حاجة تضايق اوي لما تعلم حد اي حاجة من باب الصداقة او الاهتمام او حتى طيبة القلب وتكتشف ان الانسان ده بيستغلك!!
لما تعلم حد حاجة...زي مثلا طبخة معينة...فتلاقي الست دي عملتها وبتوزع منها في كل العيلة علشان تثبت انها شاطرة!! مع انك انتى اللى معلماها...واكلك احلى من اكلها...وبتعرفي اصلا تطبخي احسن منها...لكنها تثبت بجميع الوسائل والطرق انها اشطر!! طيب ليه؟
هوا كده!!
لما تعلمي زميل جديد في الشغل اي حاجة...وتقولي له "لما تخلص الملف ده ابقى قولي" علشان تصلحيه ....فهوا يخلص الشغل ويجري على مديرك علشان يشوف ان الزميل ده بيشتغل!!! وشاطر...مع انك اللى معلماه...مع انك انتى الاشطر وانتى اللى متعلمة الشغل على اصوله وعارفة كل حاجة بتتعمل ليه...لكن الزميل جه خد الكريم شانتيه اللى فوق الشغل ونسبه لنفسه!!
تكونى موهوبة او عندك هواية وشاطرة فيها....هانقول مثلا صناعة الاكسسوارات (ودي منتشرة اوي اليومين دول)...فتقولي لصاحبتك فهيا تتحمس للفكرة...وانتى بهبلك وطيبة قلبك توريها الحاجة بتتعمل ازاي والسر في انها تفضل مربوطة ببعض...فتروح هيا شارية كمية محترمة من الخامات وتعمل كمية اكسسوارات خفيفة وكتير...ومش بس كده....تبيع لاصحابكوا المشتركين!!! هيا كده حرقت لك الكارت...اصلك يعنى هاتبيعي لمين غير لاصحابك؟؟؟ هيا حرقت الكارت مع انك اللى معلماها...واللى ارشدتيها على السكة اصلا!!! ولو فكرتي في يوم تبيعي انتى بقى حاجاتك...هايتقال انك بتقلدي فلانة!! مع انك الاصل!
لما تدفعي فلوس علشان تتعلمي صناعة الكيك والمعجنات ...وطريقة تزيين التورتات وطريقة عمل الكب كيك زي المحترفين...وتقولي لصاحبتك على الكورس وهيا تسئلك "ازاي بتظبطي المقادير" وتقولي لها السر...دايما بيكون في سر لاي اكلة حلوة...فتاخد هيا السر الصغنن ده اللى انتى دفعتي فيه فلوس علشان تعرفيه...وتعمل مشروع كيكات وتورتات!! ايه رايك؟ مبسوطة؟؟
زي ما يكون عندك فكرة جميلة جدا لحفلة عيد ميلاد ابنك مثلا...ابنك بيحب سبايدر مان...فتفكري ازاي تبسطيه بفكرة جديدة...تدوري كتير على ما تلاقي قاعة رخيصة....وتقرري تعملي تورتة على شكل سبايدر مان طبعا....وكمان تزيني المكان كله زي الفيلم....وتجيبي بدلة الشخصية لابنك مع الماسك...وتجيبي ماسكات لكل الاطفال في الحفلة....وتخلي منظم حفلات يعمل بلالين باللون الاحمر والاسود على شكل الشخصية لكن بجحم كبير اوي....والاطباق والكوبايات كلها سبايدر بتاع ده....وتفكري في كل التفاصيل كلها كلها كلها....وتحكي لواحدة صاحبتك على افكارك دي وتشاركيها فرحتك وقد ايه انتى مستنية الكام شهر دول يعدوا علشان تنفذي الفكرة فعلا...وتتعزمي بعدها بشهر على عيد ميلاد "سوبر مان" لابن صاحبتك دي....بكل تفاصيلك انتى!!!!!
شعورك ايه ساعتها؟؟؟ ولما تنفذي فكرة عيد ميلاد ابنك هايبقى انتى اللى قلدتي...انتى اللى بتسرقي فكرتها....يا منقادة يا قلودة يا رخمة!!
حقيقي الناس اللى بتاخد مجهود غيرها على الجاهز (ايا كان فكرة او تقليد مهارة او سر الصنعة او حتى تعرف سكة حاجة وتسبق"...انتوا ازاي بتبصوا في عين صاحب الفكرة الاصلية؟؟ ازاي ليكوا وش تقولوا "احنا الاحسن - احنا الاصل" مع انكوا تقليد سخيف ...ايه السعادة في انكوا تطفوا فرحة صاحب الفكرة؟ ايه الاستمتاع في سرقة افكار الاخرين؟؟ انتوا فقراء الفكر...احنا مالنا؟؟؟
على رأي المثل: علمناهم الشحاتة...سبقونوا على الابواب!!!
ريم اسامة
حسيت فجأة إني في قعدة ستات ، و النفسنة مالية المكان :S
ReplyDeleteلا يُلدغ المؤمن من جُحر مرتين
الصُحاب اللي من النوعية اللي بتاخد ع الجاهز دي
هية مرة و زي ما بيقولوا إعرف صاحبك و علّم علية
+
و إستعينوا علي قضاء حوائجكم بالكتمان
مفيش حد بيتعلم بالساهل
Deleteانا كتبت امثلة من حياة السيدات علشان ده اللى اعرفه:) بس اكيد في امثلة اكتر في حياة الراجل خصوصا في الشغل
مجال العمل للراجل في كتير اوي من الناس دي
ربنا معانا ويرحمنا من الاشكال السخيفة دي كلها
و طولتي الغيبة المرادي
ReplyDeleteان شاء الله المانع خيير
توفت جدتى يوم السبت وكنت مشغولة بمواساه عائلتي :)
Deleteالبقاء لله ، ربنا يرحمها
Deleteربنا يرحم موتانا جميعا ان شاء الله
Deleteنمرة واحد ياريت متتأخريش علينا
ReplyDeleteنمرة اتنين البوست ده شكلك كتبتيه من قلبك لا من الحته الجوانيه كمان داتني شكلك محروقه جدا
نمرة تلاته فيما يخص الشغل للاسف طول ما الواجد شغال بيقابل نوعيات كتيرة جدا من اللي بتحكي عنهم والحل الوحيد ليهم حاجه من اتنين اولهم الكتمان وثانيهم الفضيحه يعني لما حد يطلب منك انك تعمليه حاجه تخلي الناس كلها تعرف انك علمتيه الحاجه دي علشان ميبقالوش عين يعمل اي حركه نقص
اولا : التاخير كان لوفاة جدتى معلش
Deleteثانيا : هوا واضح اوي كده انى متضايقة؟ :))) اصل الكومنت ده اتقالي كتير النهاردة :))
ثالثا: الرجالة بيعانوا جدا من الموضوع ده في العمل...الراجل بيتأثر اوي من شغل "السيط ولا الغنا"
وعجبتني اوي فكرة الفضيحة :)))))
اسف مكنتش اعرف
Deleteربنا يرحمها ويجعل مثواها الجنه
ربنا يرحم موتانا جميعا - ويرحمنا احنا وراهم ان شاء الله :)
Delete