اتقوا الله

قريت جملة ووقفت عندها كتير : الست ممكن تاخد بالها من عشر عيال...ولكن العشرة دول مش ممكن ياخدوا بالهم من امهم المسنة!

حقيقي! الست ممكن تخلف كتير وتهتم بيهم كلهم وتاخد بالها من البيت وبجوزها وبالاكل والشرب وتكون متابعة لمواقفهم في المدرسة والجامعات...حافظة طبعا اسماء اصحابهم ومحتفظة بارقام الاصحاب دول علشان حالات الطوارئ (من ورا عيالها)...حافظة كل طفل بيحب ياكل ايه ومش بيحب ايه وبيفطر امتى وبينام امتى...اللون المفضل من كل طفل من العشرة دول...مزاجهم في الموسيقى...ملح كتير ولا قليل...بيحبوا الاكل سخن ولا دافي...بياكلوا كل صنف لوحده ولا بيلخبطوا الاكل على بعضه في طبق واحد...بيشربوا سخن ولا ساقع وكام معلقة سكر...صحتهم اخبارها ايه...لو عيانين حافظة مين بياخد دوا ايه وامتى...ميلوهم...اهتماماتهم...هواياتهم...مواهبهم!!

الام حبها واهتمامها عمره ما بيتقسم على عدد الاطفال...ولكنه يتضاعف ويتضاعف...واهتمامها كذلك ويؤرقها جدا ان الوقت بيتقسم...تتمنى تضاعف الوقت زي ما بتضاعف الاهتمام والحب.

والاطفال تكبر يبقوا مراهقين وتفضل صاحية الليل تدعي ربنا يبعد عنهم ولاد اللذينة الشمامين واللى بيشربوا سجاير والعيال الفاشلة والعيال العنيفة...تخاف ابنها يدخل في خناقة لايحصله حاجة...تخاف بنتها تنزل لوحدها لاتتخطف ولا يحصلها حاجة...تخاف ابنها يسوق العربية علشان مايعملش حادثة...تخاف على البنت لما تقعد كتير بتتكلم في التليفون لايكون في حد بيلعب بيها...الام حياتها بتتحول الى تفكير مستمر ودعاء لا ينقطع من اجل ابنائها.

وتعدى المرحلة الحرجة...وتجي غصة القلب لما العيال تتخرج من الجامعة ومفيش وظيفة ولا اي امل في اي شغل. تدعي من كل قلبها...تتصل بكل معارفها مية مرة علشان لو حد عنده سكة لحد من عيالها...تديهم فلوس اكتر من المصروف بتاع الجامعة علشان محدش يكون نفسه في حاجة ومايجيبهاش زي اصحابه اللى بيشتغلوا...تنسى تدعي لنفسها في الصلاة علشان بتدعي لاولادها...وربنا يكرمهم ويشتغلوا اخر المطاف...وتفرح اوي...وتجيب لهم لبس جديد علشان الشغل الجديد ومحدش يقول عليهم حاجة.

وبعد كده بتيجي مرحلة الجواز...تدبر...تزنق على نفسها وعلى البيت وعلى باقي افراد العائلة...تبيع في دهبها اللى شايلاه لليوم ده...تبدل الدهب بحاجات جديدة تنفع شبكة او تبدله بحاجات لبنتها علشان تدخل بيت جوزها متصيغة...وياتى الاحفاد...وتأتى فرحة جديدة في حياة الام...وايضا مرحلة جديدة لم تكن في الحسبان...فتتحمل مسئولية الاحفاد مع ابنائها العاملين! قلبه مايطاوعهاش تخلي الاحفاد ينزلوا حضانة علشان عيالها اولى بالفلوس...فتضحى بوقتها وصحتها وطاقتها في تربية الاطفال من اجل ابنائها...ويكبر الاحفاد وتظل الام وحيدة!!!

