جبر الخواطر

الراجل على طول بيشتكى ان مراته اتحولت بعد الجواز...او بعد الخلفة خاصة!

طيب يا ترى فكر هيا اختلفت ليه؟ الراجل مرتاح جدا لفكرة ان الست مهملة ومش بيحاول يفكر هيا بقت مهملة ليه مع انها اصالا مكانتش كده!! 

عارف ليه "عزيزي الزوج"؟...علشان على طول كاسر خاطرها! على طول كاسر نفسها...دايما بترميلها كلمة غبية ولا حركة سخيفة وعلى طول بتسيبها فريسة لامك وحركاتها البايخة!! وانت عارف ان امك بايخة ولكن بتستكبر تقف جنب مراتك!! "دي ماما!!" 
بعد الخلفة الست شكلها بيختلف...بتتخن...مابيكونش عندها اي وقت ولا طاقة تاخد بالها من نفسها...وممكن جدا يجيلها اكتئاب فمايكونش عندها اصلا استعداد تتغير للاحسن تانى...تيجي انت بكل برود تقولها "مش ناوية تخسي بقى؟ انتى قربتي متعديش من الباب"....ليه؟ ليه تقولها كلمة جارحة وانت عارف كويس انها هاتضايق!! لازمته ايه "ما كفاية اكل بقى!!"....ماينعفش مثلا تقولها "انا عارف انك متضايقة بس انا خايف على صحتك...تعالي ننزل النادي نعمل رياضة سوا" ماينفعش؟ لازم الكلمة الوحشة؟؟ مع انك مش بتعمل كده مع امك يا اخي....بالرغم من ان مراتك هي اللى عايشة معاك!!!

