولا حد هايحسدها!! بس في ستات مخهم تعبان لهذه الدرجة وبيخافوا من الحسد و"القر" و"النق" اوي اوي
وطبعا كلنا مش هاننسى اي عروسة لازم تشتكي من كل حاجة في حياتنا بداية من طبع جوزها واهله نهاية الى السباكة البايظة في الشقة! ونستمتع كلنا ببكابورت "الكهربا ضربت في اوضة السفرة...السخان مش بيشتغل...مفيش اسانسير...الشقة حر...امه بتتصل كل شوية...بيرجع من الشغل ياكل وينام ومش بنخرج بالليل...زهقت من وقفة المطبخ" وفي الحقيقة الكهربا اللى ضرب دي تطلع لمبة فرقعت...والسخان مش بيشتغل علشان هي في الصيف..مفيش اسانسير علشان هي اصلا ساكنة في الارضي...الشقة حر لنفس السبب....امه بتتصل كل شوية علشان عيانة!...بيرجع من الشغل ومش بتخرج بالليل علشان بيخرجها خميس جمعة وسبت...وزهقت من "تستخين" الاكل في المطبخ!!!
كل واحد يلم البكابورت بتاعه بقى قرفتونا!!!! محدش بيحسدكوا...محدش فاضي اصلا يبصى لتفاصيل حياتكوا....بالوقت هاتتعودوا على الشكوى ومش هاتشوفوا اي حاجة حلوة في الدنيا وكل همكوا هايكون اصطياد العيوب الهايفة وتضخيمها لعرضها على المجتمع اللى اصلا مش فارق معاه التفاصيل دي! عالم مريضة!
ريم اسامة
https://www.facebook.com/groups/329904227056535/
