والله العظيم انا بنت ناس

انا شفت نص عاهات البلد قبل ما اتجوز - نصهم بالظبط انا متاكدة ... مناظر واشكال وامخاخ متعفنة.

ومتاكدة انكوا كمان كده.

في بقى ناس محظوظة واتجوزت عن حب ....وفي ناس زي حالاتنا كان ممنوع نحب اصلا ولا تتعرف على حد ولا نتكلم مع حد غير قرايبنا!! (وحتى حوار قرايبنا ده كان فيه تحفظات برضه)

المهم احب اشارككوا بعض التجارب الانتحارية

مبدئيا زيي زي باقي البنات كنت بكره جدا فكرة المقابلات بتاعة جواز الصالونات دي - واه برضه زيكوا بحس انى بضاعة وحد جاي يتفرج عليها وان الافندي يقرر عاجباه البضاعة ولا يشوف فاترينة غيرها!! بس بما ان مكنش في سكة اخرى للجواز غير دي في عيلتي فكنت بروح طبعا غصب عن عين اهلي.

المهم

مرة رحت مع ماما نقابل واحد من طرف صاحبة ماما - ورحت ولقيته جايب نص العيلة معاه - مامته وخالته ومش فاكرة مين كده...وطبعا قعدنا لوحدنا وجه صدفة (ٍسبحان الله) اتنين من اخواته يسلموا علينا!! واحنا بنتكلم بداية من اسمك ايه علشان نسيت نهاية الى الجامعة والشغل والمبادئ (ال يعنى)....واللى هنجت عنده بصراحة انه قالي حاجة وقفت عندها كتير واستغربت اكتر...قالي "مشكلتي فعلا انى مش بعرف انشف الحمام بعد ما استحمى!!!"

- نعم؟! - دي انا

- اه والله...حاولت حل حاجة ...دخلت الستارة جوا بتاعة البانيو...لزقتها ...كل حاجة مانفعتش وانا مش بعرف انشف الحمام

كان نفسي اقوله اتجوز المساحة بس قلت مفيش داعي! خليني مؤدبة اكراما بس لامى وعلاقتها بصاحبتها. وطبعا الموضوع انتهى اكلنيكيا قبل ما يبدأ

مرة برضه جه واحد في البيت - صاحب بابا ومراته وابنه ...جايين البيت من بابه اهه وانا قلت احسن مش هاخرج من بيتي تانى ولو القعدة مش عجباني ادخل جوا. مامته بس هيا اللى كانت بتتكلم وهوا شارب صمغ لزق لسانه في سقف بؤه!

وجه وقت اننا نقعد لوحدنا "علشان الاولاد يتعرفوا على بعض"...قمت من مكاني وياريتني ما قمت!! اول سؤال "هوا انتى حلوة كده على طول؟" (لا والله هوا بعد الضهر فقط...الصبح اجارك الله بيكون لوني فوشيا!!) وبعدين قالي "مامتك امورة اوي - انتى اكيد طالعة شبهها" (فضل صوت في دماغي يقول "الواد يا عين امه طلع اهبل" بس حاولت مسمعوش الجملة دي في وشه) والقشة اللى قسمت ظهر البعير لما قالي "على فكرة انا مبقتش اخاف ادخل للمدير" !!! شكرا لزيارتكوا وياريت ماتكررش تانى!!

مرة رحت برضه مع ماما وصاحبتها نقابل واحد في نادي...البيه جه متاخر علشان راحت علي نومه! المهم ماما وطنط انسحبوا وسابونا القعدة اياها علشان "الاولاد يتعرفوا على بعض" وماما وطنط نسيوا نفسهم في الرغي تلات ساعات!! يا ربببي تلات ساعات هاتعرف عليه ولا هاحلله نفسيا؟! واحنا الاتنين مبلعناش بعض من اول نظرة وتلات ساعات كانت عذاب حقيقي...معظم الوقت قاعدين ساكتين وهوا طلب لي نسكافيه يتيم في اول نص ساعة وخلاص على كده...ياللا...ربنا يسامحها ماما بقى!

مرة برضه جه واحد البيت...جه متاخر ساعة كاملة واول ما دخل قالنا معلش اصلي دخلت اصلي العشاء في الجامع (تقريبا كان قصده جامع في محافظة تانية) ودخل جايب في ايده علبة صغيرة فوشيا كده ملهاش منظر...وشكله كان لسه جاي من الشغل وواقع جوع...قعد على الكنبة وانجعص اوي اوووي كده وفرد رجليه وريًح ضهره ولا اكنه قاعد مستنى مترو المرغني! المهم مبصش ناحيتي اصلا ولما بص سئلني سؤال يتيم "انتى بتشتغلي؟ (قلت له ايوة) بتشتغلي فين؟ (قلت له فين)" وبص الناحية التانية وكمل حديثه الشيق عن السياسة! وماما بعد الشيكولاته والعصير جابت جاتوه...ده حط راسه في الطبق مرفعوش غير وهوا مخلص جاتوه وساليزون وخد تانى وشرب كوز مياه بعديهم!! طبعا كان مرفوض خصوصا لما فتحت العلبة الفوشيا اللى لقيت جواها كيكة من الفرن!!!! 

كل اللى جه في مخي "والله العظيم انا بنت ناس"


http://www.facebook.com/groups/329904227056535/

ريم اسامة