هيا القهوة دي خروجة؟

اللى جوزها متجوز القهوة عليها ترفع ايدها!

خلاص خلاص نزلوا ايدكوا مش عارفة اعد...اللى جوزها مش بيروح القهوة وبيحب يقعد في البيت مع عياله ترفع ايدها...يا ستات اللى جوزها بيحب يقعد معاها هيا والعيال ترفع ايدها...ايه ده؟؟ ولا واحدة؟!!

ممم...طيب!!

القهوة بالنسبة للراجل هي البيت الاساسي على فكرة - هي المكان اللى بيستريح فيه من عناء الشغل...من المشاوير الطويلة...من زحمة المرور وتكسير الاعصاب فيها...ومنك انتى شخصيا!

القهوة زي شربنا احنا للشاي بس عند الرجالة ...اول ما يصحى من النوم في الاجازة ينزل القهوة...بعد صلاة الجمعة لازم يروح القهوة...بعد الغدا احتمال يروح القهوة (لو مدخلش ينام),,.,لما يصحى يعملك اي مشوار اهبل علشان يبقى عمل حاجة في الويك اند (وغالبا بتكون زيارة لامه) ويوصلك البيت ومن بره بره على القهوة ...والخميس في برضه السهرة الكبيرة على القهوة!!

ايام الشغل عامة بيرجع من الشغل ...يتغدى...ينام...يصحى يقعد قدام التليفزيون يفوًق من النوم ساعتين وينزل القهوة ويرجع متاخر...وكل يوم تسئليه اتاخرت ليه علينا يقولك حجة من دول:

- اصل فلان الفلاني كان عنده مشكلة وعيب اسيبه وامشي ...هاقوله ايه؟ خايف من مراتي فهارجع بدري؟!!

- اصل كان في عربية حابسة عربيتي قدام القهوة

- لقيت العجلة اللى ورا نايمة

- انا بقالي تلت ساعة على فكرة تحت بدور على ركنة للعربية

- فلان جه من السفر وكان نفسي اشوفه

- كنت بتكلم في الشغل!!

ويجي الخميس المقدس ده بقى تلاقي من بعد ما يرجع من الشغل كده تليفونات ورسايل على الواتساب والفايبر ورسايل عادية وطول ما انتى قاعدة تيت زيوو تيت بيب تررن..من بعد الشغل على طول تفضل الرنات المختلفة ترن وانتى حاسة انها بتوترك اكتر...وبعدين يوم الخميس تقولي له ممكن مثلا نودي الاولاد الموول ...يقولك اجي من الشغل تكونوا جاهزين ناكل وننزل..وبعدين يفكر...يقولك لا انا هاجي من الشغل تنزلوا لي ونروح ناكل بره...فانتى يا عيني هبلة وبتفرحي...بس حقيقة الامر انه عايز يبدا خروجتك انتى بدري ويخلص من الزن بتاعك انتى والعيال علشان خروجة الاسبوع . (يسلق الخروجة ويحشر كل حاجة فيها يعنى اكل برة وتلاعبوا العيال في الplaying area وتعملوا شوبنج البيت وتشتروا لعب للعيال واي حاجة انتى عايزاها وتشربوا اي حاجة في اي كافيه ) ..علشان يروجعكوا  البيت بدري على قد ما يقدر علشان يبدا الخروجة الحقيقية اللى هوا مستنيها وهيا "القهوة العظيمة"... وخروجة الخميس بتاعة القهوة كلها "options" الحقيقة...يعنى يتجمعوا على القهوة مثلا وبعدين يروحوا اي حتة ياكلوا اي حاجة ويرجعوا القهوة تاني...او يتجمعوا على القهوة واللي عايز يروح سينما يروح واللى عايز يستنى على القهوة يستنى لغاية ما الفيلم يخلص ويرجع القهوة تانى...او يطلبوا اكل على القهوة...او يجيبوا لب وسودانى...او يلعبوا طاولة...او دومانو...ولازم طبعا يرجع لك الفجر ولما تتجرأي وتنطقي يقولك "ده يوم في الاسبوع يعنى اربع ايام في الشهر...هوا حرام لما اتفسح لي اربع ايام في الشهر؟"

ده يوم الخميس...ويوم الجمعة من قبل الصلاة برضه تييت وتررن وبيب وهوا يرد عليهم طبعا وينزل الصلاة ويتاخر جدا وتتصلي علشان انتوا معزومين على الغدا في بيت اهلك والعيال زهقت من كتر ما هي لابسة ومش بتنزل..فلو رد عليكي هاتسعمي صوت الطاولة وناس بتزعق ويقولك انا بحاسب وقايم اهه!! مكشوف عنك الحجاب ماشاء الله...كل ما تتصلي يكون بيحاسب وقايم...ما لو كان صبر القاتل على المقتول...كان القاتل جاله شلل!!

ويحبك القهوة بقى في الايام كلها لما تكونى محتاسة بالعيال...حد فيهم سخن والعيل التانى مطلع روحك....تحبك القهوة وانتى عندك عزومة وهوا لازم يقعد بيهم علشان مش هاتخلصي السنة دي الاكل بالمنظر ده.... تحبك القهوة اللى من بره بره دي وانتى عايزة تطلعي تعشًي العيال وتدخليهم الحمام وتغيري لهم هدومه وتترجيهم يناموا....يحبك النزول وانتى نفسك حد يقعد معاكي! تحبك القهوة وانتى لسه مخلصة مطبخ وهاتدخلي تلبسي حاجة نضيفة تقعدي معاه...بتحبك القعدة مع الاصحاب وانتى وحيدة في البيت والريموت بينهار تحت ايدك من التقليب من كتر الزهق!

وفي شوية كلاشيهات كده بتتقال لما يا مجرمة تتجرأي وتتكلمي عن بيته الاصلي اللى بيروحه كل يوم:

- هيا القهوة دي خروجة؟!! ده احنا قاعدين في الشارع (طيب انتوا بتحبوا قعدة الشوارع ليه لو هيا مش ممتعة؟)

- انا بنزل والعيال نايمة يعنى مش مقصر في حاجة

- انا طول النهار بشتغل من حقي ساعة ولا ساعتين لنفسي (مش مهم طبعا قطعة الموبيليا اللى متجوزها اللى مش بتستريح ساعة في الاسبوع...مش في اليوم!)

- هيا جت على الساعة دي؟ ما انا لما بكون في البيت بتقعدي انتى في المطبخ ...اعملك ايه؟ 

- انا مش بصرف كتير على القهوة (مش متخلين انه مش موضوع فلوس)

- انا مش فاهم القهوة عاملة لك حساسية اوي كده ليه؟؟ امال لو مكانتش القعدة كلها رجالة كنتى عملتي ايه؟!

- انا بنزل علشان اشرب سجاير/شيشة براحتي علشان الولاد مايجيلهمش حساسية (يااااه يا جماعة الدمعة هاتفر من عيني)

واحب احط بس التاتش الاخير بتاعي ... الرجالة على القهوة نمًَامين اكتر من الستات...وكل واحد فيهم بيعمل دكر على التانى...وكل واحد فيهم بيعمل حساب الناس اللى قاعدين كويس اوووي في كل تصرفاته خصوصا لو كانت معاه مراته وقابل حد منهم برة...علشان الليلة والحفلة اليوم التانى ماتبقاش عليه!!!


http://www.facebook.com/groups/329904227056535/

ريم اسامة