تحب تطفح ايه؟!

- "هانتعشى ايه؟" الزوج يسئل الجارية

- "تحب تاكل ايه؟"

- "عندك ايه؟؟" بكل زهق يا حرام

- " في جبن ولانشون"

- "كل يوم جبنة ولانشون؟؟ وبعدين مش قلنا اللانشون ده غلط؟ مفيش فايدة برضه بتجيبيه؟!" بيسخن نفسه للخناقة

- " في بيض وفول"

- " برضه؟؟ في ايه غير الفول والبيض والجبنة واللانشون بتاعك ده ؟ كل يوم الفطار والعشا كده؟ انا عايز حاجة مختلفة انا زهقت"

- "اعملك مكرونة وبرجر؟"

- "برجر؟؟ لحوم مصنعة برضه؟؟" فرحان اوي ان مراته وقعت في الفخ 

- "مكرونة؟"

- "بتتخن! وبعدين مين ياكل كل النشويات دي ويدخل ينام؟ ايه غير كده؟"

- "اعملك pan cakes؟"

- "....................." كفاية البصة اللى بصهالك !!

-" تحب ابعت اجيب لك فطير وتاكله مع عسل ابيض؟"

-" فطير؟؟ بقولك المكرونة بتتخن تقولي لي فطير؟؟"

-"طيب حبيبي في عسل وطحينة"

-"هوا المفروض اقولك كام مرة مش عايز حاجة بتتخن؟؟؟؟؟" يا عين مامى صبره بدا ينفذ خلاص

- "في زبادي!"

-"زبادي ايه؟؟؟ بقولك عايز اتعشى تقولي لي زبادي؟!"

-"طيب تحب تاكل ايه انا قلت لك كل اللى عندي!"

يسيبك وبكل استهتار يلبس وينزل يتعشى بره وبرضه مش هاتعرفي كان نفسه يتعشى ايه!

في كام خناقة في البيوت بتحصل بسبب الطفح؟ وده العشا ...ابسط مشاكل الست...يا سيدي بقى على الغدا وقلق الغدا...الحوار ده انا متاكدة انه حصل في بيت من بيوتكوا

-"الغدا جاهز يا حبيبي" الست بتقول يا حبيبي تحسبا لو الاكل معجبوش - اهو بتلطف الجو 

-"ايه ده؟؟" صوته كله اتهام اصلا 

-"مكرونة بشاميل وبفتيك يا حبيبي" ابتسامة معناها حرام عليك بقى انا طلع عيني علشان اعمل الاكل ده 

-"فين السلاطة؟!"

-"سلاطة ايه؟"

-"السلاطة الخضرا فين؟!!" نبرة صوته بدا يكون فيها مزيد من الحدة مع رفع درجة واحدة اعلى

-"معملتش"

-"ليه؟؟ هوا تقطيع شوية طماطم على خيار مشكلة؟؟ ولا علشان انا اللى بحبها فمش مهم؟"

-"......."

-"هوا كل يوم هانقول على الفيلم الهندي ده؟ كل يوم؟ (ينفخ) انتى عارفة كويس انى بحبها!!"

-"حاضر"

-"حاضر ايه بقى؟ بعد ايه؟ بعد ما عكرتي مزاج الواحد"

-"متزعلش هادخل اعملها"

-"مش عايز ياستي خلاص! وفري مجهودك" ويمشي من الاوضة

-"انت مش هاتاكل؟"

-"شبعت!"

عاااااااااااااادي - ولا اكنك وقفتي في مطبخ ساعتين ولا اكنك تعبتي ...رد فعله للمكرونة البشاميل والبفتيك بالظبط زي رد فعله لما تطبخي له طاجن شباشب في الفرن!! علشان ايه؟ علشان السلاطة الخضرا عقدة الرجالة

هايجي راجل دلوقتي يقول يعنى هيا جت على السلاطة اللى الراجل مش بيطلب غيرها ...طيب يا سيدي ماتزعلش شوف الحوار اللى جاي:

-"ايه ده؟؟ برضه؟ هوا مفيش فايدة؟؟" ده صوت المحترم الزوج المصون من المطبخ..الست تتأندل على عينها وتجري تشوف في ايه تانى

-"خير؟"

-"هوا كل يوم هانرمي الاكل؟ هوا مش بيصعب عليكي الفلوس دي؟ حرام عليكي والله"

-"اكل ايه اللى اترمى؟"

-"السلاطة اللى هاتترمي دي مش حرام؟ خيار وطماطم وفلفل وبقدونس وجرجير وجزر ...كل ده في الزبالة عادي ولا بيفرق معاكي...زي ما يكون الفلوس اللى بتجيبي بيها الاكل دي فلوس حرام وانا مش تعبان فيها"

-"سلاطة ايه اللى هاتترمي؟ دي باقي الغدا"

-"ما انتى لو بتعملي كميات معقولة مكانتش اتبقت ...بس انتى لازم تعملي انجر...متعرفيش انتى تعملي كميات معقولة...لازم رطرطة وخلاص"

-"انا عملت واحدة بس طماطم وواحدة خيار وفلفلاية يتيمة ونص جزراية...اعمل ايه اقل من كده؟ ما انت اللى بتصمم على السلاطة دي وبتاكل منها شوية قليلة ومحدش غيرك بياكلها.... ومش بتاكلها كمان بايتة لازم كل يوم اقطع فريش"

يفضل يبرطم وينأرز فيكي لغاية ما تطفحي انتى باقي السلاطة اللى مش بتطيقي شكلها ....وبرضه مش هايسطت وهايفضل يبرطم!

رجالة عجيبة!!

http://www.facebook.com/groups/329904227056535/

ريم اسامة