ربنا يصبرك

احنا منافقين اوي على فكرة - اوي اوووي

بنعيب على اولادنا ونزعق لهم على الحاجات اللى احنا شخصيا كنا بنعملها زمان ...بالعكس كنا بنستمتع بيها كمان...دلوقتي لما الاطفال يكرروا اللى كنا بنعمله بنزعق لهم ونشتكى.

يعنى بنتجنن من العيال دلوقتي لما يمسكوا بسكوت الاوريو ويفكوه من بعض ويلحسوا الكريمة (زي الزفت الاعلان الله ما يكسبهم) ويفتفتوا البسكوت والدنيا تتبهدل لغوصة...مش فاكرين لما كنا بنجيب البيمبو ونكحت الشيكولاته اللى عليه علشان نتاكد انها في الاخر بسكوت ماري ومغطينه شيكولاته...ومايهدلناش بال غير لما نشوف كلمة mary مكتوب على البسكوت!!!

فاكرين المناديل المبلولة اللى بتلزق في السقف؟ فاكرين المكرونة الاسباجيتي المسلوقة السخنة الملزقة في سيراميك المطبخ فوق خالص ومش بنقول لحد علشان محدش يضربنا؟ فاكرين الطباشير الملون على الحيطان؟ 

ولا لما كنا لازم نفتح كيس الشيبسي بطريقة معينة...لازم نفرقع الكيس ونفضل في التمرين لغاية ما نفرقعه من غير ما نوقع منه حاجة :)

والبيبسي اللى بنفتحه في الباب :) مين فينا مفتحش كيس الشيبسي وبعدين فتفته كله ودلق الكيس كله في بؤه ؟ ولما الكيس يخلص نخرم الاركان اللى تحت بصباعنا ونلحسه علشان الفرافيت اللى مش بتنزل! 

فاكرين لما كنا بناكل الشمعدان طبقة طبقة؟

والجيلي كولا...ناكل غطا الازازة الاول وبعدين باقي الازازة! ومانسيبش علبة العصير غير لما نسمع "تتتشوووووسسس" 

وكان لازم برضه نسيب البسكوته او البقسماط لغاية ما يبوش خالص في الشاي وبعدين نصطاده ببقسماطة تانية - ونرفض المعلقة علشان كده نبقى غشاشين !

فاكرين الشعرية المسكرة؟ هافكركوا علشان صعبة دي شوية...كانت شرايط طويلة ملزوقة في بعض ...هيا عبارة عن مادة جيلاتينية كده ....كنا نفضل نمصها لغاية ما نزهق وفي الاخر نبرمها كلها على بعض ونحشرها في بؤنا!!

والعسلية...لازم نكحت السمسم من عليها الاول

فاكرين (للبنات) زبدة كاكاو لونا الحمرا؟؟ فاكرين لما كنا بنخبيها في شنطة المدرسة ونتعايق بيها في الفسحة؟

والسيتكرز اللى كنا ملطعينها في كل سنتى في الاوضة - على الخشب وعلى الابواب وعلى الازاز...فاكرين النضارات الحقيرة ام مراية اللى كانت بجنية وربع دي واهالينا يزعقوا جامد علشان عينينا هاتبوظ وناخدها من وراهم ونلبسها في النادي؟
وغطيان الاقلام اللى كنا واكلين نصها دي..وكراريس المدرسة اللى كنا بنقطع الورق من النص علشان نعمل بيها صواريخ...والاقلام الشمع لما كنا بنبريها في البراية الكبيرة !
وكمية الورق واللعب المكسرة واكياس المياة اللى حدفناها من البلكونة! والبمب اللى كنا بننشنه على العربيات ...والصواريخ طبعا ...والكتاكيت اللى كنا بنصمم نشتريها من قدام المدرسة ونسيبها تكبر ويبقى شكلها مقرف وتجري في الشقة وتنط من الصندوق ونتقهر لما يموتوا او امهاتها يسربوهم؟
الكلاب الضالة اللى كنا بنجري وراها  والقطط اللى كنا بنسيب لها اكل على باب الشقة فمتصدق ان هنا في اكل وتفضل لازقة للشقة دي شهور...والتريكو اللى كنا غاويين نسلته من الابر بتاعته ونفرح اوي بشكل النسيج وهوا بيتكر سطر ورا التانى.
كميات كريم الشعر الخرافية اللى كنا بنحطها في شعرنا متخيلين انه كده هايبقى ناعم اكتر! والشامبو اللى كنا بنغرف منه ونغسل شعرنا لنفس السبب؟؟
كام كعب جزمة كسرناه لامهاتنا واحنا بنجرب جزمهم الكبيرة
عملنا العن من كده مليون مرة بس ذاكرتي مش ساعفاني حاليا - وعيالنا بيطوروا المسيرة ماشاء الله عليهم! ينقطوا! فبلاش تنرفزي نفسك اوي - بكره يعقلوا ويبطلوا الهبل ده كله...ربنا يعينك ويصبرك على ما يكبروا بقى :)

http://www.facebook.com/groups/329904227056535/

ريم اسامة