وعن الدايت اتكلم!

رفيعة او مليانة او تخينة او منفجرة من التخن...كلنا عايزين نعمل دايت!!

دايما بنبص لمقاس بنطلون اصغر مننا بمقاسين ونتمنى يدخل فينا ... مع ان مقاسنا موجود بس دايما شايفين اننا بلا مبالغة "شجر"...ضخم وكبير وشكله غبي!

وانا بقى ليا في قصص الدايت ده باع طويل عريض متضخم! وكل ما افشل في دايت..اديها اكل ...اتخن اكتر وابص على صور المرحلة اللى فاتت واستعجب هو انا كنت عايزة اخس اصلا ليه؟ ما انا كنت سوبر مزة اهه!!

ومن اللى عملته في نفسي كان اختراع كل بنات مصر جربوه ... وهو "شوربة الكرنب!!" ... مج الصبح  وسلطانية الضهر وطبق بالليل...وطبعا بتاخدي الوصفة من حد من اصحابك او من على النت او تسمعيها من حد...وهي شوربة شبه المجاري كده (لونا وموضوعا) وبعدين تأثيرها على الجهاز الهضمي بيكون عالي اوي....هوا بس اللي بيقولك على وصفة الشوربة دايما بينسى يقولك "اربطي في رجلك كيس رمل" علشان هاتطيري من كتر الانتفاخات!!!

كل واحدة فينا عندها في دولابها على الشمال خالص كده ورا فساتين السواريه اللى في الكيس بتاعها...كام شماعة متعلق عليها لبس جديد مقاسه صغير (اوي) علينا...واحنا بنجيب الحاجات دي على اساس ان ده الحافز اللى هايخلينا نخس علشان مش ممكن هانرضى اننا نرمي فلوسنا في الارض في هدوم مش هاتتلبس! خلي عندك امل يا حياتي ان شاء الله بنتك تكبر وتلبسه!

وكل واحدة فينا برضه عندها بنطلون اسود (باستيك او بلا منظر) بتستخبى جواه على اي حاجة طويلة فضفاضة شبه الملاية لما تقفليها من الجنبين ...احتشام بقى (بس احنا فاهمين بعض كويس!!)

كلنا مش بنحب شكلنا...كلنا بنكره الصور...كلنا بنكره مرايات الاسانسير اللى بتجيبك حتة واحدة من فوق لتحت...كلنا بنكره نبص في صورنا زمان (خصوصا بقى صور شهر العسل) علشان بنحزن على شكلنا دلوقتي!! وبالتالي احنا لا بنستمتع باكلة حلوة (علشان كمية الشعور بالذنب واحنا بنطفح) ولا بننبسط بالدايت (لاننا بنبوظه بعدها بساعات)...هنيئا لنا جسم الشجرة!

بنات كتير بتروح لدكاترة الرجيم متخيلين ان هما دول اللى في ايدهم الشفا...وانا رحت بقى لكتيير اوي سعيا ورا قوام ميس ايجيبت...رحت مرة لدكتورة مكانتش بتوجه لي كلام غير لما تقولي "ياللا يا رشيقة"...نوع من التحفيز السلبي طبعا...والست دي كانت بتدينا ورقة فيها جدول نكتب فيه كل حاجة كلناها الاسبوع كله...طبعا كنا بنحمرأ...اكتب لها ازاي يعنى انى بوظت الاسبوع كله وعلى اخر تلات ايام كلت تفاح فقط؟! ماينفعش! هاتقفل العيادة!

ورحت لدكتور برضه كان بيدخل البنات كلها 15 مع بعض..طابور كده لطيف اوي وكل واحدة تسمع اللى قبلها نزلت كام كيلو او طلعت كام كيلو وتسمع الكلمتين اللى فيهم النصيب برضه بتاعه زميلتها...ده الدكتور الوحيييد اللى خسيت معاه جامد اوي...خوفا من الشماتة من طابور البنات اللى ورايا...ولما بكون عارفة انى مش خاسة خالص...كنت بقف اخر واحدة واستحمل اللطعة!

وطبعا كل ما واحدة فينا تخس كيلو تجري على الشماعات اللى على الشمال...احتمال ضئيل تدخل فيها الهدوم الصغيرة دي...بس طبعا برضه الهدوم بتقف عن الرقبة ومش بترضى تكمل المشوار!!

من غتاتة التخن برضه ان كتير اوي من الكراسي البلاستيك اللى في النوادي دي بتتحشر! ولو متحشرتش تدعي وانتى بتقعدي انها متفتتش تحتيكي (ماهو راح ولا جه بلاستيك)...او تتمنى من قلبك مايكونش اصلا مكسور و تقعي زي شوال القطن متعرفيش تقومي!!

رحت برضه لدكتور وقبل ما ادخل ادوني ورقة اسئلة اجاوب عليها (بكل امانة مع حفظ خصوصية المريض) وجه سؤال "بتاكلي في السر؟"...بصراحة مكنتش عارفة اجاوب...هوا لما اصحى الفجر جعانة واكل يبقى كده اكل في السر؟ لما اجيب شيكولاته زيادة واخبيها في الشنطة واكلها من غير ما حد ياخد باله علشان التهزئ على صحتي يبقى كده اكل في السر؟ ماهي من فلوسي انا حرة...مش لازم اكل قدام الناس! ولا ايه؟ 

انتوا طيب بتاكلوا في السر؟ طيب بتستخبوا من مين؟ من اجوازكوا ولا ابهاتكوا ولا اخواتكوا ولا من نفسكوا؟!

http://www.facebook.com/groups/329904227056535/

ريم اسامة