بالسم الهاري

مشكلة كبيرة بتواجه الستات لما تقرر تعمل اكل حلو....الاكل الحلو يعنى مجهود. اصل في رجالة مش بيعجبها الاكل السهل! متخيلين ان الاكل السهل او اللى مش بياخد وقت في الطبيخ يبقى اكل وحش على طول! او ان الست بتستسهل! وبيقدر اوي بقى الاكل اللى الولية تقف على رجلها بالساعات تعمله! كده يبقى منشكح ومبسوط!!

ايه علاقة طعم الاكل بالوقت؟ الاجابة دي عند الراجل وحده لا غير!!!!!

وايه برضه العلاقة بين الاكل الحلو والمجهود....نفس الاجابة عند نفس الشخص!

يعنى مثلا هانقول اكلة زي المحشي! مشكلة فعلا ومجهود علشان حلة تتاكل في ربع ساعة باقصى تقدير! وكمان ممكن مايعجبوش على فكرة مش شرط يعنى تقفي ويطلع لك كاللو في كعبك وفي الاخر يعجب! خالص!!

يوم ما تجيبي فراخ مشوية من برة...كده انتى تستاهلي الدبح! انتى هاتستعبطي؟؟؟ فراخ جاهزة؟ "اه ما انتى بتوفري مجهودك!!" 

ولو حصل وجبتي فعلا اكل جاهز هايطلب برضه تدخلي المطبخ تعملي حاجة: نفترض جبتي فراخ مشوية هايطلب تعملي جنبها مكرونة ولو جبتي مثلا سمك مشوي هايطلب تعملي رز احمر في البيت علشان مش بيحب بتاع بره او يطلب سلاطة طحينة علشان مش بيحب بتاعة الراجل او بيقرف منها...او يطلب منك تعملي سلاطة (مرار كل ست بيت)!! ومش هاننسى طبعا حبيبنا الاذلي صاحب الفرافيت المميتة "العيش البلدي اللى لازم يتسخن على النار" - ماله الفينو مش فاهمة!! 

ولو في يوم وقلتي لجوزك ياكل تونه علشان انتى تعبانة/كنتى في الشغل/ ملحقتيش تعملي اكل من العيال....امة لا اله الا الله هاتعرف انه كل تونه...مع ان اليوم اللى قبله كنتى عاملة اكل كويس بس هوا بيجي عند التونة وبيفضح الدنيا...يتصل بمامته ويقول اي هبل ويقولها اه لسه متغدي..كلت تونه!! طيب لازمته ايه؟ تقولها ليه اصلا وهيا مالها؟ لكن ازاااااااي لازم الفضيحة تبقى عالمية انك خلتيه ياكل اي كلام هايف "يا هانم"!!

ولو عملتي عدس فرجالة كتير بتعتبر ده نوع من الشوربة...طبق جانبي يعنى...زي شوربة لسان العصفور كده...ماينفعش تبقى الغدا! (مش كل الرجالة بصراحة بس كتير منهم).

لو عملتي كشري غالبا مش هايعجبه او هايتعامل مع الغدا انه "ارديحي" وانك ضحكتي عليه اليوم ده...مع ان الكشري ده ممل جدا في عمايله...حلة للعدس والرز...حلة للمكرونة...حلة للصلصة....حلة للحمص...بصل محمر...ومفيش مانع من عدس معمولين لوحدهم لزوم المزاج!! وفي الاخر مش هايرضى ياكله على العشا علشان انتى كده هاتحرقي قلبه من البقوليات!!!! (ده لو مقالكيش بتاع برة احلى)

ولو حصل ومامتك حبيبتك عملت لك حلة محشي او صينية مكرونة بشاميل او مثلا صينية رقاق...هايقولك "اعملي لنا بقى جنبها شوية لحمة محمرة"!! هوا حرام الست ترتاح يوم من المخروب المطبخ؟؟ حرام يوم تريح صوابعها من البصل والتوم والنار؟ هوا لازم ندخل المطبخ؟ انا ساعات بحس ان الست اتكتب كتابها في فرن بلدي مش عند مأذون!! زي ما يكون بياخد بباقي فلوسه خدمه!! مش ممكن كده!!

ومثلا لو انتى متعودة تجيبي الخضار متنضف جاهز (عادي حقك على فكرة) او لو كنتى شاطرة شوية وبتعملي ممبار وبتجيبيه متنضف اوي مش محتاج مجهود منك اضافي او بتجيبي الخرشوف متنضف بدل ما تجيبيه شكل الصبار وبدل ما ايدك تسود وضوافرك تسيبك وتهاجر وجلد ايدك يدعي عليكي...المواضيع دي بتغيظ الرجالة اوي...بيتضايقوا اوى ان الست عايزة تريح نفسها....الله؟ حقها!! حد يلاقي الراحة ويرفض؟ هوا الراجل مش بيريح نفسه برضه؟ فين الراجل اللى بيشيل كوباية مكانه ولا بيسخن لنفسه عيش او بيغسل قمصانه على ايده زي ما بيطلب من الفلبينية مراته؟ فين؟ مفيش!! يبقى الراجل بيريح نفسه على قفا الست....خلي الست يا سيدي تريح نفسها على قفا جيبها!! هيا حرة!!
ولما ياكل يسئل "ده اللى جبتيه من ام محروس" (اللى بتنضف الخضار)...كل مرة لازم يسئل نفس السؤال مع انه عارف بس برضه لازم يسئل....ولازم يقولها انها غلط وانه مش فارق معاها صحتهم علشان هيا مش ضامنة الادوات المستعملة في تنضيف المحشي او الممبار وخلافه... وكله كوم والملوخية الاكياس كوم اخر...بتجيب لبعض الازواج جلطة خفيفة!! لازم الست تجيب الملوخية وتقطفها وتغسلها وتنشفها وبعدين تديها بالمخرطة لحد ما يطلع لها عضلات السباحة!! 
وفي رجالة مش بتحب الفراخ المجمدة...لازم بتاعة الفرارجي!! ليه طيب؟ ما كلها كائنات ربنا...ايه الفرق؟ "انا مش باكل المجمد اللى طعم البلاستيك ده!!" ... سبحان الله!!!
نرجع ونقول مش كل الرجالة...بس والله بجد كتير جدا بيتأمروا على الاكل لمجرد ان المجهود اللى مبذول فيه مش على المستوى اللي يريحه كراجل!
بصوا بقى...اللى جوزها مش بيتأمر على الاكل يا ريت ماتشتكيش منه في اي حاجة وتبوسي رجلك وش وضهر...واللى جوزها بيتأمر بطلي تقولي له في سرك (بالسم الهاري)....على الاقل صفَي نيتك اهو تطلعي لك بثواب عند ربنا...ربنا يرحمنا!!

ريم اسامة
https://www.facebook.com/groups/329904227056535/