"انا راجل"
الكلمة الهايفة اللى كل الرجالة بتحب تقولها كمبرر لاي حاجة غلط بيعملوها
لو الراجل اتأخر برة البيت وانتى قاعدة لوحدك مع العيال ومتضايقة انه سابك لوحدك...بالنسبة للراجل ان الست المفحوتة في البيت دي مش مهم ترن براحتها...المهم هوا يفضل براحته ولو اشتكيتي انه بيتأخر بره يقولك بكل فخر واعتزاز "انا راجل!"
لو شرب اي حاجة او اكل اي حاجة يسيب الطبق او الكوبايه مكانها مايحركهاش ولو طلبتي منه انه لما يطفح في اي حاجة يحطها في المطبخ ...يبص لك بكل استغراااااب ويقولك وبؤه كله تفافه من كتر الفرحة"انا راجل...انا ماشيلش حاجة امال انتى لازمتك ايه؟"
لما يتخانق مع مراته (وده بيحصل كتير) وبيكون غلطان من ساسة لراسه ... مستحييييييل يعتذر..الرجالة مش بتعتذر...الرجالة تسامح بس لما مراته تتأسف له..بعد ما يبهدل اللى خلفوها الاول طبعا انها غلطانة ازاي وازاي وازاي.
ولما الست تكون عيانة وتعبانة وفطسانة من المرض ودايخة على الاخر وتطلبي منه انه بس يدخل حد من العيال الحمام او يغير لحد فيهم ... يبص لك زي ما يكون جبتي سيرة امه بالوحش ويقولك "الحاجات دي بتاعة الستات - انا راجل!!! مفيش راجل بيدخل عيل الحمام!!!"
ولو هوا عايز يتعشى ولا طالب حاجة من طلباتهم العجيبة ولازم يقعد بحد من العيال - يتضرر اوووووووي ولو قعد ربع ساعة لازم امة لا اله الا الله وكل الامم التانية تعرف انه اتنيل وقعد بالعيال!!! وطبعا مش بيقول انها كانت ربع ساعة يتيمة العيال بتتفرج على براعم وهوا قاعد في نفس الاوضة فقط!
ولو صوته اترفع على مراته وهيا كمان رفعت صوتها...يسيب الموضوع الاصلي وازاي واحدة ست ترفع صوتها على راجل...ده هوا رااااااجل...عيب وقلة رباية انها تعلَي صوتها عليه...بغض النظر هوا شتمها ولا اهانها ولا عمل ايه يخليها ترفع صوتها عليه!!
ولو اتصلت بيه واحدة زميلته (وهوا عارف انك بتضايقي من النوع ده من الصداقات) وفتحتي خناقة معاه وانه بيكلم ستات وانه مش بيحترمك وانه مش هايرضى انك تكلمى زمايلك الرجالة في الشغل....هايقولك انا راجل...اعمل اللى اعمله....وبعدين زمايل مين يا روح خالتك اللى عايزاهم يتصلوا بيكي دول؟
ولما تنفضي الشقة وتطلبي منه يساعدك يتأفف اوي ويتأذى جدا ازاي تخلي راجل يساعدك..وتلاقيه بيقولك "انا راجل؟ هانزل امسح الارض ولا ايه؟" بعيدا ان مفيش حد خلاص بيوطي يمسح الارض علشان في مساحة بعصاية طويلة...كل اللى انتى عايزاه انه يشيل الحاجات التقيلة علشان ضهرك اللى باظ ده...فهوا يشيل ويطنش يرجع الحاجة مكانها تانى!!
وزي ما قلنا قبل كده ان اول يوم العيد لازم ولابد يكون عند امه علشان هوا الراجل ولازم اول يوم العيد يكون عند امه ويوم مولد النبي لازم يقضيه مع امه (وانتى غصب عنك معاه والعيال)...وعيد الام عند امه الاول برضه علشان "هيييييه انا راجل!!"
وبعدين ايه الفرحة العارمة دي بالرجولة؟؟؟
وفي شوية حاجات كده مسموح للراجل يعملها بس ممنوع الست تفكر تعملها...ومنها التالي:
- الراجل مسموح له يلعب الرياضة اللى على كيفه وقت ما يجي لجنابه مزاج...انتى لا ....هاتسيبي العيال تتفلق وتنزلي تجري زي الهبلة يعنى ولا ايه؟
- الراجل من حقه يسهر كل يوم مع اصحابه ويشوفهم كل ليلة...انتى كفاية عليكي اوي فيس بوك او التليفون (لو المزاغيد عيالك ادولك فرصة تتكلمي فيه)
- الراجل ممكن يروح لامه كل يوم (البر بالام من اساس الدين) وانتى اهلك اساسا كانوا بيعطفوا عليكي وربوكي معاهم صدقة ومش ضروري تشوفيهم اصلا!!
- الراجل بيشتري كل اللى نفسه فيه...من هدوم وجزم وبرفانات وسجاير وانتى لو فكرتي تجيبي شنطة "انتى ايه ؟ مش بتشبعي شنط؟؟" ولو جبتي طارحة "انتى مش مكفيكي محل الطرح اللي عندك ده؟"
- الراجل يقعد ليل نهار قدام التليفزيون او النت او يلعب بلاي ستاشن ...وانتى لما تتفرجي على المسلسل التركي اليتيم اللى متابعاه...تقف الدنيا كلها وتبقى مهملة ومش فارق معاكي دكر البط اللى انتى متجوزاه ويفتكر ساعتها ان ليه فانلة لسه متغسلش وفردة شراب ضايعة هوا عايزها ضروري!!
- الراجل مايدخلش ابدا يساعد مراته في (كفا الله الشر) المطبخ...هوا راجل...يعرف يطفح بس...انما مايساعدش...وتتقطع ايده وتتشل رجله لو شال طبق مكانه!!
-لو حصلت المعجزة وشال مج مكانه او كوبايه لازم يحطهالك على طرف الحوض...في حضنك كده وانتى واقفة...حتى لما يساعد تتمنى انه مايساعدش! رجالة تشل ياشيخة والله!!!
- مفيش داعي اقول ان مفيش راجل بيملى ازازة مياة...هوا بس يزعق ان مفيش ازايز ساقعةفي التلاجة ...بس مايفكرش يملى واحدة او حتى يرجعها مكانها!!!
- الراجل يتأمر على الاكل ومايفكرش ينزل السوبر ماركت يشترى طلبات البيت
- يفتكر عيد ميلاد امه وعيد ميلاد المضروبة اخته من قبلها باسبوع...ويفتكر عيد ميلادك يوميها من الفيس بوك!!
الرجالة فاهمين الرجولة غلط على فكرة...كلمة ذكر اللى انت فرحان بيها في البطاقة لا تعني راجل يا هندسة!!
http://www.facebook.com/groups/329904227056535/
ريم اسامة
