العيال بتكون في قمة السعادة في المصيف ... الراجل عايز يبقى في قمة الاسترخاء في المصيف...والست بتتمنى ربنا ياخدها!!!
من دقيقة ما يوصلوا المصيف حتى دقيقة المغادرة الست بتشتغل نبتجيات مزدوجة - double shift يعنى. اول ما توصل تبدا عملية التنضيف طبعا...لو المكان بتاعكوا وبقاله فترة مقفول...هاتنضفي...لو مأجرين مكان مش تبعكوا اصلا .... هاتتفحتي تنضيف وتعقيم ودعك حمامات ومطبخ ولازم تكونى جايبة معاكي ملايات واغطية مخدات وغطيان من البيت...وطبعا فوط!
اول حاجة تنضفي الحمام...بالسلك والديتول وخلافه...وبعدين ترشي الحمام كله (ما انتى مش عارفة نظام البلاعات ايه ولا بتطلع عليكوا ايه)...وبعدين الاوضة بتاعتك علشان جوزك لازم ينام شوية من السواقة - وبعدين اوضة العيال علشان احتمال يناموا بعد حمام السباحة..وطبعا تفرشي ملايات والحركات دي كلها...وبعدين تدخلي على المطبخ تنضفيه كله والتلاجة تنضف وتنبهى على كل الموجودين ان محدش يلمس اي حاجة من دواليب المطبخ! وبعدين تشيلي السجاجيد او المشايات او ما شابه من الارض وتدلقي مياة بمطهر ومنظف كومبو وتزيحي المياة على الحمام!! اةة يا ضهرك يا اختشي!!
وبعدين تفضًي الشنط!! تكونى جايبة جرايد معاكي علشان مطرح الناس مش ناقصين قرف...ترصي حاجة العيال (ما جوزك نايم) وبعدين ترصي حاجة المطبخ على الرخامة...وبعدين ترصي الحاجة في التلاجة ولو مجهزة اكل غدا...تحضريه ويبقى جاهز. لما الباشمهندس يصحى من القيلولة ...تحضري الغدا وبعدين ترصي حاجاته....وينزلوا حمام السباحة ...ماتفرحيش استنى بس..وانتى معاهم!!!!
على حسب بقى انتى من اللى بيحبوا ينزلوا المياة او لا...كده كده انتى معكوكة! ما انتى لو نزلتي هاتشيلي حد من العيال في المياة..ولو فضلتي بره جوزك هايخرج لك اصغر عيل بسرعة من المياة وتشيليه مبلول لحد ما الباقي يخلص! ولو الفردة الصغيرة دي لسه رضيع يا ليلك يا سواده! الزن زن زن زن بردان وجعان وعايز ينام (المفروض توفى بكل الطلبات دي وانتى على الكرسي البلاستيك!! تعملي ببرونة وتهزي وتغنى في مكانك لحد ما ينام..وتقعدي متذنبة لحد ما الباقي يطلع...وهما طالعين مستنيينك تبقى واقفة بالبشاكير وابتسامة هاتفلق وشك نصين من الفرحة "انهم" نزلوا المياة وانبسطوا!! يا سبحان الله!!
المهم
تروحي البيت والكل يستحمى (سيبنا من خناقة مين الاول مش مهمة لانها هاتحصل كل يوم) ولمي بقى كل الحاجات المبلولة دي وابدأي الغسيل! ماهو لازم تغسليهم في ساعتهاعلشان يلحقوا ينشفوا تانى يوم ...وجوزك بقى كده عمل اللى عليه ونزل العيال يعوموا...دورك تعملي الشاي ولا تقطعي البطيخ الساقع او على اقل تقدير تجيبي له حاجة ساقعة يشربها!
وبعد الضهر تروحي اي سوق ولا تتمشى على البحر شوية وهما دول الشوية بتوعك انتى بقى من اليوم كله.
احنا فعلا والله بنحب نفسح العيال ...بالعكس في المصيف بيكون عندنا استعداد اكتر من الايام العادية اننا نفسحهم ومش مهم احنا...ولكن احنا بنتعب زي الرجالة بالظبط...فمفيش داعي ان الراجل يحط نفسه في صف العيال ويبقى هوا كمان عايز اخر دلع واخر روقان ويتخدم لاخر لحظة...الست بتشتغل زي الراجل...وباقي اليوم بتشتغل زي بغل السرجة برضه!! فالانسان الاولى بالراحة هي الست.
انا عارفة ان المقال مش هايجب الرجالة...علشان جاي على "الواوا"!! مش علشان هو مقال ظالم!!
الراجل بيفكر انه "مش كفاية وديتهم مصيف؟"..."مش كفاية سايق كل المسافة دي علشان ينبسطوا؟"..."مش كفاية صارف قد كده على السفرية دي؟"....."انا طول السنة بشتغل زي الحمار من حقي ارتاح" مش كفاية على فكرة....لو انت بتصرف فالست بتصرف برضه...وانت اللى مش عايزها تسوق عربيتك!!...وانت كمان بتتفسح معاهم مش قاعد مستنيهم في الحمام!!!
