يمكن متلحقيش

تروحي شغلك وكل تفكيرك هاتطبخي ايه النهاردة...وتقولى هاعمل بامية ورز وفراخ...يوووه الولد مش بياكل البامية..طيب اعمل ملوخية؟ ماهو مش كل يوم ملوخيه زهقنا من التكرار ده كل يوم علشان الولد متدلع ومش بياكل غيرها! طيب الفراخ هاعملها مشوية...برضه مش هاينفع...لازم بانيه علشان المفعوص مش بياكلها غير بانيه...وتقولي لنفسك انك محتاجة وقفة مع الولد ده علشان فعلا كده منتهى الدلع...اللى يتحط يتاكل مفيش حاجة بعد كده اسمها مش بحب وبحب...النهاردة هاتعملي فراخ مشوية وبامية ولما يقرصه الجوع هاياكل!

وانتى في وسط افكارك التربوية دي يجي لك تليفون خالتك اللى ساكنه مع اهلك في العمارة...اكيد هاتشتكي من دوشة ابنك اللى قاعد مع مامتك في الشقة اللى فوقيها...طيب تردي ولا لا! ماهو لو مردتيش هاتتصل هيا بامك وتعمل مشكلة زي كل يوم وتقولها خلي الولد يبطل جري وتنطيط!! وتردي بدل ما امك تخسر اختها....وياريتك ما رديتي...وياريتك ما رحتي الشغل!! 

تجرى على المستشفى...خالتك قالت وهيا منهارة عياط وانتى فهمتى بالعافية من كتر العياط انك تروحي المستشفى اللى جنب بيت مامتك...اكيد ابوكي حصله حاجة...او مامتك...ربنا يستر...طيب الولد فين؟ اكيد مع طنط اكيد! 

تجري وانتى على وشك الجنان من التخمين ايه اللى حصل...وتدخلي الطوارئ وتلاقي مامتك قاعدة...انتى عرفتيها من هدومها مش من وشها .... وشها نبيتي ومنفوخ من كتر العياط ...ايدها مهزوزة...شعرها باين من الطارحة....ايه ده؟؟؟ ماما لابسة هدوم البيت اصلا!!!! "ماما في ايييييه؟؟" انتى على وشك الانهيار معاها بس مش عارفة هاتعيطي على مين ولا على ايه؟؟؟ مامتك بتترعش كلها...كلها بتتهز جامد ...طالع منها صوت غريب ...هوا بين العياط والصريخ وحاجة بتوجعها اوي..."بابا ماله؟!! ماما ماله ردي عليا بسرعة!!!" مش بترد....وتلاقي حد بيقرب منك وتبصى تلاقيه ابوكي..."في ايه يا بابا؟؟؟ مالك؟؟" ابوكي شكله عجز عشر سنين...هوا حصل ايه؟؟؟؟ وبعدين بغريزة الام تعرفي من نفسك حصل ايه...تدوري حواليكي على ابنك...وتسئلي ابوكي اللى مش بينطق وامك اللى بتتألم بصوت عالي...ابنك فين؟؟؟ حصله حاجة؟؟ طيب حصله ايه؟؟ ردوا عليا حصل له ايييييه؟!!!!

وتدخلي الطوارئ تسئلي اول واحد في طريقك...انتى مش عارفة ده دكتور ولا ممرض ولا فراش ولا عامل نظافه...بتسئلي اول شخص قدامك....محدش بيرد عليكي علشان محدش فاهم في ايه...وتيجي ست كبيرة وتقولك "شدي حيلك...احنا مؤمنين بقضاء الله"...قضاء الله؟؟؟؟ اشد حيلي على ايه؟!!! دموع بلا اي ارادة بتنزل منك...اعصابك بتتكهرب....وباقي اليوم يعدي اكنه فلاشات نور قوية مؤلمة ورا بعض...وتلاقي نفسك في عربية جوزك...قاعدة في الكنبة اللى ورا...وجوزك جنبك ورا...وحد مفرقش معاكي تعرفي هوا مين بيسوق العربية...وابنك على حجر جوزك...ملفوف في قماش ابيض!!!

احساس مميت..ربنا ما يكتبه على حد...شعور رهيب ان مرة واحدة روحك اتسحبت منك وفضل جسم بارد ساقع ملوش لازمة عايش...تعيشي ليه؟ تعيشي ليه في النور وابنك في القبر الضلمة؟!!