لما بتخرج مش بتسلم عليها عدل (كويس اوي ترمي لها سلام عليكم زي ما يكون داخل ميكروباص)...لما بتتصل بيك بترد بسخافة (الو؟ نعم؟؟)...لما انت بتيجي البيت وهيا تستقبلك ولسه ملحتقش تغير الهدوم اللى كانت بتطبخ بيها بتقرف منها...مع انها بتطبخ لعظمتك يعنى!! لما تعمل الاكل لازم تطلع لها فيه حاجة وحشة وتقلب خلقتك على السفرة ولو الاكل طلع حلو...يا سبحان الله يا اخي بتبلع لسانك وبتنسى تقولها تسلم ايدك ولا كتر خيرك ولا شكرا لتعبك!!
طبعا كلامى مش هايعجب معشر الرجال..بس لو الرجالة دول متضايقين من الكلام ...استنوا تعليقات السيدات علشان تعرفوا ان الكلام ده مش خيالي ولكنه حقيقي جدا...بالعكس ده يعتبر سطحي بالنسبة للمأساة الحقيقية في البيوت!
المعاملة الوحشة بتطفي الست...بتخليها دبلانة...حزينة...نفسها مكسورة وبعد فترة خلاص مش بيفرق معاها حاجة ولكن الحزن بيكون عاصف بحياتها وبينعكس على كل حاجة في البيت واولهم الاولاد! والله بجد كلامى حقيقي...كام واحدة خايفة تتصرف من نفسها لحسن الافندي يزعل ويديها اللى فيه النصيب؟ ليه كل ما الست تتصرف قبل ما ترجع "للمخ الذري" يعتبر ان دي اهانة؟؟؟ ماهي راشدة ومش متخلفة ولا معاها شهادة معاملة الاطفال...من حقها يكون لها مساحة حرية تصرف وثقة فيها...اشمعنى يعنى سايب لها العيال بقرفهم وشايل ايدك؟ يا ترى ده ثقة فيها ولا تكبير دماغ؟؟؟؟
لما الست تقرر خروجة مع العيلة او الاصحاب تخرجها مع جوزها ليه هو بيعتبرها اهانة لرجولته وكرامته وكبريائة؟ وفي جملة حمضت ودودت "هوا انتى بتبلغيني ولا بتاخدي رأيي؟؟" - هوا عارف كويس انها خلاص اتفقت...بس ازااااااي؟ يعنى الناس لو عرفوا انها اتفقت وبلغته بعديها يقولوا عليه ايه؟ هفأ؟ قفا؟ معندوش شخصية على مراته؟؟ لازم يكسفها...ويكسر نفسها..ويديها من المنقى خيار انها قبل ما تتفق على اي حاجة تاخد رأيه الاول علشان هوا مش شوال ذرة في البيت...ده رااااجل البيت!!!
ياااااااه؟ ايه النقص ده؟ ايه كمية العقد دي؟ ايه يعنى؟ ماهي قررت تتجوز جنابك  ده كان قرار منها واختيارها ؟ يا ترى كان غلط؟....اه بصراحة كان غلط! لو كانت سمعت الكلام انها تاخد  واحد اكثر ليونة في التعامل مكنش جالها الضغط!
اشمعنى لما معاليه يقرر اي حاجة تمشي على رقبة الست؟ حتى لو مش عجباها؟ ..."علشان انا راجل"!! 
رسالة لكل راجل "غتت"....اجبر بخاطرها ... خليك جنبها لما تضايق ...مش لازم كل ما تلاقيها بتعيط ترزعها جملة "يادي النكد!! هوا انتى غاوية فقر في البيت؟"...على فكرة لو قعدت جنبها وقلت لها مالك وفي ايه وحتى لو هيا مش عايزة تتكلم..تعالى على نفسك وطبطب عليها...هايفرق معاها اوي على فكرة....لو انت شايف انها بتضايق كل ما تروح بيت امك....وانت عارف هي بتضايق ليه اصلك مش غبي!...معلش حاول تشكر فيها قدام امك....اشكر انشالله في اكلها...في اي حاجة...اي حاجة مهما كانت هايفة....هاتحس ان مراتك اختلفت اوي...انصرها في بيت اهلك....لما يتكاتلوا عليها ارجوك خليك جنبها....او اضعف اضعف اضعف الايمان كلم اهلك من وراها انهم يخفوا عنها شوية! لما تلاحظ ان الاكل ناقصه ملح...ابقى رش من الملاحة ايدك مش هاتتقطع اطمن! لو الاكل اتلسع مش لازم تكشر اسبوع...يا سيدي التمس لها العذر...مش لازم تعرف امة لا اله الا الله انها لسعت الحلة!!! ما انت مش هاتكسب حاجة غير انك هاتخنقها من عيشتها معاك اكتر ماهي مخنوقة!!!
من فضلك في عيد ميلادها ابقى افتكر هات لها هدية....مش لازم تكبر دماغك او حتى ترمي لها شوية فلوس! هيا مش عايزة فلوس!!! الست عايزة اللى يهتم ويعمل مجهود انه يفكر في هدية مناسبة تعجبها حتى لو كانت رخيصة! مش لازم في عيد جوازكوا كل سنة تهزر هزار "التاكسجية" وتقولها "ده لو كام مؤبد كان زمانهم افرجوا عني"!...ده انت دمك يلطش والله!! خليك كويس معاها....تعالى على نفسك واعصابك وقولها "عقبال كل سنة"...اي حاجة بس ترطب عليها حياتها الجافة دي!
اه معظم الرجالة بتعمل كده...ايوة انا مش بفتري عليكوا....الراجل الكويس مش بيأنب فيها ليل نهار على اي خطأ صدر من الاولاد علشان المفروض انه يشارك في التربية ... المفروض انه يشيل جزء وهيا جزء مش يرمي كله على كتافها وكمان (يا بجاحته) يحاسبها على الاخطاء!!!
مش لازم تعملها اي حاجة على انه "واجب"...مش لازم تروح بيت اهلها علشان هوا واجب عليك...ولا تعزمها بره علشان "واجب ولازم تعمله"...حسسها انك مبسوط انك تخرج معاها...غير مضطر! بتفرق اوي على فكرة!!
لو بقيت كويس معاها هاتلاقي انسانة مستنياك بلهفة في البيت...مستنية اللى بيحبها وهيا بتحبه ...مستنية "ِشريك" حياتها مش البومة اللى بتغلس عليها! هاتلاقي عندها صبر اكتر على العيال وعليك وهاتلاقي اكلها احلى ومتنوع اكتر...لانها عارفة انها هاتسمع منك كلمة حلوة...هاتفنن في ارضائك علشان تسمع كلامك الجميل!!!
الست ممكن اي راجل يكسبها بكلمة...حركة حلوة...لفتة طيبة...يكون حنين عليها وقلبه يتحمل تقلب مزاجها....لازم يعرف ان الست كائن ضعيف ... سيبكوا من الصوت العالي اللى هيا فيه (لانه من الاحباط) 
اكسب مراتك النهاردة....بدل ما تتمنى انها تكون لغيرك بكره.....وبدل ما بعد بكره ييجي اللى يميل دماغها وتسيبك غرقان!!!
جبر الخواطر على الله !!!

ريم اسامة
https://www.facebook.com/groups/329904227056535/