لسانك حصانك!

ساعات الست بيجي عليها وقت وبتضايق اوي ان "لسانها زفر"
يعنى مثلا جوزك دخل عليكي بهدية تحفة كنتى هاتموتي عليها وعاملة جمعية ومكمرة شوية فلوس من وراه علشان تجيبيها وفجأة تلاقيه داخل عليكي بالحاجة دي وبيقولك "علشان انا مجبتلكيش هدية في عيد جوازنا الشهر اللى فات...معلش جت متأخر...كل سنة وانتى طيبة"
احساسك ايه بنفسك وانتى بتبصى للهدية وبتفتكري اخر خناقة بينكوا وانتى نهيتي الحوار "يغور اللبن من وش القرود" لما كان بيقولك انه ناوي يجيب لك هدية في المناسبة دي بس خليها الشهر اللى جاي؟!
تتصل "حماتشيك" واول ما تلاقي النمرة تبرطمى "جتك داهية": الو؟ ازيك يا طنط عاملة ايه يا حبيبتي؟
فالمزغود ابنك يكون سامع وانتى متخيلة انه بغل مش بيفهم - فلما يشوف جدته بعدها بيومين يسلم عليها ويقولها "جتك داهية"!! طبعا احنا عارفين باقي السيناريو الهابط!
جوزك يتخانق معاكي لاي سبب واول ما يسيب الاوضة (لسه والله على الباب بس انتى مستعجلة) تقولي "ابو شكلك"! فيرجع للخلف در ونفتح صفحة خناق جديدة على نضافة!!
مامتك تطلب منك حاجة وانتى "بروطة" مش عايزة تقومي...فتحدفك كلمتين تهزئ علشان مش عايزة تعملي حاجة لنفسك ولا للبيت...وقبل ما تمشي خطوتين يكون لسانك سابقك "عيشتكوا تقرف"....المرة دي مامتك بتجيب ابو وردة وتروقك !
لما مديرك يطلب منك حاجة ويلاقي انها ناقصة او غلط وبرضه مفيش مانع من كلمتين في جنابك...وانتى لسه بتفتحي الباب تبرطمى "بورم اوي!" - مش هاقول حاجة غير ان مرتب سيادتك هاينقص شوية - بما ان ادارة الشئون القانونية شايفين شغلهم كويس!!
بتتمشي في اي موول وواحد راجل خبطك في كتفك او خبط في ضهرك - من غير ما يقصد - اووول كلمة تطلع منك قبل "اي" بتكون "في ايه يا حيوااان؟" وتلاقي انه بني ادم امور جدا - مهذب جدا - شكله ابن ناس اكتر منك يا حقيرة اصلا - ويبص لك اوي كده في قرف ويقولك "انا اسف مخدتش بالي!! كنت باصص في الموبايل!!" - بصراحة شكلك عرة من الاخر! 
حصل قدامي مرة ان واحدة بتقول لتاكسي "شارع كذا"...قالها مش طريقي (كعادة الاخوات التكساجية يعنى)...وقبل ما يمشي كانت حادفة له من الشباك اللى ورا "جتك القرف"...وقف لها ونزل وقالها شوية الفاظ ...ياااااه...الراجل كان عنده ثراء لغوي عالي!
اختك وجوزها شدوا مع بعض قدامك .. وانتى بحركة لطيفة تاخدي اختك المطبخ (اللى قريب من الصالون) وتقولي لها اتلمي شوية مثلا او عيب كده - احترميه...اي كلام من هذا القبيل..تقوم طالعة زي البهيمة "بقولك ايه هوا مابيجيش غير بالسك على نافوخه!"...بصى انتى احسن لك تاخدي موبايلك ومفتاحك وفلوسك وتخلعي فورا من البيت...خصوصا لو شكل الدم بيجيب لك دوخة!
تروحي عند اي حد زيارة في البيت ويقدموا لك "اختراع" من اختراعات الستات الكبار اللى متابعين فتافيت وسي بي سي سفرة! تقدم لك مثلا عصير قشر البطيخ بالمانجو والعسل الاسود! تاخدي شفطة وبعدين وشك يكرمش كده...فطنط تقولك "مزز صح؟"...وانتى صريحة بقى واللى في قلبك على لسانك "ايه القرف ده!!؟" 
حد من زمايلك في المكتب بيتكلم عن اي قيم او مبادئ اخلاقية وامثلة وبتاع - فانتى تبرطمى بصوت يخرم طبلة الميت "ال يعنى!!"
حد من زمايلك بيتفشخر بشطارة عياله ..ويطلب الموقف معاكي شوية مرح بقى فتقولي "اكيد طالع لامه... ذكي" !!
وفي برضه فصل كامل في كتاب "الوقاحة" خاص بالامثال الشعبية! حلوين احنا اوي في استخدام الامثال الشعبية...حماتك تشكر في ابنها وانتى متخانقة معاه ومش طايقاه فيطلع مثل بتاع الخنفسة والحيطة!! او جوزك كتر خيره يجيبلك اتنين كيلو فاكهة ويطلعوا مفعصين ووحشين تقومى رقعاه مثل "الحاجة تقول نيني نيني لحد ما انت تروح تشتريني!!" او يجيلك ابنك ويفضل يسئل شوية حاجات عبيطة (ماهو طفل) ويزداد اسئلة وفتتنرفزي عليه وتقولي له "عرفوا الاهبل من كلامه" _(مبروك عليكي طفل مشوه نفسيا)
على فكرة يا جماعة في فرق بين الصراحة والوقاحة - وبين انك تقولي اللى على طرف لسانك ...او تتفيه!
بابا دايما يقولي "ممكن تكسبي انسان بكلمة...وتخسريه بكلمة"..وده حقيقي...وبعدين لما تشتمى حد خبطك ولا غلط فيكي غلط صغير او عمل حاجة مش على كيفك...يعنى كده انتى خدتي حقك؟ لا انتى كده خليتي اللى قدامك يتأكد انك من بيئة واطية! تعاملي مع الاخرين حسب تربيتك انتى مش حسب تربيتهم هما...وفي شوية اصناف كده ياريت ماتتكلميش معاهم خالص: سواق التاكسي - سواق الميكروابص - اخوهم سواق الاتوبيس...الممرضات الزهقانات...عامل الصيانة...بتاع الانابيب! 
وباقي الناس....اتكلمي معاهم باحترام علشان ماتجيبيش لنفسك عاهة!
وعلى رأي المثل (تششميت - دي مصمصة شفايف بس مش عارفة اكتبها) "لسانك حصانك...ان صنته صانك...وان هنته هانك"


ريم اسامة
https://www.facebook.com/groups/329904227056535/