رسالة الى كل اب غبي

"الولد ده مش نافع على فكرة - علشان كل ما اجي اقوًمه تقولي لي ملكش دعوة بيه"

كام مرة سمعتي البؤ الحمضان ده من جوزك ابو عيالك؟

 كام مرة تأكدي له ان الولد كويس وذكي ومش محتاج عنف لتقويمه؟ كام مرة قالك انك ضعيفة قدامه وبتبررى لنفسك تصرفاته الوحشة بانه لسه صغير؟

كام مرة اتخانقتوا علشان الاولاد؟ كام مرة اتهمك بشكل مباشر وغير مباشر انك السبب ان اولاده مش قريبين منه؟ ولما تقولي له يعنى متخيلني هاقعد اقولهم ابوكم وحش؟مايردش او يقولك "والله بقى معرفش!"

ليه اسهل حاجة عند الرجالة انه يشخط او يبرق او يرفع ايده؟ ليه مفيش صبر؟ مع ان عنده صبر على اللعب الاستراتيجي اللى على النت!! اللعبة اللى لما تشتغل محدش يقرب منه زي ما يكون متكهرب او النداهة ندهته!!

والرجالة بتستغرب اوي ان اولادها مش بيحبوا يقعدوا معاهم او يرفضوا ينزلوا معاهم لوحدهم (ده لما الست تزن على جوزها اسبوعين ياخد الولد يتفسحوا لوحدهم) وليه في حالة ان يكون عنده بنت لازم ولابد وحتما يشد عليها اكتر من الولد ولو لقاها سرحانة شوية يزعق لها ويتهمها "سرحانة في ايه؟؟؟"

وغالبا سرحانة هاتقولك ازاي على عيد ميلاد صاحبتها اللى هاتفطس وتروحه وعارفة مقدما انك هاترفض بلا مبرر ولا سبب!

المقالة دي للابهات اللى مطنشين ومتخيلين ان اولادهم هايحبوهم لمجرد ان اسمه جه بعد اسمهم في البطاقة الشخصية:

الى كل اب:

- انت متخيل لما تشد على بنتك هاتطلع مؤدبة؟ انت متخيل ان الادب هو انها متعرفش اولاد و لا تفكر فيهم؟ مخك الضعيف خيَل لك انك لما تزعق لها مش هاتصحاب من ورا ضهرك؟ ولو بقيت عنيف معاها هيا مش هاتلاقي اساليب لا نهائية تعمل بيها الغلط على كيفها؟ مش الممنوع مرغوب برضه؟ يعنى انت لما تفضل تقولها متكلميش ولاد في المدرسة - متخرجيش مع اصحابك لوحدكوا - ممنوع سينما من غير ما مامتك تكون معاكي -  ممنوع كلام في التليفون في الاوضة لوحدك انتى تتكلمي هنا قدامنا - ممنوع تستخدم الكمبيوتر في اوضتها - ممنوع تسهر تتفرج على التليفزيون لوحدها.....يا ترى هيا كده هاتطلع مؤدبة ومتربية ومتدينة؟! احب اقولك انك (لامؤاخذة) غبي....علشان كل ما بتخنق عليها اكتر ....هاتعمل اللى على كيف كيفها اكتر واسهل ... ولكن لو بقيت صاحبها ...لو كنت بتروح معاها النادي وتدخلها تتدرب اي رياضة ويكون لها زمايل اولاد وعادي انهم يكونوا اصحاب في شلة كبيرة...هيا هاتخبي عليك ليه؟ ما ده مجتمع طبيعي ان يكون في ذكر وانثى...في النور...قدامك...هايبقى قدامك لانها مش مضطرة تخبي عليك...لما تيجي وتقولك انا حاسة ان فلان بيكلمي اكتر من باقي زمايلي....وعلى فكرة لو انتوا اصحاب هيا فعلا هاتيجي وتقولك كده مش هاتقول لمامتها اللى بتخاف عليها بسرعة وتنهرها...لا هاتروح للاب الحكيم الهادي...قدامك طريقتين للموقف ده: يا تشخط فيها وتقولها ايه قلة الادب دي وتمنعها من النادي...وفي الحالة دي على فكرة هاتتكلم معاه وهاتحبه وتصاحبه ومش هاتروح الدرس وهاتخرج معاه ....او الحل التانى انك تفهمها ان اهتمامه بيها مش هايستمر لو هيا بقت سهلة...مش هايحترمها لو اتنازلت...وتفهمها ان الحب عامة او الاعجاب ليه سكة واحدة بس واحنا كلنا عارفينها وهي الارتباط الرسمي قدام كل الناس..وبدل هوا مش هايقدر يبقى خليكوا زمايل احسن...وباسلوبك وبطريقتك تخليها تنسى ان كان في حد مهتم بيها شوية عن باقي زمايلها. وفي نفس الوقت ماتنساش ان الانثى مجرد شوية مشاعر كتير اوي اتحطت مع بعض...يعنى لو ملاقتش التفاهم والحنان من ابوها...هاتلاقيه في راجل او ولد تاني!!

- انت ازاي عايز ابنك يحبك وانت مش مهتم بتفوقه؟ ابنك بيلعب اكتر من رياضة وبيحبها وشاطر فيها...طالما ماجبش ماديلية يبقى هواية عبيطة زي باقي الهوايات....ازاي مهتمش بهواياته...ازاي مهتمش لما كان زعلان انه خد المركز الرابع ومخدش ماديلية ولا حتى برونزية؟ ازاي لما ابنك جه يخرج مع اصحابه رفضت تديله فلوس زيادة عن مصروفه علشان كده انت هاتعلمه البذخ؟ ليه لما امه بتكون طيبة وحنينه معاه تتهمها (قدامه) انها اللى هاتبوظه؟ ليه بتزرع فيه ان الحب والحنان ودلع الام للابن ده بوظان؟ ليه بتجمد قلبه عليكوا؟ ما هايجي الدور عليك هاتدور على حب وحنان وانت كبير ومش هاتلاقيه لانك زرعت فيه ان ده غلط!! ليه حتى وهوا صغير لما كنت بتضطر تقعد معاه كنت بتتشغل يا بقراية كتاب او جرنال او تتفرج على التليفزيون ولو عمل دوشة وانت قاعد معاه تنهره وتزعق له وتشتمه وتخرجه بره الاوضة اللى انت فيها؟ ليه متخيل ايها الاب الغبي الفاشل انك لما تقعد مع ابنك ترغوا في اي هبل انك كده بتقلل من وقارك؟ ليه لما يهزر معاك تقوله دي قلة ادب ولا يخلو الموقف من التعنيف ويمكن الضرب؟ هوا مش قصده يقل ادبه على فكرة...بس هيا دي طريقة الهزار اللى بيهزرها مع اللى بيحبهم (زي امه واصحابه)...ليه مش بتجيب له هدوم جديدة من نفسك...ليه لازم تكون بمناسبة او علشان حاجة عنده باظت ومفيش غيرها فتضطر تشتري له؟ ليه لما مصروفه يخلص مش بتديله تانى؟ ليه مش بتزود له المصروف؟ هوا لو المصروف زاد هايشرب سجاير ولو فضل زي ما هوا مش هايشرب؟ هوا هايشرب سجاير لو ملقاش اللى يكلمه بخصوصها بعقل وحب...ولو كلمته بالعقل وهوا مش بيحبك هايسمعك ...لكن مش هايقتنع!

لكل اب غبي...ارجوك بطل غباء!

 http://www.facebook.com/groups/329904227056535/

ريم اسامة