الست مطلوب منها كل يوم:
- تحضر فطار (حتى لو جوزها مش بيفطر - هايفطر في المصيف)
- تطبخ الغدا - الا بقى لو في يوم كده جبتوا سمك
- على طول يكون متوفر حاجات ساقعة وسخنة ومسليات (لب وفيشار وخلافه)
- تقشر وتقطع بطيخ!! مش عارفة الناس بتحب البطيخ ليه في المصيف!!!! ما ياكلوا اي فاكهة تانية مش محتاجة حد يحضرها!!!
- تغسل كل يوم على ايدها ...ما غالبا مش هايكون في غسالة اوتوماتيك!!
- المواعين على ايدها برضه!! عارفة ان مش كل الناس عندهم غسالة اطباق ولكن مواعين المصيف بتكون كل شوية علشان - الست بتكون مش واخدة معاها حاجات كتير ياكلوا فيها!!
- تحضر شنط لنزول حمام السباحة - وشنط للشاطئ - وغيرهم لو راحوا قرية تانية غير اللى هما فيها ...الخ
- غير كلمة "ماما" اللى بتتقال قبل كل شهيق وبعد كل زفير!
- العيال معاكي بقى ليل نهار مفيش حضانة ولا اي نظام - مصيف بقى وهيصة - فانتى مش عارفة لهم نظام!! وبالتالي انتى مش عارفة لنفسك ولا للنوم نظام! ومع اول عين بتفتح في العيلة...انتى كمان تصحي من النوم!!
- الراجل بينام الضهر برضه مفيش فايدة...وانتى برضه لا!! امال مين هايقعد بالعيال غيرك؟؟؟ هوا عايز يشحن بطاريته..وانتى شغالة بالجاز!!
الكلام ده كوم...ولو طلعتوا مصيف مع حد كوم تانى خاااااالص
مبدئيا كده اعملي حسابك انك مسافرة لوحدك مش مع جوزك! لو قلتي له يشيل حد من العيال هاتسمعى "شايفة حد في الرجالة شايل عيل؟؟ ولا انا بس الى هاعمل شغل الستات؟؟!!"
لو طلبتي منه يساعدك في حاجة هاتسمعي "شايفة حد من الرجالة بيعمل كده؟؟؟ ولا انا بس اللى هابقى جوز الهانم؟""
لو طلبتي منه يحمي العيال معاكي او يدخل حد فيهم الحمام علشان انتى مشغولة مع الطفل التانى "حمام؟؟؟؟ شايفة حد منهم بيدخل حمام؟؟ ولا انتى فاكرة نفسك طالعة مصيف مع الدادة؟!!"
وقدام الناس لازم يتخدم اكتر من الاول...يعنى حتى بؤ المياة الفلبينيه هاتوصله دليفري لحد بؤه!!!
ومن اشهر الجمل في المصايف هي:
- هاطلع لك العيال من المياة - خديهم الشاليه يستحموا وبعدين هابقى اطلع انا! (مش مهم خالص انها تحتاس بالعيال المبلولة دي لوحدها! بس البيه يطلع على الحمام الجاهز على طول)
- هانزل شوية كده ! (الشوية دي كام دقيقة ولا كام ساعة؟ مش مهم - هما شوية وخلاص) وغالبا الشوية دول بيكونوا علشان يهرب من انه يمسك حد من العيال او يحوش العيال عن المسكينة الخدامة امهم!!
- هاروح امًوًن العربية!! (تقولي له خد حد من العيال معاك - يعمل وقع على ودنه واصنج!)
- هانزل وعلى ستة هارن لك تكونى جاهزة انتى والعيال انزلوا لي(طيب مش هايلبسهم معاكي؟ طبعا ....لا!!طيب مش هاشيل معاكي العيال ولا ينزلهم السلم معاكي او حتى يمسك منك الشنطة...انظر الاجابة السابقة!)
- مفيش طحينة؟!!!! انا مش بحب بتاعة برة!
- بصى خلي الغدا النهاردة خفيف بلاش تتعبي نفسك.....مكرونة وبرجر وحمري لنا بطاطس وجنبهم شوية طحينة...ماتنسيش تقطعي حلقات بصل وطماطم جنب الاكل (ده الخفيف؟؟ للرجالة اللى متخيلة ان ده خفيف وانه بيكرمنا...المكرونة عايزة حلة للسلق وحلة للصلصة...البرجر في طاسة....البطاطس تتقشر وتتقطع وتتحمر ونقف مذلولين قدام اهلها علشان تتحمر!..وبنحمر كذا مرة طبعا...كذا دور!! ولسه طحينة وكمان نقطع بصل وطماطم!! خفيفة دي يعنى تاكل تونة من العلبة او تجيب اكل من برة او تعمل ساندوتش جبنة وياريت يكون العيش مش في الفريزر علشان احنا بنكره جدااااا نسخن العيش!!!)
