سعيكم مشكور

كنت في عزاء الليلة - ولاحظت حاجات تستحق التدوين.

مبدئيا كانت الصالة كبيرة جدا وفي فاصل خشب بين الرجالة والستات....كل الرجالة بلا استثناء قالوا لنا "ايه الوش اللى كان جاي من ناحيتكوا ده؟"

وجوزي قالي "عجبتك الحفلة:؟؟؟ ايه اللى بيحصل ده؟ يا جماعة ده عزا مش حفلة شوي!!"

الستات رهيبة...فعلا...رغي رغي رغي

الفاصل كان خشب في زجاج غامق..بس شايفينهم يعنى ... بصيت عليهم...كل واحد بيسمع القران في خشوع!! معظم الرجالة كل واحد فيهم مربع ايده وباصص على جزمته!! (معرفش ليه بس هما باصين على جزمتهم)...وفي اللى فاتح الموبايل واكيد بيلعب او على الفيسبوك في الخباثة ! اصل مش ممكن فاتح بيتأمل في الساعة كام - مستحيل!

نرجع للستات تانى والمقالة كلها عليهم النهاردة 

طبعا الكل لابس اسود (طبيعي يعنى)  وبما ان مفيش منظرة باللون او الموديل او خامة القماش قدام باقي الستات (اصل مهما نوعت هايفضل اسود برضه) فهنا بقى يجي دور الشخلعة بتاعة الدهب والالماظ واللذى منه...انبهار الحقيقة...فاترينات الماظ ودهب ماشية قدامي ... في منهم اللى لو اتقطع ايدها هاتفك ازمة جواز عمارة بحالها...والله العظيم واحدة كانت لابسة تلات خواتم فوق بعض في نفس ذات الصباع!! ليه يا ستى؟ 

وبعدين الشراب بيدل على الست ومركزها الاجتماعي....الشراب الاسود التقيل بتاع المحجبات للستات المحافظات...ما علينا...الشراب الفوال الخفيف جدا ده للست الشيك ...الشراب الفوال الكريستال للست العاقية اللى ماشي على الموضة....الشراب الفيليه الاسود العادي للمدامات العاديات وجايبة الخمسة بعشرة جنيه من كارفور غالبا....الشراب اللى باين الاستيك بتاعه...الشراب الفيليه اللى الاستيك بتاعه برم وبان من تحت الهدوم...ده من ابو اتنين جنيه ونص! 

نيجي للكعب...الكعب العالي جدا الرفيع زي القلم الرصاص للست الانيقة الرشيقة (ما لازم تكون رشيقة طبعا) اللى محافظة على شياكتها واناقتها وتألقها....الكعب العالي العريض للست الشيك العملية اللى عارفة كويس انها مش هاتعرف تتحرك على الكعب ابو قلم رصاص ده...الكعب اللى كتلة واحدة على بعضه wedge للست او الانسة الكاجوال غالبا....الكعب القليل التخين للست اللى رجليها تعباها بس بتحاول تحافظ على اقل اقليل من شياكتها واناقتها وبرضه يبقى اسمها لابسة كعب عالي....الجزم الفلات اللى على الارض خالص يا واحدة معاها بابي او ست كبيرة او خايفة تقع...ولما الست الشيك تلبس فلات فهيا لازم تحط مانيكير يلفت النظر لشياكتها برضه!!!!

نيجي للمكياج...المفروض ان ده عزا يعنى حالة حزن! فبيحطوا كل حاجة معادا الروج!! يا سلام؟ يعنى الروج عيب والباقي كله عادي؟ وبيتحايلوا على القانون وبيحطوا مكياج الوانه ترابيه...بيج...رمادي...طوبي...كده يعنى....الست بتحط كحل ولون ترابي في عينها وماتحطش ماسكارها (علشان عيييييييب ده ميتم)...وتحط احمر خدود خفيف وتسيب بؤها مقشف من غير روج (علشان عيييييب ده الميت لسه دافي في تربته)!!!

المانيكير غالبا بيكون فرينش او لون بيج او ابيض او شفاف (علشان الالوان التانية عيييييب الناس يقولوا ايه؟ رقاصة رايحة العزا؟) - لا العفو!!

وطبعا بيكون الجو معبأ بالبرفانات الغالية اللى متشالة في الدولاب مش على التسريحة - في علبتها لسه (الغالي يطلع للغالي...والمرحوم كان غالي علينا كلنا الحقيقة)

الستات بقى يقعدوا رجل على رجل ويشربوا القهوة بشويش (خمسة شياكة لصحتك)....واول ما الست من دول تدخل القاعة تسلم على الناس اللى على الباب بمنتهى الاسى والحزن والتأثر وكسرة النفس...تدخل على الباقي جوا وبؤها يتضاعف احجامه في ابتسامة عرض الشارع لما تشوف حد بقالها كتير مشافتهوش ومتاخدش بالها بقى وهيا بتقول "فيييفي..مش ممكن وحشتيني مووووووت" وعشر دقايق طرقعة بوسات من هنا ومن هنا و"ايه ده؟ ابنك؟؟ يا حبيبي كبر خالص...شبه خالك!" وندخل في الاخبار ايه ومش بتسئلوا ليه وفين اراضيكوا وانا سعيدة جدا (في العزا) انى قابلتك كان نفسي اشوفك من زمان!!

ولازم طبعا نلاقي الست الكبيرة في السن تنده لعيالها كل شوية علشان يسلموا على طنط فلانة وطنط علانة كانت معايا في اعدادي وطنط بتاعه دي بتشتغل كذا ممكن تنفعك في شغلك (يخرب بيت الاحراج) وفلانة الفلانية بنت طنط علانة العلانية بنت خال عم ابويا الله يرحمه!! 

والراجل اللي بيلف بالصينية زي الغلبان يوزع شاي وقهوة بياخد الطلبات (قهوة على الريحة لو سمحت بس يكون بن محوج - شاي خفيف يعنى شيل الفتلة اول ما تصب الماية في الفنجان- عايزة مياة ساقعة لو سمحت علشان كل اللى هنا سخن والدنيا حر) واول ما الراجل يحط ازايز المياة الصغيرة اوي دي على الترابيزات تلاقي كل واحدة شادة ازازة في ايدها وبعد شوية تزقها في شنطتها ...وفي اللفة اللى بعدها تاخد تانى وتخليه في ايدها!!!! وقته المزاج - ده وقت الاستمتاع بالقهوة والشاي والصحبة الحلوة على صوت القران اللى محدش اصلا واخد باله منه!! 

ولو واحدة ليها احفاد هاتسحلهم في القاعة كلها تفرجهم للناس وهات يا سلامات وبوس لحد ما خدود  العيال تبقى ريحتها بؤ! 

وخارج القاعة بيكون في تعارف من نوع اخر...كل واحدة عندها بنت تقف بيها بره شوية قرب باب استقبال الرجال...لعل وعسى...اهو نبقى ندعي للمتوفي بالرحمة لو جه نصيبها في مناسبة زي كده!!! وطبعا تشد البنت (اللى غالبا بتكون متأففة من الحوار كله) تعرفها على كل واحد على قيد الحياة في القاعة!! اهو احتمال!!!

وبعد العزا...الكل يبوس بعضه بحرارة وياخدوا تليفونات بعض لو بقالهم فترة متقابلوش...وخلونا نشوفكوا في مناسبة احسن من دي....ومحدش فيهم افتكر يدعي للمتوفي حتى!!!

اللهم ارحم موتانا جميعااااا