طيب بس عصبي

- "انتى هبلة ولا ايه؟؟؟" دي واحدة صاحبتك

- "هبلة ليه؟" 

- "وعيالك؟"

- "مالهم؟"

- "يابنتى الطلاق ده بيهز عرش الرحمن"

- "واللى بيحصل فيا يعنى راضي ربنا؟؟؟"

- "بطلي هبل!! جوزك طيب بس هوا عصبي شوية"

- "يعني انا اللى بنت..."

- "متخربيش بيتك بايدك"

- "هوا اللى خربه مش انا "

- "بس انتى اللى عايزة تطلقي مش هوا!"

- "ماهو يطلق ليه وعنده خدامة ببلاش ومربية لعيالة وطباخة ووقت ما يجي له مزاجه بتكون موجودة برضه"

- "اكبر غلط ان الست تقول على نفسها خدامة....ده بيتك ...بيت الست هوا مملكتها"

- "او سجن!"

حجة كل راجل غبي انه "طيب بس عصبي"!! مفيش حاجة اسمها طيب بس عصبي...الانسان الطيب يعنى يكون قلبه على بيته ومراته وعياله ويتحرق كده لو حاجة قربت منهم...وعصبي دي تتقال على طفل لسه محدش روَضه...بس راجل كبير وعصبي...ماشي ممكن طبعا...بس عصبي دي مش لازم يكون معاها "عصبي وبيغلط وينسى نفسه"!! احنا كمان عصبيين ولكن بنتحكم في اعصابنا....الرجولة مش معناها شنب وصوت تخين وضرب وخوف منه...مش معناها "لما اقول كلمة تتسمع ومفيش نقاش"...ومفيش ابدا في اي قاموس في العالم بيقول ان الراجل يمد ايده على واحدة ست!!!

-"طيب يعنى هوا ضربك؟" دي صاحبتك

- ".....لا!" بتقوليها بصوت واطي ...لانه مد ايده عليكي بس كبريائك مانعك انك تقولي انه ضربك!! 

- "خلاص بدل ممدش ايده عليكي يبقى عداه العيب"!

هيا الست دي جاموسة ؟ ملهاش مشاعر وكبرياء وكرامة؟ في كلام بيوجع اكتر من الضرب...في تصرفات مهينة اكتر من مد الايد!! طيب الست تستحمل ليه؟ هاتسعمي كلمة "علشان ولادك ملهمش ذنب امهم تطلق من ابوهم"...مش انتى السبب...هوا بغباوته وجهله وتخلفه السبب في انه اهان ست لدرجة انها مستعدة تتحمل مسئولية اولاد لوحدها. هايرجع حد ويقولك هاتصرفي على عيالك ازاي؟ يا ترى الست فعلا ممكن تقعد مع راجل بتكرهه وبيهينها ويؤذيها هيا و اولادها علشان بيصرف عليهم؟! وبعدين هوا بيصرف عليهم بيجيب لهم ايه غير الاكل والشرب ويدفع المدارس؟ مش الباقي كله (التدريبات والهدوم اللى بتيجي بره الاعياد  واللعب والفسح وهدايا اصحابهم في اعياد الميلاد وهدايا مناسبات اهلك انتى واكل برة للعيال في اجازة اخر الاسبوع واي نوع من الرفاهية الغير مقنن عند الراجل) مش كل ده انتى اللى بتصرفيه من مرتبك؟ ولو انتى مش بتشتغلي... مش انتى بتتصرفي وتشيلي جزء من مصروف البيت علشان عيالك يكون في حياتهم شوية رفاهية اكتر؟

وبعدين يا ترى الاطفال يكونوا مع  ام مطلقة ويشوفوا ابوهم مرة في الاسبوع احسن ولا لما يشوفوه كل يوم وعلى طول خايفين منه؟ وشايفينه بيزعق في امهم ويزعلها ويشوفوا دموعها؟ متخيلين ان الاطفال لما يشوفوا امهم بتعيط ولما تيجي عينها عليهم تضحك لهم ده احساس سهل لاي طفل؟ الاطفال مش غبية...ابتسامة امهم ليهم وعينها كلها دموع والم بتوجعهم اوي على فكرة...لانهم بالوقت وكل ما يكبروا بيعرفوا كويس اوي ان امهم مستحملة كل ده علشانهم! هايطلعوا مشوهين نفسيا.

ازاي الراجل لما يزعل يزعق بعزم ما فيه في الست اللى اختارت تعيش باقي حياتها معاه وفي بيته؟ ازاي يضرب الانسانة اللى تعبت علشانه كتير واستحملت كتير علشان يكون له هوا اطفال؟ ازاي الراجل متخيل انه لما يصرف علي بيته هو بكده عمل اللى عليه وزيادة؟؟

ايها الاب والزوج الغبي الفاشل...مراتك مش عايزة تاكل...مراتك عايزة حد يشاركها ...هيا مش عايزة حد يزعق في العيال بحجة التربية...هيا عايزة حد يقعد معاها بالليل قبل ما يناموا يحكي لهم حكاية...هيا مش عايزة حد يمد ايده على حد منهم لو غلط جامد...هيا عايزة راجل يكلمهم بحكمة وهدوء ويكون صاحبهم ويديهم ثقة في نفسهم وماحسسهمش ان الغلط ده اخر الدنيا...علشان ببساطة كل ما يتعاقبوا على حاجة هايتعلموا ازاي يخبوا اخطائهم...ازاي يمثلوا قدامك انهم بيعملوا اللى انت عايزه علشان ترضى عليهم وعلى امهم المسكينة...لانهم كل ما يعملوا حاجة غلط هيا كمان بتتعاقب معاهم لانهم تربيتها...خليك راجل في بيتك مش مع امك وبس...امك بس اللى بتسمع الكلام الحلو وامك بس اللى بيكون قلبك رحيم عليها...مراتك كمان ام...مراتك انسانة وعايزة تعيش حياة كويسة....اولادك امانة في رقبتك....الرجولة يعنى حنان...ثقة في الاخرين...هدوء...حكمة....مشاركة كل حاجة معاك مش بس فلوسك!!!

ربنا يكتب لكل الناس السعادة ويهدينا جميعا ان شاء الله 

http://www.facebook.com/groups/329904227056535/

ريم اسامة