البيت فيه سكون...فيه موت...ده مش صمت...ده موت!! كل حاجة ماتت...فيكي وفي البيت! البيت كله بصمات ابنك...مكنتيش متخيلة انه سايب بصماته في كل شبر بالطريقة دي...لعبه منتطورة في الارض...الالوان على جنب فوق كتاب التلوين...شبشب البيت محدوف كل فردة في حتة...صندوق لعبه مقلوب قدام التليفزيون ... بصمات ايده سودا تحت كبس النور! شخبطة جنب الباب على الحيطة...وانتى فاكرة كويس انك ضربتيه جامد  اليوم ده....مبقاش في دموع تنزل منك...الدموع خلصت...انتى بتعيطي دم دلوقتي!!! قلبك بطل ينبض...هوا بيترعش عايز يموت...مخك وقف...مش بيفتكر غير اللى ابنك كان بيعمله...وانتى قاعدة في الصمت ده كله تسمعي صوت...انتى متاكدة ان ده صوت رجلين ابنك...تجري تبصى بره وتلاقي ضلمة...مفيش حد...انتى اللى عايزة تسمعي الصوت...ابنك في مكان بعيد اوي...ضلمة...برد...ولوحده! 

 تفتكري لما كان نفسه في لعبة الاسبوع اللى فات وانتى لقيتها غالية...انتى قلتي هاتجبيها لو كانت ب100 جنية..وسئلتي وعرفتي انها ب130 وقلتي غالية مش هاجيبها...مع ان ال30 جنيه صرفتيهم وانتى خارجة جبتي بيهم شبشب جديد ليكي...كسرتي نفس ابنك علشان 30 جنيه...علشان تجيبي لنفسك حاجة...تفتكري كل مرة زعقتي له فيها...كل مرة ضربتيه...كل حاجة شبط فيها وقلتي له لا يعنى لا....كام مرة عيط كتير وراح نايم من العياط....انتى اه فضلتي تعيطي جنبه بعد ما نام بس هوا ماشفش ده!...كام مرة كسلتي تنزلي بيه تفسحيه .... كام مرة مرحتيش اعياد ميلاد اصحابه علشان متعرفيش حد فيها؟ كام مرة كسفتيه قدام الناس لما كان بيرفض يسلم؟ كام مرة زهقتي من زنه؟ كام مرة دعيتي "يا رب انا تعبت بقى!!!" ...اطمنى...ربنا استجاب لدعائك وريحك خالص!!! فاكرة لما كنتى بترفضي تجيبي له شيكولاته علشان اسنانه؟ ولما رفضتي تجيبي له شيبسي زي الولد اللى في النادي علشان صحته؟ ولما رفضتي تجيبي سكوتر علشان هايقع يتعور وكل ما يعدي طفل راكبه يفضل يبص عليه؟ ولما كان نفسه يعرف شنطتك فيها ايه وضربتيه لما فتحها؟ كام مرة قعدتي على الكمبيوتر او مسكتي مجلة او لعبتي على الموبايل وهوا معاكي ورفضتي تلعبي معاه علشان اللعب ده ممل؟ كام مرة وانتى بتتكلمي مع اصحابك اونلاين كان بينده عليكي علشان تشوفي بيعمل ايه وتعملي انك شفتيه وتقولي له "شاطر حبيبي شاطر" من غير ما تعرفي فعلا كان بيعمل ايه؟ كام مرة رفضتي انه يقعد على رجلك وانتى على الكمبيوتر علشان مش هاتعرفي تتكلمي مع اصحابك...ولما كان بيعمل كده بتكتبي لصاحبتك "احنا خلفنا ليه؟ وتضحكي"

كل واحدة دلوقتي تبوس ابنها...تحمد ربنا انه معاها...ولو ابنها مش معاها تتصل تسئل عنه وتنزل بدري شوية من الشغل تجيب له لعبة حلوة...ولو ابنك في البيت ابعتي هاتي له كل الحاجات الحلوة اللى نفسه فيها...البسي وخديه محل اللعب هاتي ليه اللعبة الغالية اللى كان نفسه فيها....افتحي الشنطة وقولي له تعالى نتفرج...خدي الالوان وكتاب التلوين لوني معاه...خديه على حجرك افتحي له فيديوهات اطفال واغانى...مش لازم يكون  a good boy علشان تجيبي له حاجة...خليكي انتى  a good mom وهاتي ليه من غير مقابل .. لو انتى بتقري دي...سيبيها والعبي معاه!! يمكن بكره متلحقيش تعملي كل ده!

http://www.facebook.com/groups/329904227056535/

ريم اسامة