نعمل حفلة...ولا فلوس على الارض؟

كل سنة وانتوا بخير وسعادة...يا رب تكون سنة حلوة ورايقة ومتدلعة كده...لحسن السنتين اللى فاتوا كانوا حاجة غم! 

ناس كتير بتحب تخرج ليلة راس السنة...مش تقليد الغرب ولا بيتمسحوا في الاجانب ولا اي حاجة...مجرد فرحانين بسنة جديدة وامل انها تكون حلوة ومليانة خير وفلوس وصحة وحظ احلى.

في بيت بابا وماما دايما بنحتفل بليلة راس السنة...الحقيقة يعنى انا من اسرة بتعشق الاحتفالات بشكل عام...زمان (ايام الروقان) كانوا بيحتفلوا بكل حاجة وكان ناقص يحتفلوا بأول الاسبوع :) طبعا اعياد ميلادنا...العيد الكبير والصغير....كذا عزومة في رمضان...مولد النبي...شم النسيم...عيد الام....عيد راس السنة الهجرية....عاشوراء...والتخرج من الجامعة...وطبعا راس السنة الميلادية...غير ان كل ويك اند كان لازم نعمل "منظر" بمعنى نجيب كيس كبير لب وسودانى وعشا مختلف ونختار فيلم او مسرحية نتفرج عليها سوا...والله العظيم من احلى الذكريات...وفي الشتا نجيب البتاع اللى بيتكسر ده اسمه ايه....البيكان! ونجيب الزرادية ونكسر (وطبعا لازم نفرم الحشو اللى جوا) ونجرب في غيره...ومن طقوس القعدة دي ان القشر في الاخر يدخل في رجلينا!! :)

والله كانت ايام جميلة (ومازالت الحمد لله) واحنا طلعنا زيهم....بنحب الاحتفالات (اول عيد ميلاد لابني الكبير عملته اربع مرات...اه والله العظيم اربع مرات!! ده الملك فاروق معملش كده!! حفلة كبيييرة لاهل...حفلة كبيرة الى حد ما للاصدقاء...حفلة صغيرة في بيت اهلي..حفلة صغيرة في بيت اهل جوزي....محدش يتريق والنبي علشان كل ما بفتكر الفلوس اللى طرقعناها على عيل مش فاهم اصلا اتقهر)

المهم...قصدي من الرغي ده كله انى اقول....بلاش نكد! اي مناسبة حلوة استغلوها واعملوا احتفال...اي هبل في اي بتنجان...لما يجي رمضان هووووب اشتري فانوس وفرعين نور وشغليهم وعيشي جو الاحتفال....راس السنة هاتي شجرة صغيرة وزينة وبابا نويل وطراطير (مش تشبه بالغرب...احنا بنقتبس منهم روح الفرحة بس)...لو فى العيد هاتى كيسين بمب محترمين وفرقعي ولا يهمك...اعياد الميلاد لااازم بجد تحتفلوا....مش بدعة ولا غيره...احنا بنتحجج باي حاجة علشان بس ننبسط...نفرح....عيد جوازك اخترعي له طقوس وصممي عليها كل سنة...عيد ميلاد عيالك...اعزمي انشالله شوية ناس قليلة بس ازرعي جوا اطفالك ثقافة الاحتفال! 

والله صدقوني دي مش فلوس على الارض....احنا بنشتري السعادة.

حد يطول يلاقي السعادة بفلوس ويرفض؟

عمر ما الحفلة كانت فلوس على الارض ابدا...على الاقل ده في اعتقادي الشخصية (والعائلي - كلنا كده)...السعادة بتتضاعف لما بنشاركها...والحزن بيتقسم لاجزاء صغيرة لما بنشاركه...المشاركة هي المفتاح!

شاركي الناس فرحتك باطفالك (نجاحهم او اعياد ميلادهم)....شاركي الناس بانتقالك لبيت جديد واعملي حفلة افتتاح او تدشين البيت (كان نفسي اعمل الموضوع ده بس جت لي الفكرة متاخر) ... في شم النسيم ممكن تعملي تجمع في بيتك للمقربين مع بوفيه من اكلات المناسبة دي (المشكلة الوحيدة هي حالة التناحة اللى بعد الاكل والبصل)....اعزمي الناس على عشا شرقي (اورينتال:)) في بيتك مش هاتكلفك كتير وهاتي كل الاصناف بقى زي الفول والطعمية والبصارة والبتنجان والسلاطة وخلافه...محدش هايعترض...بالعكس...الناس هاتنبسط انك جمعتيهم....او اعملي يا ستي طقم بيتزا (نوعين او تلاته بيتزا في البيت هاتكفي الناس)....ولا هاتقولي فلوس في الارض برضه؟

المشكلة بقى ان لما الواحد بيكون متحمس اوي لتجميع الناس ممكن يلاقي حد يقوله "وانت تبهدل بيتك ليه؟ واشمعنى فلان مايعزمش؟ ما بيته اكبر"...لو قررتي تعملي تجمع في بيتك ولقيتي الشخص السلبي ده....نصيحة...متعزميهوش!!!

افرحوا يا جماعة...احنا بنعيش مرة واحدة بس....خلي الناس على الاقل تفتكركوا بحاجة كويسة وانكوا كنتوا بيت الود وجمع الشمل.

كل سنة وانتوا طيبين وفي احسن حال وفرحة 

ريم اسامة

https://www.facebook.com/groups/329904227056535/