والله العظيم احنا بنحب جدا الرحلات وبنفرح لما اطفالنا ينبسطوا وبنفرح لما الرجالة برضه تنبسط....بس بنقدر اوي الراجل اللى يشيل شوية من علينا...شوية راحة بس ينوبك ثواب! مش لازم كل سفرية نرجع تعبانين اكتر ما رحنا
مش لازم احساس "عايزين اجازة من الاجازة" بتاع كل سنة ده!!
ريم اسامة
https://www.facebook.com/groups/329904227056535/
- غير كلمة "ماما" اللى بتتقال قبل كل شهيق وبعد كل زفير!
- العيال معاكي بقى ليل نهار مفيش حضانة ولا اي نظام - مصيف بقى وهيصة - فانتى مش عارفة لهم نظام!! وبالتالي انتى مش عارفة لنفسك ولا للنوم نظام! ومع اول عين بتفتح في العيلة...انتى كمان تصحي من النوم!!
- الراجل بينام الضهر برضه مفيش فايدة...وانتى برضه لا!! امال مين هايقعد بالعيال غيرك؟؟؟ هوا عايز يشحن بطاريته..وانتى شغالة بالجاز!!
الكلام ده كوم...ولو طلعتوا مصيف مع حد كوم تانى خاااااالص
مبدئيا كده اعملي حسابك انك مسافرة لوحدك مش مع جوزك! لو قلتي له يشيل حد من العيال هاتسمعى "شايفة حد في الرجالة شايل عيل؟؟ ولا انا بس الى هاعمل شغل الستات؟؟!!"
لو طلبتي منه يساعدك في حاجة هاتسمعي "شايفة حد من الرجالة بيعمل كده؟؟؟ ولا انا بس اللى هابقى جوز الهانم؟""
لو طلبتي منه يحمي العيال معاكي او يدخل حد فيهم الحمام علشان انتى مشغولة مع الطفل التانى "حمام؟؟؟؟ شايفة حد منهم بيدخل حمام؟؟ ولا انتى فاكرة نفسك طالعة مصيف مع الدادة؟!!"
وقدام الناس لازم يتخدم اكتر من الاول...يعنى حتى بؤ المياة الفلبينيه هاتوصله دليفري لحد بؤه!!!
ومن اشهر الجمل في المصايف هي:
- هاطلع لك العيال من المياة - خديهم الشاليه يستحموا وبعدين هابقى اطلع انا! (مش مهم خالص انها تحتاس بالعيال المبلولة دي لوحدها! بس البيه يطلع على الحمام الجاهز على طول)
- هانزل شوية كده ! (الشوية دي كام دقيقة ولا كام ساعة؟ مش مهم - هما شوية وخلاص) وغالبا الشوية دول بيكونوا علشان يهرب من انه يمسك حد من العيال او يحوش العيال عن المسكينة الخدامة امهم!!
- هاروح امًوًن العربية!! (تقولي له خد حد من العيال معاك - يعمل وقع على ودنه واصنج!)
- هانزل وعلى ستة هارن لك تكونى جاهزة انتى والعيال انزلوا لي(طيب مش هايلبسهم معاكي؟ طبعا ....لا!!طيب مش هاشيل معاكي العيال ولا ينزلهم السلم معاكي او حتى يمسك منك الشنطة...انظر الاجابة السابقة!)
- مفيش طحينة؟!!!! انا مش بحب بتاعة برة!
- بصى خلي الغدا النهاردة خفيف بلاش تتعبي نفسك.....مكرونة وبرجر وحمري لنا بطاطس وجنبهم شوية طحينة...ماتنسيش تقطعي حلقات بصل وطماطم جنب الاكل (ده الخفيف؟؟ للرجالة اللى متخيلة ان ده خفيف وانه بيكرمنا...المكرونة عايزة حلة للسلق وحلة للصلصة...البرجر في طاسة....البطاطس تتقشر وتتقطع وتتحمر ونقف مذلولين قدام اهلها علشان تتحمر!..وبنحمر كذا مرة طبعا...كذا دور!! ولسه طحينة وكمان نقطع بصل وطماطم!! خفيفة دي يعنى تاكل تونة من العلبة او تجيب اكل من برة او تعمل ساندوتش جبنة وياريت يكون العيش مش في الفريزر علشان احنا بنكره جدااااا نسخن العيش!!!)
والله العظيم احنا بنحب جدا الرحلات وبنفرح لما اطفالنا ينبسطوا وبنفرح لما الرجالة برضه تنبسط....بس بنقدر اوي الراجل اللى يشيل شوية من علينا...شوية راحة بس ينوبك ثواب! مش لازم كل سفرية نرجع تعبانين اكتر ما رحنا
مش لازم احساس "عايزين اجازة من الاجازة" بتاع كل سنة ده!!
ريم اسامة
https://www.facebook.com/groups/329904227056535/