محدش بيسئل فيها غير كل فين وفين...مبقتش تشوف حد في البيت زي الاول...معظمهم يكتفي بمكالمة تليفون...دول عيالها كانوا عندها يوميا ... "ياترى علشان اولادهم مش محتاجيني خلاص؟" وتكدب في نفسها وتقول "مشغولين ربنا يعينهم"...وبعدين تزعل اوي انها تعبت وواحد ولا اتنين بس من العيال راحوا لها البيت...وراحوا لها مرة ولا مرتين بس...والباقي بالتليفون...وبعدين الام بتتعب اكتر...فيرتبوا زيارة جماعية...وبالمرة يشوفوا بعض! وبعدين يمشوا سوا وتفضل وحيدة!! 

علشان اولادها مايحسوش بالذنب يأجروا لها شغالة مقيمة...ويقسموا راتبها عليهم...او يدخلوا معاش الام في التقسيمة!! مفيش حد فيهم تنازل وخد الام عنده...اللى خايف من مراته (يخاف تسيب البيت وتاخد العيال...ماهي لو استحملت شهر مش هاتستحمل التانى) واللى خايفة من جوزها مايرضاش (من باب "انا بحب ابقى في بيتي براحتي")...فبيجيبوا لها شغالة! وبعدين ممكن جدا الام تشتكي انها مش مرتاحة وفي ست غريبة معاها في البيت (ما البهوات والهوانم مخدوش اصلا رأيها!!)

فتمشي الشغالة ويحاول الابناء تقسيم الوقت عليهم...مين يبات ومين يروح بعد  الشغل ومين ياخد عياله معاه ومين ينفع اخر الاسبوع ولكن نص الاسبوع لا...وهكذا...وتصبح الام في نظر الابناء "عبئ ومسئولية" ثقيلة. ولو حد فيهم عايز يسافر مصيف بيظبط الكدبة علشان الام ماتعرفش انه مسافر وسايبها في الحالة دي!

وفي من الابناء اللى ظروف عمله لا تسمح له بالتواجد الشخصي مع الام....فيعوض النقطة دي بفلوس زيادة تتصرف عليها! وبعدين لما حد يعمل الحركة دي التانى يعمل كده ...والتالت... وهكذا...في الاخر اللى بيعمل المجهود شايف "اشمعنى انا؟" ويبدأ العند ... والرفض ان واحد او اتنين يخدموا والباقي بشوات في بيوتهم "ما احنا كمان عندنا بيوت وعندنا الفلوس الزيادة اللى ممكن ندفعها زيهم بالظبط"

وتبدأ الخلافات...والمشاحنات...وعلى مسمع من الام!!!

وتلاقي واحد فيهم بيقترح دار مسنين "شيك وغالية وفيها رعاية طبية ممتازة احسن من البيت"

يتقلص قلب الام...تتجمد دموعها خوفا من سخطهم عليها وغضبهم...وتظل جملة واحدة فقط في ذهنا "هو انا عملت ايه في حياتي علشان استاهل المعاملة دي؟" ...مش بعيد تعمل نفسها نايمة...او انها بصحة جيدة ... او انها تريد البقاء وحيدة!!

حد شايف انى ببالغ؟

صدقوني ابدا انا مش ببالغ بالمرة ... والله ما ببالغ! 

يا جماعة اللى عنده ام...او اب... يحافظ عليهم زي عينيه...دول ضحوا كتير علشانك...اتذلوا في اعمالهم علشانك....بلعوا اكل مايتاكلش علشان انت تلاقي تلبس او تخرج اوتجيب حاجة هايفة...سهروا كتير يدعوا ... نسيوا نفسهم سنين طويلة علشان تبقى راجل وعلشان تبقي ست محترمين في المجتمع....صرفوا عليكوا كل حاجة يملكوها علشان تكونوا سعداء متيسرين الحال...اتقوا الله في الاباء والامهات...ربنا ما يحوج حد لعياله الجاحدين ابدا!!

امين!

ريم اسامة 

https://www.facebook.com/groups/329904227056535/